ХАЗЫХ ЧУРТАС - ХАЗЫХ ТӦЛ
13.11.2019
Хабарлар
«Демография» нацпроект. Республикада «Чонның хазиин тыыдары» регион проекті чуртасха кирілче
ПУ ПРОЕКТТІҢ ПӦГІНІ - КІЗІЛЕР ХАЗЫХ ЧУРТАС ОҢДАЙЫН АПАРАРЫНАҢАР ПАЗА ЧАХСЫ АС-ТАМАХ ЧЕЕНІ КІЗЕЕ ТУЗА АҒЫЛЧАТХАННАҢАР ИСКІРЕРІ. ІДӦК ТАМКЫ ТАРТЧАТХАНЫ ПАЗА АЧЫҒ СУҒ ІСЧЕТКЕНІ КІЗІ ХАЗИИНА ХАЙДАҒ ӰРЕГ АҒЫЛЧАТХАНЫН ЧООХТИРЫ. ИМӋІЛЕР ЧИИТТЕРНІ ПАЗА УЛУҒЛАРНЫ ХАЗЫХ ЧУРТАС ОҢДАЙЫН АПАРАРҒА КӦӦКТІРЧЕЛЕР.
АНДАҒ ПӦГІННЕРНЕҢ ХАКАСИЯНЫҢ ИМНЕГ-ПРОФИЛАКТИКА СЛУЖБАЗЫНЗАР ТУЗАЛЫҒ ОБОРУДОВАНИЕ АЛЫЛҒАН. ОЛАРНЫҢ ПОЛЫЗИИНАҢ СПЕЦИАЛИСТТЕРГЕ ИМНЕГ-ПРОФИЛАКТИКА ТОҒЫЗЫН АПАРАРҒА НИИК ПОЛАР.
Прайзы даа пілче, тамкы тартханы кізі хазиина хомай теелче. Аннаңар имӌілернің искіріглерін удаа истерге килісче, че искені кізі сағызына тың на сигбинче. Кізі хазиина хайдағ ӱрег ағылчатханын пос хараанаң кӧріп алза, артых ла полар.
Имнег-профилактика службазының тоғынӌылары республикадағы хабарӌыларға алылған тиріглердеңер чарытханнар.
- Пістің хазых чуртас оңдайын апарардаңар паза орта азыранардаңар баннерлер тимнелген. Ідӧк кізілерге хазых чуртас апарарға кӧніктірчеткен искіріглер пар, оларны чуртағӌыларға тарадарбыс. Пістің профилактика кіні чылда нинӌе-де хати, троллейбуснаң чӧріп, «Хазых рейсін» иртірче. Пу тимнелген листовкалар троллейбуста паза школаларда ӱгренӌілерге, вузтарда паза колледжтерде студенттерге тарадылар.
- Пістің хазых чуртас оңдайын апарардаңар паза орта азыранардаңар баннерлер тимнелген. Ідӧк кізілерге хазых чуртас апарарға кӧніктірчеткен искіріглер пар, оларны чуртағӌыларға тарадарбыс. Пістің профилактика кіні чылда нинӌе-де хати, троллейбуснаң чӧріп, «Хазых рейсін» иртірче. Пу тимнелген листовкалар троллейбуста паза школаларда ӱгренӌілерге, вузтарда паза колледжтерде студенттерге тарадылар.
Ідӧк чииттерге тамкы паза ачығ суғ кізі хазиина хайдағ ӱрег ағылчатханнаңар килістіре кӧзідімнер алылған, - искірген профилактика кінінің ӧӧн имҷізінің тоғызын толдырчатхан Ирина Нехода.
- Кӧзідімге, тамкы тартчатхан кӧклӧлернің кӧзідімнерінде піс хайдағ оңдайнаң тамкы кізі хазиина ӱрег ағылчатханын чахсы кӧріп аларбыс. Кӧклӧ пір тамкы тартыбысса, аның ызы ипчее паза аның ам даа тӧреелек палазына хайди хомай теелчеткенін кӧріп аларға чарир. Имнег-профилактика кінінің тоғынҷылары кӧклӧнің ахсынзар тамкы суғыбысханнар, ол ыс кӧклӧнің істінзер тартыл сыххан. Анда ӧтіре кӧрінчеткен сӱлейкеде ам даа тӧреелек ыңааӌахтың манекені полған. Ыс банкаа тол парған, ӧтіре чахсы даа кӧрінминібіскен. Тамкы тартчатхан іҷелернің ыңааӌахтары мындағ ыснаң тынчалар. Ідӧк кӧзіткеннер, кӧклӧ тамкы тартса, аның істінде нинҷе чух халчатханын. Ол синӧк чух кізі ӧкпезінде тамкы тартхан соонда халчаттыр.
Андох ачығ суғ іскен кізі хайди кӧрчеткенін кӧзітчеткен очки пар. Полған на палаа мындағ очки кизіртсе, ол изірік кізі хараанаң кӧрер. Оларны кизіп алған кізі кӧні пас полбинча, аның пазы айланча, хыймыранызы сайбалча. Ідӧк имҷілерге чемодан-дипломаттар алылған, хайзы ачығ суғ іскен кізінің ағырығ органнары хайдағ кӧрімніг пол парчатханын кӧзітче.
- «Чонның хазиин тыыдары» регион проекті Хакасияда 2019 - 2024 чылларда чуртасха кирілер. Аның ӧӧн пӧгіні - чуртағӌыларны хазых чуртас апарарға кӧӧктірері. Ідӧк кізілерге тамкы тартарын паза ачығ суғ ізерін тохтадарға полызары. Ізенчебіс, алты чыл аразына проект тоғынып, араға садиин тӱзірербіс.
Республикада хазых чуртас апарарынӌа сыбыра профилактика тоғызы иртірілче. Имнег организацияларында ікі хазых кіні, пис пӧлік паза 9 кабинет имнег-профилактика тоғызын апарчалар. Чонға тамкы тартарын тохтадарға полысчатхан 11 кабинет тӧстелген.
Прай алылған тиріглердең пасха, килер чылда проектче имнег-профилактика кінінзер транспорт алылар. Тоғынӌылар чорыхтарнаң школаларӌа чӧр полар ӱчӱн, - искірген Хакасияның хазых хайраллаӌаң министрі Владимир Костюш.
Кірген оборудование 4 миллион 46 муң салковайға алылған. Ол компьютерлер, принтерлер, тонометрлер, смокелайзерлер, спирометрлер паза хазых чуртас оңдайын апарар ӱчӱн кізілерні кӧӧктіреріне кӧзідігліг тиріглер. Алылған оборудование республиканың имнег-профилактика кінінде орнығар, пӧліктерӌе паза кабинеттерӌе тарадылар.
Автор :
Наталья ЧЕБОДАЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы