КӦНІ СУРЫҒЛАРҒА - КӦНІ НАНДЫРЫҒЛАР
22.11.2019
Хабарлар
Кӧні палғалыс. 20 ноябрьда Хакасия пазы Валентин Коновалов пастағызын на республика чуртағӌыларынаң улуғ палғалысха сыхты. Кӧні палғалыс Н.Г.Доможаковтың адынаң национальнай библиотеканың залында ирткен
ХАЙДАF ДАА УЛУҒ ПАСТЫХТЫҢ ТОҒЫЗЫН ЧАРЫДАРЫ - ОЛ УҒАА НАНДЫРЫҒЛЫҒ ТОҒЫС. МЫНДА ХАЙДАҒ ДАА САҒЫСТЫ, АНЫ ЧООХТАНҒАН КІЗІНІҢ КӦНІ КӦРІЗІН САЙБАБИН, ЧИТІРЕРІ КИРЕКТЕЛЧЕ. АННАҢАР, ХАКАСИЯ ПАЗЫ ВАЛЕНТИН КОНОВАЛОВТЫҢ КӦНІ ПАЛҒАЛЫЗЫН ЧАРЫДЫП, ПУ ХАБАРНЫ «КӦНІ СУРЫҒЛАРҒА СЫН НАНДЫРЫҒЛАР» ТІП АДАП САЛҒАБЫС. ХАЙДИ ПІС КӦРЧЕБІС, ВАЛЕНТИН ОЛЕГОВИЧ ЧОНҒА ЧАҒЫН ПОЛАРҒА КӰСТЕНЧЕ, ИТСЕ, ОППОНЕНТТЕРІ АНЫҢ ПУ КӰСТЕНІЗІН САЛА ПАСХА САРИНЗАР АЙЛАНДЫРАРҒА КӰСТЕНЧЕЛЕР. ЧЕ РЕСПУБЛИКА ПАЗЫ, ПУ ОРЫНДА ПІР ЧЫЛ ТОҒЫН САЛЫП, НОҒА АЗЫХ ЧООХТАЗЫҒА КӦНІ ПАЛҒАЛЫСЧА СЫХХАНЫНАҢАР НАНДЫРИИНДА «МИНІ ЫРА-ЧАРА ТАРТ ПОЛБАССЫҢ» ТЕЕН.
КӦНІ ПАЛҒАЛЫС ӰЛГӰНІ ПАЗА ЧОННЫ ЧАҒЫННАТЧА
Сынап таа, кӧні палғалыс тузында «хатығ» сурығлар пирілген дее полза, ол оларға сын паза кӧні нандырығ пирерге кӱстенген. Кӧзідімге, чал ахчазынаңар алай Наа чыл алнындағы премиялардаңар. Ундутпааннар хабарҷылар Валентин Олеговичтің табығ кампаниязы тузындағы молҷағларын толдырчатханнаңар сурарға. Че чонны аннаң пасха постарының чал ахчазының ӧзізі, чурт-коммунальнай хоных сурығлары, чоллар, имнег кирее, экологияа ниме-ноо сығарызының теелізі сағыссыратчаттыр.
Кӧні палғалысты РТС, youtube телеканалларда паза Хакасия пазы Валентин Коноваловтың социальнай сетьтердегі аккаунттарында кӧрерге чарир полған.
Аны РТС телеканалның ведущайы Эдуард Иванов паза «Абакан 24» телеканалның хабарҷызы Алексей Кириченко апарғаннар.
Кӧні палғалыстың модераторы Хакасия пазы администрациязының пресс-служба паза искіріг управлениезінің пастығы Ирина Емельянова полған. Залда республиканың прай министерство кізілері, газета-телевидение устағҷылары паза хабарҷылар одырғаннар, видеопалғалыста, тізең, город-аймахтар пастары кӧні палғалыстың пасталарын сағааннар. Прайзы 19.00 часха тимде полған.
Чоохтирға кирек, республика пазына сурығлар азынада чыылған, тиксі алза, пір муң азыра айланыс Хакасиядаң ла нимес, ідӧк Тувадаң, Хызылчар крайынаң, Иркутск паза Новосибирск областьтарынаң кіртір. Сурығлар ЖКХ-ға, политикаа, чал ахчазына, чолларға, имнег киреене паза пасха илееде сурыға теелгеннер. Администрация прай сурығларны кӧстегліг министерство-ведомстволарға читірерге молҷаан. Ведущайлар постарынаң таныстырған соонаң кӧрігділерзер Хакасия пазы Валентин Коновалов сыххан. Ол чыылған чоннаң паза кӧрігҷілернең изеннескен соонаң Эдуард Иванов ағаа пастағы сурығны пирген: «Ноға мындағ оңдайнаң азых чоохтазыға сығарға чаратхазар?»
- Чоннаң чоохтазығ мағаа наа ниме нимес. Пастағы кӱннең сығара палғалыс ӱзілбинче. Город-аймахтарда тоғазығлар иртірчем, алында тоғасчамох. График хатығ даа полза, мин кізілернең тоғазарға тус таапчам. Соцсетьтерде айланыстар тӧреміл юрче. Мин оларны, маң тус табылзох, кӧрчем. Мындағ оңдайнаң палғалысха пастағызынна сыхчам. Сағынчам, ол орта оңдай. Ниме дее полза, мині ыра-чара тарт полбассың. Мындағ кӧні палғалыс кӧп кізінең палғалызар оңдай пирче, ағаа хоза ол пістің министерстволарның чоннаң, оларның сидіксіністерінең тоғыстарын айнытча. Андағ оңдайнаң ӱлгӱ чонға азых, - нандырған Валентин Олегович.
МОЛҶАҒЛАР ТОЛДЫРЫЛЧА
Алексей Кириченко суриин республика пазының тоғызына оппоненттернің хайиинаң палғалыстырған.
- Сынында мин оппоненттерге алғызым читірчем, - теен Валентин Коновалов. - Ӱлгӱнің тоғызын ӱзӱрерге кирек, ӱлгӱ азых, чазырдаң ниме чоғыл. Мин чахсыны хомайға, «ах нимені» «хараа» айландырчатханына кӧнік парғам. Че, андағ даа полза, хабарҷыларны тоғыстағы киктелерге тудынарға хығырчам. Молҷағлардаңар чоохтаза, пістің партиянаң пірге тимнелген программа полған. Анда таныхталған сурығларны толдырарға кӱстенчебіс, ӧӧн тиріг - Хакасияның тиліс стратегиязы. Пілдістіг, оларны пір чылға толдыр полбассың, ол асхынах тус, че, андағ даа полза, кӧп ниме иділ парған...
БЮДЖЕТ ПАЗА ХАБАЗЫҒ СУРЫҒЛАРЫ
Пӱӱнгі кӱнде Хакасияның 2020 чылға паза кӧрілчеткен 2021-2022 чылларға республика бюджедінеңер закон проекті парламент холында, депутаттар азых ӱзӱріглер иртірібіскеннер, чағынғы сессияда аны пастағы хығырығда ӱзӱрерлер. Хакасия пазы Валентин Коновалов ағаа хомай нимес паалағ пирчетсе, аның орынҷызы Ирина Войнова пу бюджетті АМБИЦИОЗНАЙ санапча. Ноға? Пу сурыға ол кӧні палғалыста нандырығ пирген:
- 2020 чылда піс федеральнай кіннең 12 миллиард тартып аларға пӧгінчебіс, ол пу чылдағызынаң 2 миллиардха кӧп. Нацпроекттерде - 6 миллиард салковай, ол пӱӱлгізінең 1 миллиардха кӧп! Чоохтирға кирек, Хакасия нацпроекттерні чуртасха кирчеткен иң чахсы регионнар санында! Пу тоғыста муниципальнай пӱдістерге хайди даа алғыс читірерге кирек, олар проект-смета пічіктерін тузында тимнеп салчалар. Пу ла кӧзідіглерні санға алза, бюджетті амбициознай санирға чарир!
Хабарҷылар Москвада чыылысхан комиссияның чарадиин пілерге хынғаннар. Валентин Коноваловтың таниинаң, 2019 чыл тооза республика федеральнай кінзер хабазығ сурап айланған. Пу наада чыылысхан комиссия чарадиинаң Хакасия бюджедінзер ноябрьда 400 азыра миллион салковай кірер, чыл тоозылғанда - 1,5 миллиардча.
Ахча хайызығлары ідӧк Хакасия правительствозының паза Ағбан город устағ-пастааның талазығларына сылтағ полчатханы хабарларда тӧреміл таныхталча. Сынында кирек хайди полчатханын пілерге хынған Хакасияның журналисттер пірігізінің кнезі Ольга Ширковец. Валентин Коновалов таа, Ағбан город пазының тоғызын толдырчатхан Владимир Жуковский дее ӱлгӱ органнарының пілісчеткенін таныхтааннар. Анзын ідӧк пӱӱл ноябрьда Москвада «Хорғыс чох паза чахсы чоллар» нацпроект хоостыра хоза ӱлестірілген ахчадаң республикаа пирілчеткен 233 миллион салковайны прай Ағбан город чолларына позыдардаңар чарадығ киречілепче. Владимир Жуковскийнің искіриинең, ахча Пушкин орамазын Некрасовтаң пасти Жуковтың орамазына теере паза Павших коммунаров орамазын Хлебнайдаң Нагорнайға теере тиксі тыхтирына позыдылар.
ААЛЛАРҒА ЧОЛЛАР КИРЕГӦК
«Хабар» газетаның хабарҷызы Наталья Субракова Хакасия пазын ааллар аразындағы чолларға хайығ айландырарға сурынған. Нацпроект хоостыра Ағбан-Харатас агломерациязына улуғ хайығ айландырылча нооза. Ыраххы аалларзар чоллар, тізең, хайығ чох халчалар, кӧзідімге Асхыс аймаандағы Ӱс чул - Илимор паза Казанов - Аңдыл чон чоллар хаҷанох тиксі тыхтағ тоғызын кирексіпчелер. Хакасия пазының таниинаң, ол ӧӧнінде аймахтар нандырчатхан чоллар. Олар чол чыындызынаң пирілген ахчаны пос хынғанни хоратчаттырлар. Андағ даа полза, Хакасия пазы пу чолларны республиканың транспорт паза чол хонии министерствозына алында хайығда тударға чахаан.
Чоллар ідӧк Харатас городтың, Зеленай аалның, Тепличнай посёлоктың чуртағҷыларын сағыссыратчалар, уламох льготалар хоостыра чир участоктары пирілген орыннарда.
ХАБАЗЫҒ КИРЕК, ЧЕ ОҢДАЙ ЧОҒЫЛ
Хакасия казначейство хайиина кір парғаннаңар, ӱлгӱлернің холлары палғалых. Россияның финанстар министерствозынаң чӧптезіг хоостыра республиканың чуртағҷыларға хоза льготалар кирдең оңдай чоғыл. Чоох парча палаа 3 часха теере кӧрілген пособиені, пасталығ класстарның ӱгренҷілерін тикке азырирын паза даа пасха хабазығларны кирердеңер.
ЧУРТАС ОҢДАЙЛАРЫ АЛЫСПААН, ЧАЛ АХЧАЗЫ ЛА
Ӏди тиирге чарир Хакасия пазының пос чуртазынаңар сурығларға нандырии хоостыра. Хайдағ квартирада Хакасия пазы Валентин Коновалов чуртапча? Хайдағ машиналығ чӧрче? Чал ахчазы хай син? Пу паза пасха сурығларны хабарҷылар ла нимес, чуртағҷылар даа пиргеннер.
Чуртапча республика пазы олох квартирада, чӧрче олох машиназынаң. Ағаа хоза сӧбіреде пір ле машина, пірее хаҷан паза пір машина аларбыс ла сағынчам теен Валентин Олегович. Чоохтирға кирек, сӧбіре ӱс пала ӧскірче. Чал ахчазын даа Валентин Олегович чазырбаан. Пастағы айда ол 90 муң салковайға тиңнелген полза, амды 200 муңа чит парчаттыр. Наа чылны ибде сӧбірезінең паза арғыстарынаң хада таныхтирға пӧгінче.
СУРЫҒЛАР - АННАҢ-МЫННАҢ
Видеосурығлар даа, эфир тузында пирілген сурығлар даа аннаң-мыннаң пирілгеннер. Ағбан город чуртағҷылары иң ӧткін араласханнар, аннаң пасха Харатастаң, Саяногорсктаң, Асхыс, Пии, Шира, Орджоникидзе аймахтарынаң сурығлар пирілгеннер. Кӧні палғалыста телефонҷа палғалыс читпеен, неке. Итсе, палғалысчаң оңдайлар ӧӧнінде Интернетті кирексееннер, республикада, тізең, прай ла аалларда мобильнай Интернет чоғыл. Пу пастағы кӧні палғалыс полчатханнаңар, пазағы палғалыста читпестер санға алылар тіп ізенчебіс.
ПИРІЛБЕЕН СУРЫҒЛАР
Тиксі сурығларны кӧрзе, Валентин Коноваловха республика пазына табылғаннаң сығара хазна ӧдізінҷе сурығлар пирілҷең. Аннаңар пу сурығ кӧдірілбеенде, правительство пу сурығҷа хайди тоғынчатханы пілдістіг нимес. Хакас чонына кӧні теелчеткен пір сурығ даа пирілбеен. Таң олар чох полғаннар, таң эфирге сығарылбааннар алай сағыссыратчатхан пір дее сурығ чоғыл ба? Піс экология суриина теелбеебіс, че сурығ полған, республика пазы ағаа нандырығ пирген, ол алындағы нандырығлардаң пасхалалбинча («Хабар» газетаа паза «Интерфаксха» пирген интервьюларда).
Автор :
Наталья СУБРАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы