ХАБАРҶЫЛАРНЫ СЫЙЫХТААННАР
29.12.2021
Хабарлар
Марығ. Хакасияның Ӧӧркі Чӧбі «Хрустальный барс-2021» парламент марииның салтарларын иткен
24 декабрьда Хакасияның Ӧӧркі Чӧбі, «Хрустальный барс-2021» парламент марии салтарларын идіп, закон сығарҷаң ӱлгӱ тоғызын чарытчатхан хабарҷыларны сыйыхтаан. Пайрамнығ чыылығны Ӧӧркі Чӧп кнезі Владимир Штыгашева схан. Ол хабарҷыларға республика депутаттарының тоғызын чарытчатханнары, сидіксіністіг сурығларға хайығ айландырчатханнары ӱчӱн алғызын читірген. Олох туста критикаа тартарында чалтанмасха хығырған.
- Піс хаҷан даа тіҷеңміс, чарыдыңар сын оңдайнаң, - таныхтаан Владимир Штыгашев. - Критикаа тартары, читпестерні сығарары, ол прай кирек паза тузалығ. Че хачан даа сӧклеске кірбеңер, анзы ӧӧні.
Паза Владимир Николаевич республикадағы СМИ тоғынҷыларын чағдапчатхан Наа чылнаң паза Кӧлееденең алғыстаан. Прайзына пик хазых, часка паза чахсы чуртас алғаан. Ӧӧркі Чӧп кнезі кӧрізінең, килчеткен наа чыл пу чылның хыринда чахсы полар.
Алғыстас соонаң Владимир Штыгашев «Хрустальный барс-2021» марығның ӧӧн сыйиин, Гран-прині, РТС телекомпанияның хабарҷызы Ольга Борловскаяа читірген.
Ӧӧркі Чӧп кнезінің пастағы орынҷызы Юрий Шпигальских пӱӱл марыға 100-ке чағын тоғыс кіргенінеңер искірген, аннаңар ӧӧн чиңісчіні паза номинацияларҷа чиңісчілерні таллирға сидік полтыр. Чоохтирға кирек, ирткен чылдаң сығара марығ оңдайлары алыстырылған. «Ӧӧнінеңер пілдістіг», «Чоннаң табылғаннар», «Азых чоохтазығ» паза «Парламент партнеры» номинациялар араласчылары ікі ӧмее чарылғаннар - телевидение-радио хабарҷылары паза пасчатхан СМИ (газета-журналлар, Интернет СМИ-лары) хабарҷылары. Аннаңар чиңісчілер саны ідӧк ікі хати кӧп полған.
Пасчатхан хабарҷылар ӧмезінде «Ӧӧнінеңер пілдістіг» номинацияда «Хакасия» газетаның ӧӧн редакторының пастағы орынҷызы Юрий Абумов чиңіс тутхан, «Парламент партнеры» номинацияда «Хакас чирі» газетаның ӧӧн редактор орынхызы Альберт Толмашов чиңісчі полыбысхан.
Номинациялар чиңісчілеріне сыйыхтарны Ӧӧркі Чӧп комитеттерінің устағҷылары читіргеннер. Ідӧк партиялар фракциялары, пос сыйыхтарын тимнеп, алынҷа хабарҷыларны таныхтааннар.
Автор :
Иван ТИННИКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде