ПАЗА АНДАҒ НИМЕ ПОЛБАЗЫН
01.11.2019
Хабарлар
Митинг. 30 октябрьда Ағбанда тиктең политика репрессияларына тартылғаннарның мемориалы алнында митинг ирткен. Анда Сталиннің репрессияларында хыйалланғаннарны хумартхылааннар
Политика репрессияларына тартылғаннарның мемориалынзар чон азынада чыылыс парған. Кӧбізінің холларында хызыл чахайахтар полған. Хыйалға кіргеннерні хумартхылирға, оларға улуғ аарлас читірерге килгеннер республиканың министерство-ведомстволары, халых пірігістері кізілері, чииттер паза тиктең репрессияа тартылғаннарның туған-чағыннары.
Хайди митинг азылғанда таныхталған, 30 октябрь Россияда алынча танығлығ кӱн полча. Россияның Ӧӧркі Чӧбінің 18 октябрьда 1991 чылда алылған Указынан ол кӱн хазна календарьына танығлығ кӱн чіли киріл парған. Амды пу кӱнде прай хазнада тиктең хыйалланғаннарны хумартхылапчалар.
Ідӧк мында чоохтирға кирек, 30 октябрьда Хакасияның Ӧӧркі Чӧбінің сессиязы ирткен, аннаңар мероприятиеде депутаттар чох полғаннар. Мының алнында мындағ чобағлығ кӱндегі митингте Ағбан городтың пазы Николай Генрихович Булакин сыбыра араласчаң, че пӱӱл, кинен полып, ол ах чарыхтаң парыбысхан. Анзын митингте ідӧк таныхтааннар.
Митингте Хакасияның национальнай паза территориальнай политика министрі Михаил Побызаков чоох тутхан:
- Пӱӱн піс чобағлығ кӱнні таныхтапчабыс. Тиктең политика репрессияларына тартылғаннарның саны миллионнарнаң саналча. Піс «Мемориал» пірігістің устағӌызы полған Николай Степанович Абдиннең хада «Асхыс аймаанда репрессияа тартылғаннарның книгазын» сығарғабыс. Асхыс аймаанда ла чӱзерлеп кізі репрессияа хабылтыр, прай Россияда - миллионнар кізі. Хазнадағы тоталитарнай режим ол чонны чох иткен. Ам прайзын сағысха кирчебіс. Ол туста прай конфессиялар, интеллигенция, олаңай тоғынӌылар даа репрессияа тартылғаннар. Піс, чыл сай мында чыылызып, мының алнында хайдағ хорғыстығ киректер полғанын ӧсчеткен тӧлге, чииттерге читірерге кирекпіс. Паза тархында мындағ ниме полбазын, аны прайзы пілзін.
Мероприятиеде ідӧк чоох тутханнар Николай Степанович Абдиннің пархазы Николай, ХГУ-ның тархын кафедразының доценті Виктор Беккер паза Ағбандағы епархияның абызы Алексей Фоминых. Виктор Беккер, РСДРП-ның Лондонда ирткен II съездінең пастап, амға теере Россиянын тархынында хайдағ тоталитарнай режим полғаннаңар чоох апарған. Митинг пасталар алнында мин андар килген хай пірее кізілернең чоох алысхам. Іди Ағбанда 46 чыл имчі-гинеколог полып тоғын салған Галина Николаевна Доможакова, позының кізӧзінің, репрессияа тартылып, атырт салған улуғ ағазы Кристиан Руйганы сағысха киріп, хумартхылап, мемориалзар чахайахтар саларға килтір. К.Руйга латыш полтыр, Ағбанда халас заводында завхоз полып тоғынтыр. Хайдағ-да хоп кіргенде, аны, арестке алып, 1937 чылда ат салтырлар.
80 частығ Виктор Николаевич Коков, репрессияа тиктең тартылған пабазы Николай Васильевич Коковты сағысха киріп, мемориалзар килген. Аннаң хада чеені Игорь Коков полған. Оларның чооғынаң, Николай Васильевич Шира аймаандағы Палты кӧл аалда колхоз кнезі полтыр. 1937 чылда, ідӧк хончыхтардаң хоп кіргенде, аны, арестке алып, Минсуғда ат салтырлар.
Митинг тоозылғанда, чыылған чон, тиктең хыйалланғаннарны сағысха киріп, оларға аарлас читіріп, пір минута сым турған. Анаң мемориал тӧзінзер веноктар паза чахайахтар салылған, свечілер тамызылған. Хакасияда ла 60 муң азыра кізі, политика репрессияларына тартылып, чох иділген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы