ЧЫЛЫҒ ПИРӋЕҢ ТУСТЫҢ СИДІКСІНІСТЕРІ
26.11.2019
Хабарлар
Чыылығ. Хакасияның правительство туразында город-аймахтарның хысхаа тимненіс суриина чарыдылған селектор чыылии ирткен
Чыылығда республика пазы Валентин Коновалов, пӱдіріг паза чурт-коммунальнай хоных министрі Сергей Новиков, финанстар министрі Ирина Войнова, Ростехнадзор, МЧС, прокуратура кізілері, город-аймахтарның пастары араласханнар.
Сергей Новиков город-аалларда чылығ пирӌең тусха котельнайларның тимненізінеңер, хара тас чыындызынаңар паза хайдағ город-аймахтарда нинӌе тимненіс паспорты пиріл парғаннаңар искірген. Амғы туста Сорығ городта ӧӧн котельнайның 4-ӌі хазаны, Приисковайда резерв оборудованиезі, Тӧӧ пазында хазан ам даа тыхталчалар. Чылығ пирӌең тусха Тӧӧ пазы посёлок 85 % тимде. Тепличнайдағы котельнайда наа хазан турғызылған, амды ол хайди тоғынчатханы сыныхталча.
Министрнің чооғынаң, хай пірее аймахтарда хара тас чыындызы нинӌе-де ле кӱнге чидер. Бородино аалда хара тас 5 кӱнге чидер, Ширада - 3 ле кӱнге, Жемчужнайда - 5 кӱнге, Тойымда - 6 кӱнге, Коммунарда - 6 кӱнге.
Тимненіс паспорттарын Боград паза Таштып аймахтары алып алғаннар. Пасха город-аймахтарда читіре ал полбааннар. Ирткен чылларда Боград аймаа ол паспорттарны хаӌан даа прай ал полбаӌаң. Аймах пазы алыс парғанда, пу кирек чахсы саринзар алыс парған. Алтай аймаанда 7 объекттең 5-і алып алған, Асхыс аймаанда 7-дең - 4. Пии аймаанда Кирбі аал чӧбіне паспорт пирілбеен. Орджоникидзе аймаа 3 тимненіс паспортын алар орнына 2 алған. Приисковай аал чӧбіне пирілбеен. Ағбан пилтірі аймаанда 8 паспорттаң 5-і пирілген. Шира аймаанда аны аларынӌа кирек иң хомай. Анда 7-дең ікізі ле пирілген.
Сергей Новиковтың чооғынаң, чылығ, суғ пирӌең предприятиелерні сыныхтирынӌа ӧнетін тоғысчы ӧме тӧстелген. Амды пастағы салтарлар идер тус чит килген. Алтай аймаанда «Прогресс» предприятие хара тасты кӧрілген синінең кӧп хоратчатханы ілезіне сығысхан. План хоостыра 2018 чылда 5700 тонна хара тас тузаланар орнына 11000 тонна хорадылған. Специалисттер сыныхтааннарында, оборудование иргілен парғанын ілезіне сығарғаннар.
Пии аймаанда «Тимірчолӌы» паза «Тепло-ресурс» предприятиелерні сыныхтаанда, кирек пічіктер табылбаан. «Теплоресурс» 2900 тонна хара тас хорадар орнына 4100 тонна тузаланыбысхан. Ағаа хоза, аймахта хара тас тартарының паазы уғаа пӧзік. Предприятие тоннаны пір километр ағылдырған ӱчӱн 11 салковай 18 ахча тӧлепче. Мындағ кирек полбас ӱчӱн, Хакасияның пӱдіріг паза чурт-коммунальнай хоных министерствозы хара тасты ниик паанан тартчатхан предприятиелердеңер чоохтап пирген. Таштып аймаанда «Возрождение» предприятие 1800 тонна хара тастың орнына 2400 тонна тузаланыбысхан.
Пір неделяа Хакасияның пӱдіріг паза ЖКХ министерствозынзар чуртағӌылардаң 32 айланыс кірген, Ағбаннаң - 13 айланыс, Харатастаң - 15, Саяногорск, Сорығ городтардаң, Асхыс посёлоктаң, Таштыптаң - пірер айланыс. Чуртағӌыларның кӧбізі чылығ читіре пирілбинчеткеніне хоптанған. Тӧӧ пазы поселоктағы котельнайда тыхтағ тоғыстары апарылчатханда, квартираларда ікі кӱн соох полған.
Ирина Войнова город-аймахтар пастарына хара тас ӱчӱн хоза дотациялар аарлығ паанаң тартчатхан аймахтарға пирілбес тіп чоохтаан. Андағларның санында Шира аймаа.
- Город-аймахтар пастарына хара тас тартарынӌа сурығны пӧгібізерге чахыпчам. Орджоникидзе аймаа хара тасты ширадағылардаң ниикке алча. Аны аларынӌа паза тартарынӌа сурығны чыл пасталғандох пӧгерге кирек полған. Ноға пу тоғыс толдырылбаан? Аннаңар оңдай хайди табарын сағыныңар. Ниик паанаң тартчатхан предприятиелернең чӧптезіг идіңер, - таныхтаан Валентин Коновалов.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы