МИРГЕН АТЫҒҶЫЛАР
28.01.2020
Хабарлар
Марығ. 24 январьда Россия Матыры, гвардияның улуғ лейтенанты Игорь Ахпашевтің адын ал чӧрчеткен Ағбандағы 1 № ортымах школада ӱгренҷілер аразында таңма атарынҷа республика марии ирткен
Россия Матыры Игорь Ахпашевтін хумартхызына чарыдылған аймах марығлар иртірері пістің республикада хаҷаннаң кибірге кір парған. Пӱӱл ол арға-мӧрійлерні уламох пӧзік синде иртірерге харасчалар. Анзы тиктең нимес. Махачы чир-суғҷыбыстың пайрамнығ тӧреен кӱні - 50 чазы - таныхталча нооза.
- Нинҷе-де ле чыл мының алнында Игорь пістің школаның коридорынңа ачых-чарых кӧңніліг чӧрҷең. Тузы читкенде, хазна чахиин толдырып, чиит чуртазын пир салған, - харах частары арали чоохтанчалар Россия Матырын ӱгреткен улуғ частығ ӱгретчілер.
Игорь Ахпашевтің хумартхызына чарыдылған арға-мӧрійні пайрам кибірли азарында кӧп кізі араласхан. Россия ДОСААФ-ының Хакасиядағы пӧлиинің кнес орынҷызы, подполковник Сергей Горбатенко марығда аралазарға килген ӱгренҷілерзер чалыннығ сӧстернең айланған, махачы чир-суғҷыбыстын чуртазы прайзына чахсы кӧзідім ползын теен. Ағбандағы ДЮСШ директоры Александр Павловский Россия Матыры Игорь Ахпашев кічігдең сығара спортнаң нанҷыласханын, пик хазыхтығ поларға харасханын таныхтаан, ӱгренҷілерні ағаа кӧӧгерге, хазых чуртасха тартыларға хығырған.
Арға-мӧрійнің ӧӧн чарғыҷызына Анатолий Ушаков турғызылтыр. Анатолий Николаевичтің сӧстерінең, Россия Матыры Игорь Ахпашевтің хумартхызына чарыдылған марығда аралазарға прай 16 команда килтір. Пір командада ікі хыс паза ікі оол.
Ол туста Асхыс аймаандағы Чоғархы Асхыс аалдағы школадаң килген атығҷылар командазының устағҷызы Виктор Тодиновнаң чоохтасчатхабыс. Виктор Степанович, ӱгретчі-тренер, улуғ нимес хомзынызынаң ӱлескен: ирткен чылларда таңма атар марығларда сыбыра аралас турғаннар, сыйыхтығ орыннар алҷан ӱгренңілері 2019 чылда школа тоозыбыстырлар. Аннаңар пеер ол чиит команда ағылтыр. Че аның араласчылары санында хомай нимес атчатхан оолағастар даа, хызыҷағастар даа пар осхас. Іди, Асхыс аймаандағы Ус чул аалда чуртаан чааҷы-интернационалист Анатолий Бурнаковтың хумартхызына чарыдылған марығда аралазып, Аймир Кичеев тее, Эдил Давлетов таа, Аима Амзаракова даа сыбыра маңат тимненіс кӧзітчелер, сыйых чох халбинчалар. Амды пу ӱзӧлеңе Айсели Сунчугашева хозылыбыстыр. Піреезі хайди даа маңат тимненіс кӧзідеріне ізенче Виктор Тодинов.
Піс піди чоохтасчатханыбысты ис салған чіли, марығның ӧӧн чарғыҷызы Анатолий Ушаков прайзын сизіндірче: пӱӱлгі арға-мӧрійде сыйыхтығ орынға сығып аларға уғаа сидік полар. Пеер таңма атарға Таштып аймаандағы Ибіг аалның уғаа кӱстіг команда килгенін таныхтапча. Командаа кірчеткен Катя Миягашева, Россия мариинда аралазып, сыйыхтығ орынға сыхтыр.
Андағ сӧстерні истіп, ӱгренҷілер кӧгліг суулаза тӱскеннер. Оолағастарнын піреезі, хормачыланып, ибзер тизерге тимненібістір, хызыҷахха утыр салзам, хызыл уйат полар тидір. Пасхазы уламох ӧрінісклепче, Катя Миягашеваны утып аларға матап кӱстенербіс тіпчелер.
Катя Миягашеваа таңма атарға ӧнетін тимнелген тирде орта полғам. Итсе, пастап Иван Васильевич Карамашевке тоғас парғам. Ипти ле чоохтас турчатханыбыста, Иван Васильевичті марығның ӧӧн чарғыҷызы хығырыбысхан. Нандыра айланзам, Катянаң таныстырарбын тіп чіде халғанда, хыримда оолағас тохтабысхан. Пістің чооғыбысты искен осхас, амох Катяны ағыларбын тіпче.
Чиде салдылар. Ортымах сыннығ хызыхах полтыр. Аны кӧріп, сах андох танып салғам. 2019 чылда ол, Хакасияның піріктірілген командазына кіріп, ГТО комплексінің нормативтерін толдырарға Сочизер чӧр килген, анда Россия мариинда араласхан. Теория сурығларына нандырып, тиң частығлар аразында пастағы орын алған. Таңма атарында араластырох, че хайдағ орын алғанын искірбиндірлер.
Че хайдағ даа арға-мӧрій тузында прайзы чиңіс тударға кӱстенче. Ирткен тустағы чидіглер санға алылбинчалар. Аннаңар Россия Матыры Игорь Ахпашевтің хумартхызына чарыдылған арға-мӧрій тузында кем прайзынаң артых чичең атығҷы полыбызарын марығ араласчылары чидікпин сағыпчатханнар. Полғаны ла позының кӧзідімнерін пілче нооза.
Оолағастар аразында Асхыс аймаандағы Палыхтығ суғ аалдаң килген Егор Цыбульский утханы искірілген. Хызыҷахтар аразында марығ ээзі Анна Лихачева чиңіс тутханы чарлалған.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы