ОЛАРНЫҢ ЧИДИИ - ПАСХАЗЫНА КӦЗІДІМ
24.12.2021
Хабарлар
Сыйыхтас. 22 декабрьда правительство туразында Хакасия пазы Валентин Коновалов «Большая перемена» тиксі Россия марии чиңісчілерінең тоғасхан
Пӱӱл ноябрьда ирткен марығда пістің пис чир-суғҷыбыс чиңіс тутхан: Харатастағы механико-технологическай техникумның студенті Максим Тугужеков, политехническай колледжтің студенттері Анастасия Гринина, Анна Шамова, Эсмеральда Федотова паза Ағбандағы 25 № школаның 11-ҷі класстағы ӱгренҷізі Елизавета Иванова. Олар пірер миллион салковай утып алғаннар. Сыйыхха алған ахчаны чиит улус ӱгредіге паза постың кирексіністеріне хорадар.
Хазна синінде иртірілген марығда 2,5 миллион ӱгренҷі паза студент араласхан. Олар аймах регионнардаң полғаннар. Че марығласханнарның иң артыхтарына ла финалға чидерге оңдай полған. Уғаа ӧріністіг, пістің пис чиит чир-суғҷыбыс андағларның санында.
Ирткен чылда Россия мариинда ӱгренҷілер ле араласхан полза, пӱӱл ортын профессиональнай ӱгредіг учреждениелерінің студенттеріне анда постарын сынап кӧрерге оңдай пирілген. Пістің студенттерібіс, ол оңдайны холдаң позытпин, постарын анда чахсы кӧзіткеннер. Оларның тӧрті, финалға чидіп, проектін чахсы арачылабысхан.
- Алғыстапчам тиксі Россия марииның чиңісчілерін, оларны марыға тимнеен ӱгретчілерні паза іҷе-пабаларны. «Большая перемена» марығ «Россия - оңдайлар пирчеткен хазна» президенттің платформазынзар кірчеткен проект полча. Ол проект чииттерге постың талантын, чайаачы кӧрізін алғыдарға оңдай пирче. Пӱӱл анда 14 муңа чағын чиит чир-суғҷыбыс араласхан. Пу сан пістің республика таланттығ чииттерге пай полчатханын кӧзітче. Сірернің чидіглерің пасхазына кӧзідім полча, - теен Валентин Олегович, марығ чиңісчілерінзер айланып.
Чоохтирға кирек, Хакасия пазы оол-хыстарның чидіглерін пӧзік паалаан. Ол тоғазығ тузында чииттерге, мыннаң мындар ідӧк чуртаста ӧткін тудынып, наа чидіглерге чидерге алғаан.
Хакасияның ӱгредіг министрі Лариса Гимазутина 2021 чылда тиксі Россия мариинда кӧп олған паза студент араласхан тіп таныхтаан:
- Пӱӱл анда 5 - 7 класстарның ӱгренҷілері араласханнар. Ортын профессиональнай ӱгредіг учреждениелерінің студенттері пастағызын на анда кӱстерін сынап кӧргеннер. Улуғ класстар ӱгренҷілерінің 16-зы финалға сыххан. Че Ағбандағы 25 № школаның ӱгренҷізі Елизавета Иванова чалғызан на чиңісті холға кирген. Хараазын телевизорҷа Елизавета чиңісчі полыбысханынаңар хабарны ис салғаныбыста, піс ол искірігні прай социальнай сетьтерҷе таратхабыс. Студенттернің аразында читі араласчы финалға сыххан, оларның тӧрті чиңісчі полыбысхан.
Лариса Николаевна, чооғын тоосчатханда, пӱӱнгі кӱнде республикадағы ортын профессиональнай ӱгредіг учреждениелері чахсы кӧзідімнер кӧзітче тіп чыылған улусха искірген.
Тоғазығда ідӧк алынҷа чылығ сӧстернең чиит улусты марыға тимнеен ӱгретчілер таныхтатханнар. Прайзы оларның кӱстенізінең пістің чиит чир-суғҷыларыбыс сыйыхтығ орыннығ айланғаннар тіп чарасхан. Іди Харатастағы механико-технологическай техникумның ӱгретчізі Наталья Борисенокка паза политехническай колледжтің ӱгретчізі Людмила Чигиреваа Хакасия пазы алғыстас пічіктерін читірген.
Мындағ килкім марығда Максим Тугужеков пӱӱл пастағызын на араласхан. Че, андағ даа полза, ол анда, пір дее туртухпин, позының пілізін чахсы кӧзіткен. Аның кӧрізінең, «Большая перемена» марығ чиит улусты, ӧӧнінде пір ӧменең тоғынып, алнында турғызылған пӧгіннерні толдырарға кӧніктірче.
Мин Максимнең чоох алысчатханымда, іҷе-пабаң син миллион утып алғанына тың ӧрінгеннер бе тіп аннаң сурғам. Оол, суриимны ис салып, чазырбин, нандырығ пирген:
- Олар мин андағ кӧп ахча утып алғанымны пілбееннер. Ахчалығ сыйыхты мин іҷе-пабамның банктағы счедынзар ызыбысханымда ла, олар аннаңар піліп алғаннар. Ол сыйых ипотека тӧлиріне парыбысхан. Мин іҷе-пабама ипотеканы тӧлебізерге полыс пирерге мындағ оңдай пирілгеніне тың ӧрінчем. Паза пасхазына даа ол марығда аралазарға чӧп пирчем.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде