ХАКАСИЯНЫҢ ТИЛІЗІНЕ УЛУҒ ХОЗЫМ ИТЧЕЛЕР
12.01.2022
Хабарлар
Сыйыхтас. Хакасия пазы Валентин Коновалов республикаа улуғ хозым иткен чуртағҷыларға Россия Федерациязының паза Хакас Республиканың хазна сыйыхтарын читірген
Сыйыхтар алғаннарның аразында республиканың аймах учреждениелерінің тоғынӌылары полған.
- Иң пастап тоғызыңар ӱчӱн алғызым читірчем. Ол пістің республикаа тиліс паза туза ағылча. Пу сыйыхтар сірернің профессиональнай чидіглеріңні кӧзітчелер, - таныхтаан республика пазы Валентин Коновалов.
Коронавирус чуғынӌах ағырығдаң тоғыр кӱрезерінде улуғ хозым иткен ӱчӱн Сорығдағы имнег туразының ӧӧн имӌізінің орынӌызы Наталья Лехторовичке Лука Крымскийнің медальы читірілген. Республиканың клиническай онкология диспансерінің хирургия пӧлиинің устағӌызы Геннадий Стрижаковха «Россия Федерациязының саблығ имӌізі» ат пирілген. Н.Ф.Катановтың адының Хакас хазна университедінің ректоры Татьяна Краснова Россия президенті Владимир Путиннің Аарластығ пічиин алған.
«Хакасгражданстрой» ООО-ның директоры Олег Манжулаа «За заслуги перед Хакасией» орден читірілген, Россияның социальнай страхование фондының Хакасияӌа пӧлиинің устағӌызы Елена Шерманға - «Хакасияның істеніс сабланызы» медаль. Хакасияның Ағбандағы нотариальнай округының нотариузы Алла Жукова «Хакасияның саблығ юризі» ат алған, Хакасияның культуразын тилідеріне улуғ хозым иткен ӱчӱн саблығ хакас писатель Галина Григорьевна Казачиноваа (Кужаковаа) «Хакас Республиканың чон писательі» ат пирілген.
11 кізее Хакас Республиканың Аарластығ пічіктері читірілген. Оларның санында полғаннар: Асхыс аймаа устағ-пастааның муниципальнай ис-пайынаң устирынӌа комитеттің кнезі Эльвира Топоева, «Хакасский» заповедниктің директор орынӌызы Ирина Санникова, Асхыс аймаандағы «Россияның ДОСААФ-ы» организацияның кнезі Владимир Тохтобин, «Хакас Республиканың информатизация паза наа технологиялар кіні» хазна автоном учреждениезінің дворнигі Николай Кочелоров.
Татьяна Краснова сыйыхтатхан прай кізілернің адынаң Хакасия пазы Валентин Коноваловха алғыс читірген.
- Полған на сыйых - ол ӧменің тоғызы. Минің сыйиим - ол Хакас хазна университедінің прай тоғынхыларының чидии, хайзыларына кӧп сидіксініс иртерге киліскен. Пӱӱл 6 чылға аккредитация иртібіскебіс. 37 специальностьха аккредитация алып алғабыс.
Хакасия правительствозы хабазиинаң тилекей синінде 15 наука-ӱгредігліг 15 кінзер кіріп алғабыс. Андар хазнаның 23 регионына кіріп алар ӱлӱс тӱскен. Аның ӱчӱн Сірерге, Валентин Олегович, улуғ алғыс! Сірер хабасхан паза наука гранттарын пирген сылтаанда, пістің андағ оңдай пар, - теен Татьяна Краснова.
Таныхтирға кирек, Хакасияның правительствозы паза республиканың ӱгредіг паза наука министерствозы хабазиинаң Хакас хазна университедінде «Горное дело» наа специальность азылар. 2022 чылда пу кӧстегӌе пастағы студенттер алылар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы