Хығыртығлар даа, ағырчатханнар даа саны тӱсче
04.01.2021
Хабарлар
Хакасия пазы Валентин Коноваловтың устаанынаң 2021 чылның кӱрген айының 4-ҷi кӱнiнде оперативнай штабтың теестегi чыылии ирттi.
Республика пазының орынҷызы Юрий Курлаев пу кӱннернiң саннарынаң таныстырған. Ирткен суткада коронавирусты 95 кiзi хаптырғаны iлезiне сығарылған, алындағы суткада – 98. Тиксi алза, ағырығны хаптырып алғаннар саны 17988 кiзее чит парған. 2866 кiзi имнег иртче. Ағырыбысханнарнаң хада палғалысхан 4016 кiзi саналча. Ирткен суткада наа ағырыға 479 хати тест алылған. 45 кiзi оңдайланып алған, тиксi – 15689 кiзi. Ирткен суткада пiрдеезi ӱребеен. Тымо пасталғаннаң, республикада пу ағырығнаң 259 кiзi ӱреенi санға алылған. Имнег орыннарын алза, коронавирустаң имнирiне кӧрiлген 1290 орыннаң 372-зi пос. Пӱӱнгi кӱнге ол син пос орын читкiҷе. Аннаң пасха имнег полызиина айланыстар саны хызырыл парған. Юрий Курлаевтiң таниинаң, имнег полызии тӱзiмнiг читiрiлче, ағырчатханнар саны хызырыл парғанда, айланыстар даа саны син парған. Че андағ даа полза, республика пазы Валентин Коновалов пос салынмасха сурынған паза тоғыс кӱннерi пасталыбысса, ағырчатханнар саны кинетiн ӧзерiне тимде поларға чахаан.
Хакасияның хазых хайраллаҷаң министрi тоғызын толдырчатхан Олег Ананьевскийнiң искiриинең, кiзiлер тынағ кӱннерiнде ағырзалар даа имнег туразынзар айланминчатханнаңар, тесттер алылчатханы синген. ОРВИ кӧзiдiглерiнең айланчатханнар саны асхынах. Тиксi алза, пӱӱнгi кӱнге теере сағыбаан киректер санға алылбаан, тоғыс тӱзiмнiг парча. Имнер iдӧк читкiҷе ӱлел парғаннаңар искiрiлген.
2020 чылның халғанҷы кӱннерiнде Хакасиязар коронавирустаң вакцина читiрiлген. Аны 220 кiзее турғызарға маңнанғаннар, ол санда 61 кiзi прививканың iкi чардығын турғыстырыбысхан. 2021 чылның кӱрген айында республикада 25 муң кiзее турғызылары кӧрiлче. Че хаҷан ол республиказар читiрiлер, сағам пiлдiзi чоғыл.
Ағбан, Харатас паза Саяногорск городтардағы табырах имнег полызии службаларынзар айланыстар кӧп кiрбеен. Бригадаларға 9-11 айланыс килiс турған. Иң кӧп хығыртығ кӱрген айының 1-2 кӱннерiне килiскен. Ағбандағы табырах имнег полызии служба устағҷызы Айвар Кольчиковтың искiриинең, айланыстарның ӧӧн сылтаа – ачығ суғ iскен сылтаанда алған палығлар паза iстi ағырығлары «усхунғаны».
Хакасия пазы Валентин Коновалов хазых чуртас апарарының тузазынаңар искiрiглiг тоғысты газета-телевидениеҷе паза социальнай сетьтерҷе ӧткiн апарарға киректелчеткенiн таныхтаан. Паза тоғыс кӱннерi пасталыбысса, тынағ кӱннерiнде имненерге маңнанмаан чуртағҷыларның имнег тураларынзар айланарына тимде поларға киректелчеткенiне хатап хайығ айландырған. Ол тусты амыр ирте халар ӱчӱн, хазых хайраллаҷаң министерстваа тоғыс планын тимнирге чахаан.
Регионнаң устаҷаң кiн устағҷызы Максим Лукониннiң искiриинең, чуртағҷыларның улуғ хоптар чоғыл. Прай санға алылған хоптарҷа тоғыс апарылча. Кӧбiзiне нандырығ пирiлген. Сала тирең iстезiгнi Харатастаң Александр Лебедьтiң адынаң кiн тоғынҷыларын МРОТ-ха кир салғаны киректепче. Валентин Олеговичтiң кӧрiзiнең, тоғынҷыларны имнег киреене тартчаң оңдай пар.
Автор :
Наталья Субракова
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы