ИҢ АРТЫХ ТОС-тарға - АХЧАЛЫҒ СЫЙЫХТАР
30.10.2019
Хабарлар
Хакасияның национальнай паза территориальнай политика министрі Михаил ПОБЫЗАКОВ чиңіс тутхан ТОС-тар кнестерінең хада
Фестиваль. Пу наада Ағбанда «Чиңіс» культура кінінде Хакасиядағы халыхтарның орындағы пос устаныстарының республика фестивальы ирткен
Узінҷі хати республиканың халыхтарның орындағы пос устаныстары (ТОС) фестивальға чыылыстылар. Анда кибірли иң артых ТОС-тарны таныхтааннар. Хакасияның национальнай паза территориальнай политика министерствозы ТОС-тар аразындағы теестегі марығның салтарларын иткен. Пӱӱл анда 26 халыхтарның орындағы пос устанызы араласхан: тӧрт городтағы, тӧрт аймахтың администрация кініндегі паза 18 аалдағы ТОС.
Городтар аразында ТОС-тарнаң тоғыс тӱзімніг апарчатхан ӱчӱн, Ағбанның администрациязы иң артых полыбысхан, аймах кіннері аразында - Таштыптағы аал чӧбі, аал чӧптерінің аразында, тізең, Пилтірдегі аал чӧбі пастағы орынға турысхан. Фестивальда ідӧк кічіг ааллардағы ТОС-тарнаң тоғыс чахсы апарчатхан аал чӧптерін таныхтааннар.
Мында артых полыбысханнар Асхыс аймаандағы Ӧӧк пилтірі паза Таштып аймаандағы Пыдырах аал чӧптері. Сыйыхтығ орыннарға турысхан ТОС-тарға 80 - 230-ар муң салковай ахчалығ сыйых читірілген.
Ағаа хоза марығда араласхан, че пір дее орынға турыспааннарны ідӧк таныхтааннар. Іди 50-ер муң салковай Абаза городха, Ағбан пилтірі паза Тӧӧ пазы поселоктарға, Ызых, Ус чул, Тоғызаас, Майрастар, Ӧлең чазы аал чӧптеріне пирілген.
Фестиваль араласчыларынзар Хакасияның национальнай паза территориальнай политика министрі Михаил Побызаков айланған:
- ТОС - ол пос кӧңнінең апарылчатхан тоғыс, аның ӱчӱн чал ахчазы тӧлелбинче. Че аның араласчылары, ибде ле одырбин, чуртапчатхан аалны, аймахты алай ба городты чахсыландырарға кӱстенчелер.
Таштып аймаандағы Чыланнығ аалның библиотека тоғынҷызы Екатерина Султрекова «Порчо» ТОС-наң устапча.
- Чыланнығ аал улуғ даа полбаза, итчең тоғыс табыл парча. Часхы-кӱскӱде аал істін арығлир паза иптир тоғыс апарчабыс, кӧп палалығ алай ба чалғыс чуртапчатхан сӧбірелернең чағын тоғынчабыс. Ағаа хоза ол-пу ӱлӱкӱннер, мероприятиелер иртірчебіс, - чоохтапча Екатерина Султрекова
Сынап таа, ТОС араласчылары муниципалитеттерде уғаа кӧп сурығ пӧкчелер. Оларны администрацияның пастағы полысчылары полчалар тиирге чарир.
- Халыхтарның орындағы пос устаныстары аал чуртағҷыларының чуртазын чахсыландырарында улуғ полызығ итчелер. Сығыс килген ағырсымнығ сурығларны алай ба сидіксіністерні пӧгібізерге кирек полза, ТОС араласчылары, аал чуртағӌыларын чапчаң чыып, чоохтазып, пір чӧпке килчелер. Аннаңар оларны пістің иң чағын полысчыларыбыс тиирге чарир, - чарытча Пыдырах аал чӧбінің пазы Семён Боргояков.
Фестивальда ТОС-тарның ӧткін араласчыларына улуғ концерт кӧзіділген паза фойеде устарның кӧзідии ирткен.
Таныхтирға кирек, Хакасияда иң пастағы ТОС 2015 чылда Асхыс аймаандағы Чоғархы Асхыс аалда тӧстелген. Ол «Читі хыс» адалча. Амды, тізең, Асхыс аймаанда 54 ТОС саналча. Анзы, пасха муниципальнай пӱдістернең тиңнестірзе, иң кӧп.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы