ИМНЕГ ТОҒЫНҶЫЛАРЫН ТИМНИРІНЕ – МАСТЕРСКОЙЛАР
Тоғыс чорығы. Пу наада Хакасия пазы Валентин Коновалов Харатастағы кӧп профильліг Хакас техникумында пол килген
Республикада ортын имнег персоналын ӱс ӱгредіг учреждениезінде тимнепчелер. Оларның пірсі – Харатастағы кӧп профильліг Хакас техникумы. Прайзы даа пілче, город-аймахтарның имнег учреждениелерiнде имҷілер, фельдшерлер паза медперсонал чидіспинчеткенін. Аннаңар Хакасия правительствозы паза хазых хайраллаҷаң министерство республиканың имнег учреждениелерінзер тоғынҷылар тартар ӱчӱн паза чииттер имнег специальностьтарын алар ӱчӱн улуғ тоғыс апарчалар. Республика, аймах хазна программаларында аралазып, имнег тоғынҷыларына тоғынҷаң оңдайлар тӧстеп, чурт сурығларын пӧгеріне хабасча.
Харатастағы кӧп профильліг техникумда «Ӱгредіг» национальнай проекттің «Чиит профессионаллар» хазна проектінҷе iкi профильліг мастерскойлар тӧстелген. Хакасия правительствозы федеральнай кіннең хада-пірге тоғынып, оларны тӧстиріне техникумға 125 миллион салковай позыдылған. Мастерскойлар «Имнег паза социальнай полызығ» паза «Имнег кирее» кӧстеглерҷе ӱгренчеткеннерге кӧрiл парған. Анда наа программалығ технология оборудованиезі турғызылған паза ӱгредіг оңдайлары тӧcтелген. Олар ортымах имнег тоғынҷыларын тимниріне амғы ӱгредіге килістіре.
Мастерскойлар пайрамни азыларында Хакасия пазы Валентин Коновалов араласхан.
– МЫНДАҒ МАСТЕРСКОЙЛАР ПОЛЫЗИИНАҢ НАА ЛА ІСТЕНIП ПАСТАПЧАТХАН ИМНЕГ ТОҒЫНҶЫЛАРЫ ИМНЕГ ПРОЦЕДУРАЛАРЫН ЧАХСЫ ПАЗА IЗЕСТІГ ТОЛДЫРАРҒА ТИМДЕ ПОЛАРЛАР. ПУ МАСТЕРСКОЙЛАР ӰГРЕДІГ СИСТЕМАЗЫНДА УЛУҒ ХААЛАҒ ПОЛЧА. ОЛАР ИМНЕГ ТОҒЫНҶЫЛАРЫН ТИМНИРІНДЕ УЛУҒ ТУЗА АҒЫЛАРЛАР. МЫНДАҒ ТАНЫҒЛЫҒ ЧИДІГНЕҢ СІРЕРНІ АЛҒЫСТАПЧАМ. ПУ ПРОЕКТТІ ЧУРТАСХА КИРЕРІНДЕ АРАЛАСХАННАРҒА ПРАЙЗЫНА АЛҒЫС! – ЧООХТААН ХАКАСИЯ ПАЗЫ ВАЛЕНТИН КОНОВАЛОВ.
Iдӧк мастерскойларны пайрамни азарында республиканың ӱгредiг паза наука министрінiң тоғызын толдырчатхан Анатолий Бутенко паза Хакасияның хазых хайраллаҷаң министрінің пастағы орынҷызы Александр Стреленко, республиканың ӱгредіг паза хазых хайраллаҷаң организацияларының устағ-пастаа, имнег тоғынҷылары паза ӱгретчiлер араласханнар.
Таныхтирға кирек, 2019 чылдаң сығара республиканың ортын ӱгредіг учреждениелерінде аймах кӧстеглерге кӧрілген 18 мастерской азылған. Ирткен чылда Харатастағы кӧп профильліг техникумда iдӧк iкi мастерской тоғынып пастаан. Олар «Автомеханика» паза «Повар-кондитер» кӧстеглерҷе тимнелгеннер. Пӱӱл Хакасияның колледжтерінде паза техникумнарында хоза тоғыс мастерской азылары кӧрілче. Олар iдӧк наа, амғы тусха килістіре оборудованиеліг поларлар. Анзы чахсы практикалығ паза тоғысха тимде чииттерні сығарарға полызар.
Iдӧк техникумның актовай залында Хакасия пазы Валентин Коновалов, Харатастағы тоғызынҷы поселоктың ӧткін чуртағҷыларынаң тоғазып, оларны сағыссыратчатхан паза ағырсымнығ сурығларына нандырған.
Хакасия правительствозы республиканың муниципальнай пӱдістерiне аймах оңдайларнаң хабазарға кӱстенче. Полған на пӱдістің сидікciністер табылча, ол санда Харатас городтың.
Валентин Олегович Харатаста халғанҷы чылларда хайдағ тоғыстар апарылғанын чарытхан.
Республика правительствозы хабазиинаң Харатас город Ағбанның чылығ пирчеткен системазына киріл парған. Андағ оңдайнаң чуртағҷыларның тураларынзар чылығ пирчеткені чахсылан парған паза котельнайлардаң киизер тасталчатхан оолығ ниме-ноо сині хызырыл парған. Харатаста олған сады пӱдіріл парған, онкологияҷа имнег полызиин пирҷең амбулаторнай кін тоғынып пастаан, 50 азыра километр чол нааҷылалған паза кӧп чон чӧрчеткен орыннар иптелген. Чуртағҷыларға «Хакасия наши дни» фильм кӧзіділген. Анаң олар республика пазына сурығлар пиргеннер. Чонны сағыссыратчатхан сурығлар аймах темаа теелген. Олар хазых хайраллирына, ӱгредіге, культураа, кӧп чон чӧрчеткен транспортха паза чурт-коммунальнай хоныхха чарыдылғаннар. Iдӧк харатастағыларны экономика тилізі, хара тас аныпчатхан предприятиелернiң тоғыстары сағыссыратча. Аннаң пасха, чуртағҷылар чоллар тыхтирынаңар, спорт объекттерін нааҷылирдаңар паза чон чӧрчеткен орыннарны иптирдеңер сурығлар кӧдіргеннер. Таныхтирға кирек, кiзiлер Валентин Олеговичнең азых чоохтазығда ӧткін араласханнар, илееде ағырсымнығ сурығны кӧдіргеннер. Тоғазығның салтарларынҷа Хакасия пазы Валентин Коновалов муниципальнай пӱдіcтiң устағ-пастаана профильліг министерстволарнаң, хада-пірге тоғынып, чуртағҷыларның сурығлары хоостыра пӧкчең оңдайлар табарға чахығ пирген.
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |