ПӰДІРІГ-ТЫХТАҒ ТОҒЫСТАРЫ ХЫЫЗЫНДА
01.10.2021
Хабарлар
Чоллар. «Хорғыс чох чахсы чоллар» нацпроектче республикада тоғыстар хайди толдырылчатханнаңар искірчебіс
Хакасияның транспорт паза чол хонии министерствозы искіриинең, республикада «Хорғыс чох чахсы чоллар» нацпроект чуртасха кирілче. Пӱӱл пу проектке Ағбан городта Пушкиннің орамазы паза город тастынҷа парчатхан чол (Крылов орамазы Итыгиннің орамазынаң сығара Молодежнайға теере) кирілген, Харатаста - тиксі тоғыс орама. Тиксі алза, нацпроекттің «Региондағы паза орындағы чоллар» регион проектінҷе 28 чолда пӱдіріг-тыхтағ тоғыстары толдырылча.
ХАРАТАСТА - ТОҒЫС ОРАМА
Харатасчылар городында Мир, Украинскай, Инициативнай, Чиңістің 30 чылы, Садовай, Чапаев, Энергетик, Боград орамаларында паза Космонавттар проспектінде пӱдіріг-тыхтағ тоғыстары толдырылча. Пу тоғысха 77 миллион 738 муң салковай кӧрілген. Ол ахчаа 8,34 километр чол нааҷылалар.
«Ресурс» ООО-наң тӧрт чӧптезіг иділген. Энергетиктер, Садовай паза Чапаев орамаларындағы чолларда тыхтағ тоғыстарын пастирға тимненчелер, Инициативнай орамада асфальт 2,2 километрде тӧзелче. Анаң подряд пірігізі пасха чолларны иптирінең айғазар.
«Альтаир» ПФК тоғыстарға сыданминчатханнаңар, аннаң чӧптезіг тохтадылған. Наа чӧптезігҷе тоғыстар тузында толдырылча.
Хакасияның транспорт паза чол хонии министерствозы неделя сай Харатас город устағ-пастаанаң хада штаб чыылиин иртірче, тоғыстарны сыныхтағда тутча куратор «ОКС» МКУ.
АҒБАННЫҢ ПУШКИН ОРАМАЗЫНДА...
Тоғыстар ам даа тоозылбаан, итсе, подряд пірігізі оларны 19 августха тоос саларға кирек полған. Тарас Шевченконың паза Маршал Жуковтың орамалары аразында Пушкиннің орамазын нааҷылирынңа тоғыстарны «Прогресс-М» ООО толдырча. Чол узуны - 0,385 километр. Пӱӱнгі кӱнге подряд пірігізі асфальт тӧзебіскен, амды чол хыриларын иптепче. Тоғыстарны тузында толдырбаан ӱчӱн подрядчикті пӱдіріг-тыхтағ тоғыстарының кураторы «Архоград» МКУ хатығласха тартар.
ЧОЛЛАРҒА - 897,7 МИЛЛИОН
Ол син ахча кӧріл парған 2021 чылға «Региондағы паза орындағы чоллар» регион проектінңе республика чолларын иптиріне. Оӧн чардығы - 533 миллион салковай - федеральнай бюджеттең пирілген, 345 миллион 834 муң салковай - республика бюджедінең, 18 миллион 894 муң салковай - орындағы бюджеттернің ахчазы.
Проектке региондағы 9 чол паза орындағы 19 чол кирілген, тиксі алза, пӱдіріг-тыхтағ тоғыстары 53,92 километрде апарылчалар, ол санда 34,07 километр - региондағы чоллар, 19,85 - орындағы.
Пӱӱнгі кӱнге тоғыстарға 445 миллион 770 муң салковай алай кӧрілген ахчаның 48 % позыдылған: федеральнай бюджеттең - 323 миллион 541 муң салковай алай 57 %, республика бюджедінең - 118 миллион 21 муң салковай алай 35 % паза орындағы бюджеттең - 4 миллион 208 муң салковай алай 21 %.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде