ӦӦН ПӦГІН - АҒЫРЫҒНЫ ИРТЕ ІЛЕЗІНЕ СЫҒАРАРҒА
12.11.2019
Хабарлар
Нацпроект. Россияның хазых хайраллачаң министерствозының «Хазых хайраллиры» нацпроектіне кірчеткен «Онкология ағырығларынаң кӱрезіг» проект хоостыра хазнадағы поликлиникаларда Амбулаториядағы онкология полызииның кіннері азылғаннар
Ағбан городтың поликлиниказында андағ кін пӱӱл май айдаң тоғынып пастаан. Чарым чыл аразына имчі-онкологтарзар 1500 кізі ракнаң ағырчатханына чочыныснаң айланған. Алты ай аразына 500 азыра хати имнег пирілген. Хай піреезі имнегні нинҷе-де хати ирткен. Диагностика иртірчең кабинеттерде онкологиянаң ағырчатханнарға электроннай календарьлар тӧстелче. Аны «ноған коридор» адапчалар, ол ағырчатхан кізілерге специалисттерзер теес чох кірер оңдай пирче.
Ӱр ниместе имнег туразында хабарҷыларға кіннің тоғызынаңар чарытханнар паза алылған имнег оборудованиезін кӧзіткеннер. Амды Ағбандағы амбулаториядағы онкология полызии кіннің амғы тусха килістіре наа оборудование толдыразынаң пар. Хайди чарытхан Ағбандағы поликлиниканың ӧӧн имҷізі Олег Ананьевский, кінзер тиксі 31 аймах оборудование алылған. Олар - УЗИ аппараттары, КТ-аппарат, гистология істезіглеріне оборудование, маммограф, рентген итчең аппарат. Оларға прай 87 миллион салковай хорадылған.
Амбулаториядағы онкология полызии кіннің устағчызы Валерий Чепчигашев чарытхан:
- Кіннің пӧгіні - онкология ағырығларын ирте ілезіне сығарары. Кізінің ракнаң ағырчатханына чочыныс пар полза, терапевттер алай специалисттер аны пістің кінзер сыныхтаға ысчалар. Мында ағырығны ілезіне сығарчабыс. Операция киректепчеткеннерні, толдыразынаң сыныхтап, онкодиспансерзер ысчабыс. Піссер айланған кізінің прай сыныхтағлары ікі-ӱс неделяа тимнел парчалар. Піс оларны хысхаҷах тус аразына тимнир кӧстеглігбіс.
Амғы туста кінде тӧрт имчі-онколог тоғынча, декабрьда стажировка соонаң пизінҷі специалист тоғынып пастир. Медсестраларнаң хада тиксі кінде тоғыс кізі істенче.
Сыныхтағлардаң пасха, піс ағырчатханнарға мында кӱнӧрте чатчаң орыннар пирчебіс. Оларға операция алнында алай соонда имнег пирілче. Ідӧк гормональнай паза таргетнай терапиялар иртірчебіс. Мындағ кіннер онкология ағыриин ирте ілезіне сығарар ӱчӱн киректелчелер.
- Пӱӱн піс сірерні таныстырчабыс «Онкология ағырығларынаң кӱрезіг» проекттің пір чардығынаң. Республикада пу проект хоостыра асхынах нимес тоғыс апарылча. Ол - радиология корпузы пӱдірілчеткені онкодиспансерзер наа оборудование алылғаны паза пу Амбулаториядағы онкология полызииның кінін тӧстеені. Таныхтирға кирек, нацпроект хоостыра республикада ӱс чыл аразына мындағ ӱс кін тӧстирі кӧрілче. Пӱӱл андағ аймахтар аразындағы имнег туразында кін тӧстиріне республика бюджедінең 88 миллион салковай позыдылған. Прай оборудованиелер 87 миллион салковайға алылған Ӱзӱрлелген пір миллионны піс Саяногорсктағы имнег туразынзар пиргебіс. Анда кін азарынҷа тоғыс пасталыбысхан. Ол хорадығларға килчеткен чыл ідӧк 88 миллион салковай позыдылар. 2021 чылда Харатаста мындағох кін азарына олох син ахча пирілер. Таныхтирға кирек, ол ахчалар регион бюджедінең позыдылар, - чарытхан Хакасияның хазых хайраллачаң министрі Владимир Костюш.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы