ОРТА ЧОЛҶА ПАРАРҒА ХАӋАН ДАА ОРАЙ НИМЕС
25.06.2021
Хабарлар
Танда - Наркоманиянаң кӱресчең чоннар аразындағы кӱн. Республикадағы наркология диспансерінде социальнай тоғыстарны толдырчатхан специалист Ольга Трошкина паза психиатр-нарколог Эльтона Ондар іскінең паза наркоманиянаң ағырчатхан кізілернең хайдағ тоғыс апарчатханнарын чарытханнар
Іскі паза наркомания кізі хазиина улуғ ӱрег ағылча. Республикадағы наркология диспансерінің имӌілері, чуртастың саба чолынӌа парчатхан чуртағӌыларны тохтадып, оларға полыс пирерге кӱстенчелер.
Хомай кӧнігістерге пастыр салған кізілер ӧӧнінде наркология диспансерінзер пос кӧңнінең килбинчелер. Оларны туған-чағыннары чидін килчелер. Законны хыйыстырып, уголовнай алай административнай киректерге тартылчатханнарны реабилитация иртерге наркология диспансерінзер ысчалар. Опека паза попечительство органнарының алай МВД-ның чазы читкелектернең тоғынчатхан пӧліктернің специалисттері имненерге салбыр чуртас апарчатхан кӧп іӌе-пабаны кӱстепчелер. Іскее тартылчатхан, тохтадынарға сағынминчатхан сӧбірелернің палаларын реабилитация кіннерінзер пирібісчелер, олар ирееленмезіннер паза ӧзӧкпезіннер тіп. Наркология диспансерінде хазыхтанып алғаннарға палаларын нандыра айландыр пирчелер.
Стационарда хомай кӧнігістернең имненчеткен кізі психиатр-наркологка позынаңар, ноға саба чолӌа пар сыхханынаңар, чуртаста хайдағ сидіксіністерге тоғасханнаңар, хайди іскее тартылып пастааннаңар алай наркотик амзап сыхханнаңар чоохтапча. Имӌі ол кізінің ағырии хайдағ сылтағнаң пасталғанын ілезіне сығарча, анаң имнепче, тузалығ чӧптер пирче. Стационарда иң асхынах ӱс неделя паза иң ӱр ікі ай имненчелер. Соонаң кізілер, нарколог-имӌізер ибдең чӧріп, хазиин пиктепчелер. Хысха курсты иртібіскеннерге справка пирілче.
Таныхтирға кирек, іскі паза наркомания кізі чуртазына тӧӧй теелчелер. Имӌізер тузында айланмаза, пу ағырығлар кізіні ах чарыхтаң ирте апарыбысчалар. Аннаңар психиатр-нарколог Эльтона Ондар чуртағӌыларны сах чуртас апарарға хығырча. Наркология диспансерінде реабилитация иртібіскен кізее аның иң ӧӧн чӧбі - хада араға іскен паза наркотик амзаан «арғыстарынаң» нанӌыласпасха. Андағлар тоғас парзалар, «изен-анымӌох» тібізіп, паза чоох-чаахха кірбеске. Ікінӌі чӧп: хайдағ даа ӱлӱкӱннерде, туған-чағыннар паза арғыс-ӧӧрелер хайди даа кӱстезе, пастағы чірчені амзабасха. Пастағы чірчені амзабысхан кізі тохтадын полбиныбысча. Ӱзінӌі чӧп: наркология стационарынаң сыххан соонаң, психиатр-наркологсар чӧріп, хазыхты оңдайлирын узарадарға. Пу чӧптерге тудынмаза, кізі пазох хомай кӧнігіске тартыл парыбызарға айабас.
- Пар кізілер, хайзылары имненчеткен туста диспансердең тизібісчелер, - тіпче социальнай тоғыстарӌа специалист Ольга Трошкина. - Сынында имнег учреждениезінең парарга чарадылбинча, че піреезі сыдаспинча. Хайзы садығ туразынзар чіӌең ниме алай чуунынӌаң ниме-ноо аларга пар килче.
Наркология диспансерінде реабилитация ирткен кізілер пазох салбыр чуртасха тартылчатхан киректер сыбыра тоғасча. Че, улуғ ӧрініске, имненген соонаң іскіні саңайға тохтадыбысхан кізілер ідӧк кӧп. Олар, наркология диспансерінзер киліп, стационарда имненчеткен кізілерге чабал ағырығдаң хайди озып алғаннарын чоохтапчалар, чуртасты чахсы саринзар алыстырарға хаӌан даа орай нимес тіп, тіріг кӧзідім полчалар.
Ноға кізілер ачығ суға паза наркоманияа тартыл сыхчалар? Социальнай тоғыстарӌа специалист Ольга Трошкинаның чооғынаң, хомай кӧнігістер ӧӧнінде сӧбіредең пасталча. Ісчеткен паза наркотиктер амзапчатхан іӌе-паба палаа чахсы кӧзідім нимес. Иң чағын кізілерін кічігдең сығара изірік ле кӧрген пала мындағ чуртасха кӧнік парча. Анаң ӧс парза, іӌе-пабазының хомай кӧнігістерін позының улуғ чуртазынзар хада алып алча. Ачырғасха, ідӧк ачығ суғ іс сыхча паза наркотик амзапча.
Толдыра нимес сӧбіреде, социальнай учреждениеде алай іӌе-пабазы хайии чох ӧскен палалар чуртаста саба чол таллап алчалар. Тоғызон чыллардағы саарбахтар, пӱӱнгі кӱнде ортын часха читклеп парып, тың ісчелер. Олған ачығ суғны алай наркотикті 13 - 17 частығдаң танып пастабысча. Андада саарбахтар, алынӌа группалар тӧстеп алып, удур-тӧдір чағын ынағласчалар.
- Пістің саарбахтарнаң тоғынҷаң ӧнетін кабинет пар, -тіпче специалист Ольга Владимировна. - Анда оларга ачыг суғның паза наркотиктернің хомайынаңар чоохтапчабыс. Таныхтирга кирек, олганнардаң пір дее ниме чазырбасха паза сурығларына сын нандырарга кирек.
Пала хомай кӧнігіске тартыл парыбыспас ӱчӱн, полған на іӌе-пабаа иркезінең чахсы пілізерге, удур-тӧдір улуғлазарға кирек. Сӧбіренең сыбыра тынанарға, чир-чайаанзар чӧрерге. Ибде ачығ суғлығ ӱлӱкӱннер иртірбес-ке. Пала кемнең хада ойнапчат-ханын, ынағласчатханын хайығ-да тударға. Олған пірее кружок-ка алай секцияа чӧрзе, улам чахсы полар.
Хомзынысха, тоғынчатхан кізілер тынағ кӱннерінде пиво алай араға ізібісчелер, неделя тооза істеніп, майых парғаннарына сылтанып. Чуртастың пу оңдайы пірее сӧбірелерде кибірге дее кір парған. Андағ оңдайнаң кізі, позы даа сизінмин, кӧместең іскее кірче. Ідӧк чонда пір хомай «кибір» пар: полған на пайрамны, ползын ол сӧбіре алай хазна ӱлӱкӱннері, кізілер хайди даа изірткіліг суғнаң таныхтапчалар. Палалар, тізең, ол «кибірлерні» миистеріне сииртчелер.
Ідӧк хомай кӧнігістерге тартылчатхан сылтағлар: чағын туғаннарны чідіргені алай, тоғыстаң сығардырып, ӧӧн парыс чох халғаны. Нымзах хылыхтығ кізілер чуртастың аар тузын иртерге сидіксінчелер, аннаңар олар ачығ суға алай наркотикке тартыл парыбысчалар.
Таныхтирға кирек, республикадағы наркология диспансерінің тоғынӌылары чуртастың сидіксінізіне кір парған кізілерге полыс пирерге хаӌан даа тимделер. Чонға чағын полардаңар, олар социальнай сетьтерде «Наркология Абакан» группа азып алғаннар. Ідӧк диспансернің «ізіг линиязы» тоғынча, андар пу +7-913-831-15-55 номерҷе сығдырадарға чарир.
- Ӱр ниместе диспансерде пір ирен имненген, - чоохтапча Ольга Трошкина. - Ол II группаның кинегі полча. Ирен туған-чағыннарына хаӌанох кирек чоғыл, пічіктерін прай чідір салтыр. Стационарда пір ай имненген. Ол тус аразына піс ағаа паспортын итір пиргебіс. Ағбандағы чонға социальнай полызығ пирӌең управление хазна пошлиназын тӧлирге полыс пирген. Реабилитация иртібіскен ирен, паспортын алып, ветераннар пансионадынзар чуртирга парыбысхан. Іди пістің тоғызыбыста мындағ киректер тогазыбохча, хаӌан кізілерге чідірген пічіктерін айландырарға полысчабыс.
Республикадағы наркология диспансерінде имненген кізілер, полысхан специалисттерге алғыстарын читіріп, иблерінзер наа сағыс-кӧрістіг нанчалар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде