КУЛЬТУРА ТУРАЗЫ ЧОНҒА ӦРIНIС СЫЙЛАЗЫН
«Культура» нацпроект. Ирткен неделяда Асхыс аймаанда танығлығ кирек полды. Писхамҷы аалдағы «Таежный» культура туразы тиксі тыхтағ тоғыстары соонаң пайрамни азылған
Хайди таныхтаан «Таежный» культура туразының директоры Инна Дорохина, пу тура 1985 чылда пӱдірілген. Амға теере мында тиксі тыхтағ тоғыстары иртірілбеен полған, оох-теек тоғыстар ла апарылҷаң. Муниципальнай пӱдісте мында ла чуртағҷылар пос тузын иртірчелер. Анда аймах ӱлӱкӱннер иртчелер.
Культура учреждениезінде 21 клуб пірігізі тоғынча, андар 261 кізі чӧрче. Клуб пiрiгiстерiнiң читізі – халых пірігізi паза 14-і – чайаачы ӧмелер. Пеер чӧрчеткен олғаннар аймах, республика синіндегі паза регионнар аразындағы марығларда сыйыхтығ орыннарға сыхчалар. «Часхы чулыҷахтары» марығда аймах частығ олғаннарның ӧмелері пастағы паза ікінҷі орыннарға турысчалар. Олар республика синіндегі «Теелбек салғағы», балетмейстерлер аразындағы С.Д.Словинаның адынаң паза «Хакасияда часхы» республика синіндегі теелбек марығларында пастағы орыннар дипломанттары полғаннар. «Арт-состав» тиксі Россия мариинда ікінҷі степеньніг диплом утып алғаннар. Гимнасттар «Хакасияның поғдархазы» республика мариинда кӱмӱс медальны холға киргеннер. Шорларның теелбек ӧмелері Севернің, Сибирьнің паза Ыраххы Востоктың ас саннығ чоннарның фестивальында Хакасия ӱчӱн турысханнар. Санкт-Петербургта ирткен искусство мариинда Писхамҷыдағы ӧмелер пастағы, ікінҷі паза ӱзінҷі степеньніг лауреаттар полыбысханнар.
Хакасияның культура министрі Светлана Окольникованың чооғынаң, «Таежный» культура туразында тыхтағ тоғыстары «Культура» нацпроект хоостыра иділген, ағаа 22091676 салковай позыдылған. Аның ӧӧн чардығы федеральнай бюджеттең пирiлген. ідӧк республика, аймах паза аал чӧбі бюджеттерінең ахча хорадылған. Культура туразында чарытхы сетьі алыстырылған, чылығ пирҷең сеть нааҷылалған, тура хыры тыхталған паза пасха даа тоғыстар иділген. ӧӧн пӧгін – республиканың полған на Культура туразын истіг идібізерi. Андар чииттер хынып кил турзыннар, Писхамҷыда тоғыстар кӧрік айынаң кічіг хырлас айына теере толдырылған. Пазағы чылда Асхыс аалдағы, Чоғархы Асхыстағы культура туралары нааҷылалар. ідӧк Пилтір паза Тӧӧ пазындағы чайаачы олған школалары проектсер кирiл парғаннар. Тиксі республиканы алза, Алтай аймаандағы Смирновка аалның, Боград аймаандағы Пушной аалның культура тураларында тиксі тыхтағ тоғыстары тоозылча. ідӧк Таштып аймаандағы Кічіг Арбытта, Ибігде паза Алтай аймаандағы Алтай аалда культура туралары пӱдірілче.
Писхамҷы аалның Культура туразын азарға Хакасия пазы Валентин Коновалов, культура министрі Светлана Окольникова, Асхыс аймаа пазы Абрек Челтыгмашев паза орындағы устағ-пастағ килгеннер. Оларны Культура туразының тоғынҷылары іпек-айраннаң удурлааннар. Хызыл чалама хыплалған соонда устағҷыларға улуғ нимес экскурсия иртірілген. Аның соонда прайзы кӧрiгҷiлер залынзар ирткен. Мында ӧӧн пайрам пасталған.
Хайди таныхталған пайрамда, аалҷыларны истіг Культура туразында удурлирға ӧріністіг. Республика ӱлгӱлері полызиинаң ол ікінҷі тыныс алып алды. Писхамҷы аал чуртағҷыларын алғыстирға Хакасия пазы Валентин Коновалов сыххан.
– Пӱӱн піс аал, аймах паза тиксі республика чуртағҷыларына ӧріністіг киректi таныхтапчабыс, теестегі объектті тоғысха кирчебіс. Пеер кӧп кӱс паза ахча хорадылған, іди піске культура ӧргезі сыйлалды. Мында аалның прай чуртағҷылары тынанарына, кӧп тӱзімніг иир иртеріне ізенчем. Культура туразы чонға ӧрініс паза часка сыйлазын. Мында чииттерге паза улуғларға чайаачыларын тилідер оңдай ползын, – алғаан Валентин Олегович.
Асхыс аймаа пазы Абрек Челтыгмашевтің сӧстерінең, мының алнында Культура туразының залы соох полған. Андағ оңдайларда анда мероприятиелер, чуртағҷыларнаң тоғазығлар иртчеңнер. Че пӱӱл культура министерствозы, аал чӧбі паза аймах администрациязы, пірге тоғынып, проект пічіктерін тимнебіскеннер. Халғанҷы ікі чылға Пирікчулда, Кызласта, ӧӧк пилтірінде паза аймах кінінде культура туралары нааҷылалған. іди аймахта тоғыс чардыхти апарылча. Пӱӱнгi кӱнде иң ағырсымнығ сурығ – Палыхтығ суғ поселокта Культура туразын пӱдір салары. Iдӧк посёлок чуртағҷыларын культура министрi Светлана Окольникова алғыстаан:
– Пеер кір килгенімде, харахтарым ӧрінче, культура тоғынҷылары мында тоғыстарын тӱзімніг апарзыннар. Кӱннiң сай мында чуртас хайназын.
Пайрамда кӧп алғыстас сӧстерi чоохталған. Поселок чуртағҷыларының ӧрінізі іле кӧрінген. Алғыстастар аразында чайаачы ӧмелер кӧрігҷілерні сарыннарынаң, теелбектерiнең хайхатханнар.
Антон Чертыков
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |