АЙМАХ МИКЕЛЕРНЕҢ ӦРІНДІРГЕННЕР
13.11.2019
Хабарлар
Бокс. Асхыста С.З.Карамчаковтың адынаң спорткомплексте 2001-2002 чылларда тӧреен чииттер аразында боксча Хакасияның азых чемпионады ирткен
Марығ, саблығ ученай, тюрколог Николай Фёдорович Катановтың хумартхызына чарыдылып, «Чииттер наркотиктердең тоғыр» акция хоостыра ирткен. Асхыссар Хакасияның, Туваның, Хызылчар крайының паза Кемеров облазының иң чахсы спортсменнері, тиксі 60 кізі, килгеннер. Олар ӱс кӱн изере марығласханнар.
Пастағы ікі кӱнде араласчылар финалға таллағ ирткеннер. Ӱзінҷі кӱнінде пастағы паза ікінҷі орыннар ӱчӱн кӱрезігні узаратханнар. Анда спортсменнернің иң кӱстіглері паза чапчаңнары араласханнар. Олар ӱзер раунд кӱстерінең сынасханнар. Хазыр сабыстарнаң, аймах микелернең кӧрігҷілерні ӧріндіргеннер. Боксерларның арғыстары, оларны чиңіске кӧӧктіріп, сыбыра хысхыр турғаннар. Спортсменнер оларның паза тренерлерінің чӧптерін толдырарға кӱстенгеннер. Піреезі, пиртініп, харбазығны тохтатхан. Ағбаннаң килген Андрей Киселев Междуреченсктегі боксер Василий Белоусовтаң тоғыр сыххан. Андрей, кӱрезіг ортызында холын ағырт салып, паза тудыс полбаан. Іди Кемеров облазынаң килген аалҷы чиңіс тутхан.
- Пӱӱн тудыстар уғаа хазыр ирткеннер паза сіліг полғаннар, тоғыс тоғазығ полған. Финалға Хакасия синіндегі марығларның чиңісчілері паза пістің «ыырҷыларыбыс» сыбыра полчатхан Кемеров облазының спортсменнері сыхханнар. Хонҷиибыс иң артых спортсменнерін марыға сығарған. Олар тактика-техникаҷа паза физическай тимненісче чахсы паза сіліг кӱрезіглер кӧзіткеннер. Марығ салтарларынңа ізеніс пирчеткен кӧп спортсмен сығысхан Олар техникаңа чахсы пілістерін, устарын паза чиңіске кӱстеністерін кӧзіткеннер. Марығ салтарларынҷа иң чахсы чарғыҷы, парчан кӱзін чиңіске пирген паза чахсы тактика-техникалығ спортсменнер табылғаннар, - таныхтаан чооғында Хакасиядағы бокс федерациязының толдырығлығ директоры Игорь Чертыков.
Марығ салтарларынха орыннар піди ӱлестірілгеннер:
49 килограмм кӧдірім: 1 орын - Егор Тохтобин (Харатас), 2 орын - Сергей Абрамов (Абаза), 3 орын - Вячеслав Федоров паза Артур Асочаков (ікізі Асхыстаң);
52 килограмм: 2 орын - Максим Миронов (Ағбан), 3 орын - Сергей Богданов (Абаза) паза Данил Студницын (Харатас); 56 килограмм: 2 орын - Максим Топаков (Ағбан), 3 орын - Тимур Кулумаев (Ағбан);
60 килограмм: 2 орын -Кирилл Сазанаков (Ағбан), 3 орын - Данил Курчатов (Ағбан) паза Павел Морев (Харатас);
64 килограмм: 1 орын - Сергей Курылев (Ағбан), 3 орын - Эльвин Рамазанов (Ағбан) ; 69 (1) килограмм: 2 орын - Андрей Киселев (Ағбан), 3 орын - Дмитрий Ахнин (Ағбан пилтірі);
69 (2) килограмм:1 орын - Илья Серин (Харатас), 2 орын - Александр Галкин (Калинин аал), 3 орын - Иван Ротенберг (Ағбан) паза Егор Цыганков (Харатас);
75 килограмм: 1 орын - Юрий Колган (Ағбан), 3 орын - Дмитрий Бура (Саяногорск);
81 килограмм: 2 орын - Ефимов Никита (Харатас), 3 орын -Артур Белозеров паза Максим Побызаков (ікізі Ағбаннаң);
91 килограммға теере: 1 орын - Андрей Костенко (Харатас).
Мында Хакасияның на спортсменнері кӧзіділчелер.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы