КӰРЕС - ӦӦН ХЫНЫЗЫ
17.11.2021
Хабарлар
Спорт. Хакасияда чахсы спортсменнер кӧп. Оларның санында 19 частығ Наталья Пудованы адирға кирек
Пӱӱл Наталья Пудова спорт кӱрезіне хынчатханнарны чидіглерінең ӧріндірче. Хакас хыс Россия первенствозында ӱзінҷі орынға сыххан, С.З.Карамчаковтың хумартхызына чарыдылған тиксі Россия мариинда командаа алтын медаль ағылған.
Чир-суғҷыбыс Асхыс аймаандағы Лырсы пилтірі аалдаң. Ол Ӱс чулдаң 4 километр оортах турча. Аалда ӱс ле тура. Оларның пірсінде Эдуард Степанович паза Светлана Александровна Пудовтар чуртапчалар. Ынағ ирепчінің 9 пала: пис оол паза тӧрт хыс. Наташа тӧртінҷізі. Кӱресчі хыс чоохтапча:
- Кирі пабам орыс кізі полған, аны хоостыра прайзыбыс Пудовтар полчабыс. Іӌемнің хыс фамилиязы - Амзаракова. Ол Тӧрт тас аалдаң. Постарыбысты хакастарға санапчабыс. Пастап Ӱс чулдағы школада ӱгренгем. 5-ҷі класс соонаң пабамнаң ічем мині Асхыстағы лицей-интернатсар ӱгренерге пирібіскеннер. Анда баскетбол секциязына пазын салғам. Че тӱрчедең ирістіг полыбысхан. Анаң олаңай кӱреске чӧрерге чаратхам. Туғаннарымның — аразында спортсменнер чоғыл. Анатолий аҷам пір туста бокснаң айғасхан, ідӧк Тимур харындазым грек-рим кӱрезі секциязына чӧрген.
Секцияда хынығ полған. Тренер Евгения Сергеевна Карамчакова пісті аймах микелерге ӱгретчең марығларда тӧреміл араластырӌаң. Пастағы марыға Кызлассар чӧргенімні оңнапчам. Ол туста 6-ӌы класста ӱгренчеткем. Андада ікінӌі орынға сыххам. Анаң Евгения Сергеевна Таштыпсар, Ағбанзар ал чӧрген. 9 класс тоосханҷа республика синінде чиңіс тударға, Сибирьдегі федеральнай округтың первенствозында аралазарға маңнанғам. Сибирь мариинда, ӱзінҷі орын ӱчӱн харбазып, утыр салғам.
9-ҷы класс соонаң Наташа имнег колледжінде ӱгренерге сағынтыр. Че тренері Е.С. Карамчакова Ағбаңдағы олимп резерві училищезінзер кірерге чӧп пирген. Ӧӧн сылтағ - кӱреснең айғазар оңдай полары. Ағбанда спортсмен Россияның саблығ тренері Марат Семёнович Кичеевтің холыңда узын таптапча. Кӱнде тренировкалар ікі хати иртчелер. Иртенгі тренировка пір час чарым парчаттыр, иирдегізі - ікі часча. Чечіме кӱнде хыстар иртен не чыылысчалар, позырахта тынанчалар. Чир-суғҷыбыстың чооғынаң, ағаа ӱгренерге дее, харбазарға даа тус читче.
Марат Семёнович ӱгренҷілерінең матап айғасча. Ағаа хоза Наташа Пудова Интернетте «ыырҷыларының» кӱрезінең танысча. Хыстар, постарының харбасчатханын видеоға суурып, алҷаастарын ӱзӱрчелер. Спортсмен чооғын узаратча:
- Пылтыр пандемия ӱчӱн марығлар полбаан даа. Пӱӱл салтарлар хомай нимес. Россия чииттері спартакиадазының ікінҷі чардығында чиңіс тутхам. Марығ Хызылчарда майда ирткен. Піс, Сибирьдегі федераральнай округтың командазына кіріп, финалда араласхабыс, хайзы Новочебоксарскта полған. Анда Венера Нафикованаң паза Полина Лукинанаң харбазарға ӱлӱс тӱскен. Олар кӱстіг спортсменнер.
Лукина пӱӱл Европа первенствозында чиңіс тутхан, Нафикова - кӱмӱс призер. Хыстарға утырып, сыйыхтығ орынға сых полбаам. Кӱстіг спортсменнең харбасханы - чахсы опыт, кізінің узы ӧсче.
Амды хакас хыстың ӧӧн пӧгіні - Россияның спорт узы нормативін толдырыбызарға. С.З.Карамчаковтың хумартхызына чарыдылған тиксі Россия мариинда чиңіс тутхан спортсменнер пу аарластығ атха турысчалар, че араласчылар 13 регионнаң поларға киректер.
Пӱӱл, тізең, турнирде чон 12 регионнаң на полды. Чир-суғҷыбыс «чыл тоозылғанҷа кирек килізер тіп ізенче. Пу неделяда ол ӧӧрелерінең хада Россия первенствозында аралазар. Марығ 20 - 22 ноябрьда Татарстандағы Мамадыш городта иртер. Анда 2002 - 2004 чылларда тӧреен хыстар кӱстерін сынирлар. Ідӧк Наташа Пудова В.И.Чарковтың хумартхызына чарыдылған марығда паза Брайко харындастарның сыйыхтарына тиксі Россия турнирінде аралазарға пӧгінче. Марығлар декабрьда иртерлер.
Чир-суғҷыбыс Ағбандағы олимп резерві училищезінде 4-ҷі курста ӱгренче. 2022 чылда ол ӱгредиин тоос салар. Аннаң андар хакас хыс вузта пілізін алғыдарға сағынча. Аның кӧңніне спорт психологы профессия кірчеттір. Пу специальностьха Хызылчарда ӱгретчелер. Кирек киліссе, Наташа хонҷых регионзар ӱгренерге парыбызар. Чооғының халғанҷызынзар спортсмен таныхтаан:
- Сынында сағыстар кӧп. Мин пір ниме чахсы пілчем: амғы туста кӱрес - ӧӧн хынызым. Позырахта, тренировкалар чох, ниме идерін пілбинібісчем. Спорт мағаа кӧп ӧрініс ағылча.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде