ЧОРЫХЧЫЛАРҒА - ЛЬГОТАЛЫҒ ПРОГРАММА
22.12.2021
Хабарлар
Туризм. Россияҷа чорыхтарға чӧрчеткеннерге пазағы чылда туризм кэшбэгі программаӌа путевка паазының 20%-ін айландырып аларға чарир
Ростуризм чорыхчыларға туризм кэшбэгі программаны узаратча. Чорыхтарға чӧрерге хынчатхан улусха пу программаҷа путевка паазының паза гостиницада чуртаан ӱчӱн тӧлеглернің 20 %-ін айландыр пирерлер. Россияҷа льготалығ оңдайда килер чылда 18 январьдаң 30 апрельге теере чорыхтарға чӧрерге чарир.
Путевка ӱчӱн «Мир» картанаң тӧлирге киректелче. Че аны пурун privetmir.ru/russiatravel сайтта бонустығ программада санға турғыс саларға кирек. Чорых ікі суткадаң асхынах полбазын. Пір картанаң нинҷе-де тур чахирға паза тӧлирге чарир, кэшбэк полған на путевка ӱчӱн пирілер.
Туроператорлар паза отельлер пу чӧрімге ам на тимненіп пастабыстылар, аннаңар мирпутешествий.рф сайтсар 18 январьдаң на кірерге кирек. Путевка ӱчӱн пуох кӱннең тӧлеп пастирға, туризм кэшбэгі программа 30 апрельге теере кӱзінде полар. Путевка ӱчӱн ахчаны пу программада кӧрілген не туста тӧлирге кирек. Аннаң ирте алай орай тӧлел парза, кэшбэк саналбас.
Кэшбэкче ахча 20000 салковайға теере айландырылча. Че билеттерні паза турларны программаның партнер-араласчыларының на (отельлер, туроператорлар, агрегаторлар) сайттарында садызарға кирек.
Программа тынанып таа аларға, ідӧк тоғыс чорығында ӱзӱрлеп аларға оңдай пирче. Ағбан чуртағҷызы Елена Михееваның чооғынаң, пӱӱл майда Москвада тоғыс чорығы тузында гостиницада чуртаан ӱчӱн тӧлегҷе кэшбэк айландыр пиргеннер.
Чорыхчыларға хазнадағы ноо даа регионда тынанып аларға чарир. Ол санда Хакасияның чапсых орыннарында. Турист-искірігліг кінде чӧп пирчелер, хысхыда Хакасиядағы тағ индіре чыларында тынағ комплекстерінде: «Гладенькая» тағ индіре чыларынҷа ӧӧн курорт, «Нымырттығ хол» паза «Сюгеш» комплекстер, «Приисковай» курорт, «Хан тигір алты» тағлығ алғым чир, «Ирт тағ» клуб.
«Гладенькая» - республиканың тағ индіре чыларынҷа ӧӧн курорты. Ағаа чоннар аразындағы марығларны иртірерге сертификат пирілген. Чоғархы трассазы индіре табырах чыларына паза слаломға кӧрілген, индіркізі - чыларға ӱгредеріне. Индіре тохтағ чох чылҷаң чолның узуны - 3500 метр. Курортта декабрьдаң майға теере чыларға чарир. Анда аалҷыларны чуртадарға 4 чылтыстығ отель, гостиница комплексі паза тураҷахтар пар.
«Нымырттығ хол» - тағ индіре чыларынҷа наа комплекс. Анда тағ индіре чыларынҷа ікі трасса пар. Трассаларда канат-креслолығ подъемник тоғынча. Прокат, кафе тоғынчалар. Наа комплекснең хости орныхча бассейнніг, пустығ, отельліг физкультура-спорт комплексі.
«Сюгеш» - сӧбіренең тынанарға кӧріл парған комплекс. Анда подъемник тоғынча, ідӧк - соорыҷахтарны паза пасха даа ниме-нооны пирерінҷе прокат. Олғаннарға чылҷаң алынҷа трасса тимнелген.
«Приисковай» - тағ индіре чыларынҷа курорт. Ол Россияда фрирайдингнең айғазарынҷа паза тағлығ чирлерҷе снегоходтығ чӧрерінҷе иң чахсы чирлернің санына кирілген. Харлығ тайғада октябрьдаң июньға теере чыларға чарир.
Туризм кэшбэгі программаңа 2020 чылда тоғын пастааннар. Коронавирус пандемиязы тузында бизнестегілерге паза чорыхчыларға хабазар пӧгіннең тоғыс апарылча. Пӱӱл андағ хабазығнаң 1,7 млн кізі тузаланған. Оларға кэшбэк 6,7-ҷе млрд салковай пирілген.
2022 чылда чӧрімні ікі хати - хысхыда паза кӱскӱде - иртірерге пӧгінчелер.
Автор :
Елена КУМИНОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы