ПОС КИРЕЕ ХОЛНЫ ПОС САЛАРҒА ПИРБЕС!
23.10.2019
Хабарлар
Мин - бизнесте. Пӱӱнгі матырыбыс - Юлия Чаркова. Бизнесте 2014 чылдаң. Пос киреенің ӧӧн кӧстее - хакас оңдайлығ кӱмӱс ызырға-пурбалар сығарызы. Тоғыста тудынчатхан чооғы: ниме дее полза, хыймыран!
Сағаа пос кирее нимедір?
- Пос кирее ӧрініс ағыларға кирек, кізі ағаа нандырығлығ паза хыныснаң хайзын. Чылдаң чылға пілістерні алғыдарға киректелчеткенін мин чахсы оңарчам. Хайди?
Пір дее пілбинчеткен киректернең танызып алай пілчеткен киректе сала тирең пілістер алып... Аннаңар мағаа пос кирее ол посты тиліткені, ӱгреткені тіп санапчам. Мында прай ниме постаң!
- Нименең пасталча пос кирее?
- Наа сағыснаң. Аны хоостыра аарлапчатхан ниме-ноолар тӧстелче, анаң на кізі сағызын чуртасха киріп пастапча. Че наа сағыс олаңай ла пӱтпинче. Минің наа сағыстар чорыхтар, наа орыннар паза таныстар соонаң тӧріпчелер. Аймах-пасха орында істенчеткен алай пос киреен апарчатхан кізілернең танызып, чоох алызып, мин олардаң кӧп нимее ӱгренчем.
- Пос киреен азарына ахча поларға кирек пе? Аның сині нименең палғалыстығ?
- Мин студент полғандох, ахча чыып пастаам. Ӱзӱрлеем тібеспін, че чығчаңмын. Сағынчам, амғы тӧлнің оңдайлары сала алғым, чииттернің ӱгренчеткен туста тоғынар тус пар. Олох туста пос киреен азарында пос ахчазы ла тузаланылбинча, ӧдіске дее аларға килісче. Ӧӧні, кізее ахчанаң тузаланып пілгені, полған на манитті ӱзӱрлирге кирек чоғыл, киректелзе, хынған нимее хорадыныбыс, кӧңнің толдырып ал, хорадылған ахча орнына ахча кірер. Ахчаны ниик позыдарға пілерге кирек...
Чииттернің хайиин паза пір нимее айландырарға сағынчам: пӱӱнгі кӱнде ахча тоғынар ӱчӱн экономистке ӱгренерге кирек чоғыл. Амды пос киреенде чахсы специалист поларға кирек!
- Бизнесті тилітчеткен кӱс?
- Кізі пір орында турбасха кирек, хайынарға, хыймыранарға... Хайдағ даа сидік полза, холны пос салбасха! Кӧрісті алыстырарға, наа оңдайлар табарға...
- Ӧӧн полысчыларың кем?
- Ол минің сӧбірем: ирім, іче-пабам.
- Пос киреенің маңнаныстығ тилізі регионнаң палғалыстығ ба?
- Палғалыстығ. Хакасия - ол провинция. Москва, Санкт-Петербург - ол килкім городтар, хайда кӧп кізі чуртапча, ортымах чал ахчазы сала пӧзік, оңдайлар сала алғым...
- Хайди паалапчазың регион ӱлгӱлерінің кічіг паза ортын пос киреен тилідеріне хабасчатханнарын?
- Грант хабазии пар полғанда, чахсы полған. Маңат поларчых, андағ хабазығны узаратса. Марығлар иртірілчеткені чахсы кӧстепче. Хакасияда налогтар тӱзірілгені ӧріндірче.
- Ноға пос киреен азарға кирек?
- Ол полған на кізінің позының чарадии. Кӧбізі позына тоғынарға хынча. Иң пастағызын, ол тус, хайзын кізі позы кӧрче. Ол 09.00 частаң 18.00 часха теере тоғынминча. Кізі ӧӧркі пастыхтарнаң, чахығларнаң палғалыстығ нимес. Ол позы позына пастых. Ол - ӧӧн сылтағ, хаҷан кізі пос киреен азарға чарадыбысча. Анаң на кізі ахчадаңар сағынча.
- Ниме алғирчыхсың пос киреен азарға тідінминчеткеннерге?
- Наа сағыс прай саринаң тӧстел парарға кирек. Кізі позы анзын сизінче: тимде ол алай чох. Пасхазы чоғыл нинче час ағаа: 60, 50, 40, 25, 20... Прай чуртастары, хайда олар тоғынғаннар - ол піліс, опыт, аны прай пос киреен азарында паза тилідерінде тузаланарға чарир. Кізі аны позы сизінче. Чарадығ олаңай ла килбес. Кізі наа таныстарнаң чоохтасча, пілістер алча.., наа сағыстар килче, хайзын тилідерге, ӧскірерге кирек. Паза - хорыхпасха! Идерге!
Автор :
Наталья СУБРАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде