- Уғаа чахсы сірернің паарсах, кізее киртініс пирчеткен харааңарны, ідӧк ӧрчіліг паза чылығ читірчеткен кӱліністеріңні кӧрерге. Хайзылары илееде тус, наа чуғынах ағырығ тарап, имнег маскаларынаң чабылған. Эксперттернің таниинаң, ковид ағырығ амырапча. Прай чӱреемнең сірерні профессия ӱлӱкӱнінең алғыстапчам. Сірер прай чуртазыңарны чонға полызығ пирчең кирекке чарытчазар. Имінің тоғызы уғаа сидік паза нандырығлығ, кӧп кӱс паза піліс кирексіпче. Аннаңар, пос хазиин хайраллап, тынанҷаң тус табарға сірерге алғапчам. Пӱӱн прай даа имнег тоғынҷыларына хазна сыйыхтарын читірзе, чахсы поларҷых. Сірер прайзы даа турыстығзар, - таныхтаан Ольга Пономарёва.

Республика синіндегі хазна сыйыхтарына тиксі Хакасияның город-аймахтарындағы имнег тураларының тоғынӌылары турысханнар. «Хакасияның саблығ имӌізі» атха турысханнар: Виктор Емашев, Ирина Макарова, Марина Марковская, Фаина Сагалакова, Виктор Топоев, Вячеслав Тогочаков, Лидия Тюмирекова, Сергей Усов, Ирина Шалгинова.

Республиканың олған имнег туразының имӌі-неврологы Лидия Тюмирекова 30 чылӌа имӌі полып тоғынча. Хызылчардағы имӌілер институдын 1993 чылда тоозып, чиит специалист Аршаннардағы имнег туразында олған имӌізі полған. Анаң ӱгренізін узаратхан, имӌі-невролог специальнозын алып, 25 чылы істенче. Лидия Архиповна чооғында піди таныхтаан:

- Имчінің тоғызы нандырығлығ паза сидік. Уламох олған имҷізінің. Палалар пірееде ниме паза хайди ағыр чатханын чахсы чоохтап полбинчалар. Піске оларның чооғынаң паза сыныхтағлар хоостыра орта диагноз турғызарға кирек. Андада ла имненіс туза ағылар. Имҷілер пациенттернің хазии паза чуртазы ӱчӱн нандырчалар.

Пӱӱнгі пайрамға хығырғанда, грамота пирілер тіп чоохтааннар. Мағаа «Хакасияның саблығ имҷізі» ат пирілерінеңер пілбеем паза мындағ сыйых поларын сағыбаам даа. Тоғызымны пӧзік паалап, таныхтаан ӱчӱн улуғ алғызым читірчем.

Хакас Республиканың Аарластығ пічии 20 кізее читірілген. Олар, кӧп чыл істеніп, чуртағӌылар хазиин хайраллап, тоғыстарын тӱзімніг апарчалар: Тамара Чебодаева, Дмитрий Тагаков, Альбина Толмачева, Ольга Алексеева, Елена Абросимова, Оксана Белошапкина, Ольга Бутенко, Лидия Василовская, Павел Ермаченко, Надежда Карасева, Александр Ковалёв, Лариса Куприянова, Максим Максимов, Нина Лосева, Наталья Овсюк, Алефтина Пиримова, Любовь Селева, Галина Таргошина, Клавдия Узназакова, Елена Урманчеева.

Хакасияның Ӧӧркі Чӧп кнезінің орынӌызы Евгений Молостов, имӌілерні паза имнег тоғынӌыларын „ӱлӱкӱннең алғыстап, Хакасия Ӧӧркі Чӧбінің алғыстас пічиин тӧрт кізее читірген. Оларға турысханнар: Людмила Тюкпеева, Валентина Чевро, Евгений Токманов, Светлана Чупрова.

Людмила Тюкпеева имӌі полып, 33 чылы тоғын парир. Ол Асхыс аймаандағы олған поликлиниказының устағӌызы паза олох туста участокта педиатр полып істенче. Людмила Васильевна Хызылчардағы имӌілер институдында педиатрия пӧлиин тоосхан. Аннаң ноға имнег киреен таллап алғаннаңар сурғам.

- Мин кічігдең сығара имчі поларға сағынғам. Имҷілер ол иң чахсы паза ибіркілерге улуғ туза ағылчатхан кізілер тіп сағынҷаңмын. Іҷе-пабам имнег киреенең палғалыстығ полбаан, мин позым андағ специальность таллап алғам. Кічігдегі сағынған сағызымны чуртазымда толдырғам.

Сынны чоохтаза, позымны, пасха ӱгредіг алып, саңай пасха сферада тоғынчатханын кӧрбинчем. Имҷінің тоғызы чӱрееме чатча, кічіг пациенттернең тоғынарға хынығ, - сағызынаң ӱлескен Людмила Тюкпеева.

Хакасияның хазых хайраллаҷаң министрі Олег Ананьевский, имнег киреенде тоғынчатханнарны паза ветераннарны профессия ӱлӱкӱнінең алғыстап, коронавирус ағырығнаң кӱрезеріне хозым иткен ӱчӱн полған на тоғынӌыны алғыстаан.

- Пір чыл мының алнында піс ӧӧнінде наа коронавирус чуғынҷах ағырығнаң кӱресчеткеннеңер чоохтаабыс. Андада, COVID-19 ағырығ амырап, имҷілер тоғыстарынзар айланарлар тіп сағынғабыс. Че кӱскӱзін ағырчатханнарның саны хатабох ӧс сыххан, хысхызын ағырығның кӱзі тыып ла турған. Имчілернің иңніне улуғ тоғыс артылған. Наа чуғынчах ағырығнаң тиксі тилекейнең харбасхабыс. Аннаңар пӱӱн COVID-19 ағырығнаң кӱрезерінде полысханнарға улуғ алғызым читірчем. Имнег тоғынҷыларын профессия ӱлӱкӱнінең! Прайзына пик хазых, тоғыста ӧзіс паза пӧзік чидіглер алғапчам. Чонға имнег полызиин пирчеткен ӱчӱн улуғ алғыс сірерге! - чоохтаан Олег Ананьевский.

Анаң ол «Хазых хайраллирының отличнигі» танығнаң республиканың чуғынӌах ағырығлар имнег туразының ӧӧн медсестразы Людмила Рябчикованы таныхтаан.