ПӰДІРІГ НИМЕ-НООЗЫНА ПААЛАР САҒЫССЫРАТЧА
18.06.2021
Хабарлар
Пресс-конференция. Хакасия правительствозы пӱдіріг ниме-ноозына паалар ӧсчеткені сылтаанда, нацпроекттерні чуртасха киреріне хорғыс сығызарынаңар сағыссырапча
Нименең палғалыстығ ол сағыссырас чарыт пирген Хакасия пазының паза Хакасия правительствозы аппарадының устағӌы орынӌызы тоғызын толдырчатхан Игорь Ефремов. Аның искіриинең, ӧӧн пӱдіріг ниме-ноозына, хазна даа, регион даа синінде сығарылчатхан, паалар пілдірте ӧс парғаны таныхталча.
Хум (34% ӧзіс), ағас (34%), сай (118%), кірпис (20%) паза даа пасха ниме-ноо Хакасияда сығарылча, че оларға пааны ӧскірӌең сылтағ чоғыл тіп санапчалар ӱлгӱ органнарында. Аның ӱчӱн Хакасияның экономика тилізі министерствозының устағ-пастаа Хакасияӌа монополиядаң тоғыр федеральнай управление устағ-пастаанаң пу сурығӌа ӧнетін тоғазар. Иң пастағызын ӧзіс сылтаан ілезіне сығарарға паза аны тохтадар оңдай табарға кирек.
Нацпроекттерӌе пӱдіріглернің кӧбізінде 2020 чылның паалары салыл парған, пілдістіг, подрядчиктерні паалар ӧсчеткені сағыссыратча. Хайди ол пааларға тӧстенген сметаӌа пӱдіріге ахчаны читіріп аларға? Хакасия ӱлгӱлері ара кіріспеенде, сурығны пӧгіп аларға сидік полар.
Хакасия правительствозы июнь ай авансы 3 - 10 кӱнге соонаң тӧлелерінеңер бюджет тоғынӌыларын сизіндірче. Анзы ӱгретчілернің отпускка парчатханынаң палғалыстығ. Паза пір сылтағ 2017 чылда бюджет кредидін айландырарынӌа оңдайлар нииктелген сылтаанда пӱӱл 1 июльға теере 706 миллион салковайны кӧрілген тус алнынӌа айландырарға кирек. Пу алызығлар 2021 чылның республика бюджедінде санға алылғаннар. Республиканың финанстар министерствозы бюджетті толдырар пӧгіннең федеральнай кіннең дотацияларны азынада ыс пирерге сурыныснаң айланған паза налог тӧлепчеткен килкім предприятиелернең налог тӧлирінӌе чӧптезіглер апарча. Федеральнай синде дотацияны тӧлирдеңер чарадығ алылза, аванс тӧлелер тус пілдістіг полар.
Паза пір ағырсымнығ сурығ - республикада коронавирусты хаптырчатхан чуртағӌылар саны паза ағырығның тарапчатханы ӧсчеткені. Анннаңар республика ӱлгӱлері Харатастағы пала тапчаң тураны пазох коронавирустаң имнеӌең кінге айландырарға чаратхан.
- Харатастағы пала тапчаң тура пу тоғысты толдырарға тиктең не айландырылбады. Республикада план хоостыра имнег полызии читірілче. Кортген полызығларны піди ле чылдырыбыспассың. Харатас город Ағбан городтаң, хайда перинатальнай кін орныхча, 12 - 15 километр оортахта ла, ипчілерні читірерінҷе сидіксіністер чоғыл. Ағаа хоза пӱӱнгі кӱнде пасха даа имнег туралары пу тоғысты пазох пастирға тимделер. Коронавирустаң имнеҷең орыннарны тӧреміл хоза азарға килізер, ағырығ мыннаң мындар піди тараза, - чарытхан Игорь Григорьевич.
Сынап таа, ағырығ хатап наа кӱснең тарапчатханы чочындырча. Чуртағӌыларға пос салынмасха, ағырығнаң арачылапчатхан кирексіністерге тудынарға: иң пастағызын вакцина турғыстырарға, чон чӧрчеткен, чыылысчатхан орыннарда маска кизерге, антисептикнең тузаланарға - чӧптепчелер ӱлгӱдегілер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы