ӰЛГӰ ПАЗА ЧОН ПӀР ЧӦПНЕҢ ТОҒЫНАР
09.08.2019
Хабарлар
Хакасия пазы Валентин КОНОВАЛОВ ОНФ араласчыларынаң тоғазығ тузында
Тоғазығ. Пу кӱннерде Хакасия пазы Валентин Коновалов тиксі Россиядағы чон фронтының республикадағы толдырығлығ комитет устағӌызы Евгений Мамаевнең, региондағы штаб кнестері Елена Вяльбенең паза Максим Мареевнең тоғасхан
Тоғазығда кӧп ағырсымнығ сурығ ӱзӱрілген. Ӧӧн чоох парған республиканың социальнай учреждениелерінзер ас-тамах ағылчатхан идінҷектерге ӧдістердеңер, Харатастағы Рабочай орамадағы 127 № тураны изелчеткен туралардағы чуртағҷыларны пасха чуртсар кӧзірер программаа кирердеңер. Ідӧк Тӧӧ пазы посёлоктың ағырсымнығ сурығлары ӱзӱрілген. «Дельфин» бассейнде, котельнайда тыхтағ тоғыстары киректелчеткеннеңер. Паза Таштып аймаанда, законнар сайбап, хузух ағастары узурылчатханнаңар, ағас узурарын хатығ сыныхтағда тударынаңар чоох парған. Хакасия правительствозы сурығларның кӧбізін пӧгер оңдайлар таапча.
- Чон фронтының сыныхтағ тоғыстарында улуғ опыт пар. Таныхтирға кирек, ОНФ-тың хайиинда чолларның пӱдіріглері, экологияа теелчеткен сурығлар, чурт-коммунальнай хоных сурығлары, хазна закупкалары паза даа пасха ағырсымнығ сурығлар. Чон фронтының тоғызы сидіксіністерні хада-пірге пӧгер оңдайлар тілиріне кӧстегліг полар тіп ізенчем. Пӱӱнгі тоғазығ - ӱлгӱ паза чон пілізіп, пір чӧпнең тоғынарына хаалағ итче, - таныхтаан Хакасия пазы Валентин Коновалов.
Ідӧк республика пазы ОНФ штабының региондағы кнезі, олимп ойыннарының чиңісчізі Елена Вяльбеге Хакасиядағы спорт инфраструктуразына паза социально-экономическай тилізіне улуғ хозым итчеткеннеңер алғызын читірген.
Елена Вяльбе Тӧӧ пазы поселоктағы сидіксіністерні, федеральнай программаларда аралазып, пӧгерге кирек теен:
- Хакасиязар мин 14 частығдаң сығара кил парчам. Мында чыл сай поларға килісче, халғанҷы туста чылда ікі-ӱс хатап таа полчам. Мин Тӧӧ пазын на нимес, тиксі республиканы чахсы пілчем. Тӧӧ пазы Россияның саналығ чылчатхан кізілерні чыыпчатхан орын полча. Ол чыл ибіре тоғынча, спортсменнер киліп, анда чуртапчалар. Посёлокка улуғ нимес парыстар кирчелер. Анда, спорт инфраструктуразын тилідіп, чуртағҷыларға тоғыс пирер оңдайлар тӧстирге кирек. Пілдістіг, асхынах нимес ахча хорадарға килізер. Анзын федеральнай программаларда аралазып, чуртасха кирерге чарир. Оңдайлар таап, чайғы паза хысхы спорт кӧрімнерін тилідерге кирек.
- Тӧӧ пазы посёлоктың сидіксіністеріне ирткен чылдаң сығара хайығ салылча. Андағы тузаланған суғны арығлаҷаң пӱдіріг, котельнай паза рентген кабинеді - пу сурығлар правительство хайиинда тудылча паза пӧгілче, - таныхтаан Хакасия пазы.
Чыылығ тоозылчатханда, Валентин Коновалов кӧдірілген сурығлар хоостыра республиканың министерство-ведомстволарына оларны пӧгерге тусты кӧзідер паза оңдайлар табарға чахығ пирер тіп теен. Тоғазығның араласчылары мындағ оңдайнаң сыбыра чыылызарға чӧптес салғаннар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы