МАТЫР ОЛҒАННАРҒА - ТУРЫСТЫҒ МЕДАЛЬЛАР
03.11.2021
Хабарлар
Поғдархас. Ирткен неделяда Россияның Федерация Чӧбінде хазнаның матыр олғаннарын сыйыхтааннар, хайзылары пасхазын чобағдаң алай ба ӧлімнең ал халғаннар. Мероприятие Федерация Чӧбінің кнезі Валентина Матвиенконың устаанынаң ирткен
Видеоконференция оңдайынӌа ирткен мероприятиеде хазнаның регионнары араласханнар, ол санда Хакасия. Республикадаң палғалысха сыхханнар Хакасия пазы Валентин Коновалов, сенатор Валерий Усатюк.
Хазнаның матыр палаларын таныхтиры Федерация Чӧбінің «Матыр олғаннар» гражданскай патриот проекті хоостыра ирткен, хайзы Чонны піріктірчеткен кӱнге чарыдылған. Пӱӱл пу проектті иртіреріне Россияның арачыланыс министерствозы хабасхан.
Пӱӱл Федерация Чӧбінзер регионнардаң 180 олғанны таныхтирдаңар пічік кірген, 106-зы Валентина Матвиенконың чарадиинаң «За проявленное мужество» медальнаң таныхтатхан. Оларның аразында Ағбанның 5 № школазының ӱгренӌізі 11 частығ Мансур Боев!
Таныхтирға кирек, пӱӱл Хакасия правительствозы Мансурны паза аның іӌезін таныхтаан полған. Хакасия пазы Валентин Коновалов сӧбірее алғыстас пічиин паза сыйых читірген.
Пӱӱл чайғызын суғ хазында тынанчатханда, Мансур суға патчатхан ікі оолахты паза хызыӌахты кӧр салған. Хорғыс пілбес оолах, ӱр дее сағынмин, суғзар сегірген. Пастап ол хызыӌахты чарзар сығарған, анаң оолағастарны арачылаан. Іди Мансур ӱс паланы ӧлімнең ал халған!
Видеоконференция тузында матыр оолахсар Россияның Федерация Чӧбінің кнезі Валентина Матвиенко айланған:
- Мансур, ӧс парза, кем поларға сағынчазың?
- Мин арачылағӌы поларға сағынчам,- нандырған оолах.
- Уғаа чахсы паза сағаа килістіре таллағ. Сын иреннер Чир-суун паза кізілернің хазиин, чуртазын арачылапчатхан профессиялар таллапчалар. Син сын арачылағчызың пасхазы сағаа тиңнезерге кирек, - таныхтаан чооғында Валентина Матвиенко.
Мансур осхас хорғыс пілбес олғаннар ідӧк Киров, Свердловск, Волгоград, Рязань областьтарында паза пасха даа регионнарда чуртапчалар. Кӧзідімге, Свердловск областьтың 16 частығ чуртағӌызы Сергей Тетеревков ӧртте алты паланы паза пір улуғ кізіні арачылап халған. Ол, хараазын тасхар сыхханда, хонӌых тура кӧйчеткенін кӧр салған. Тураның хыры паза сенегі хызарчатхан. Сергей, ӱр дее сағынмин, кӧзенекті оодып, турадаң узупчатхан ӱс паланы пірсі пірсінің соонӌа сығарған. Ол туста палаларның іӌе-пабазы ибде чох полған. Ӱр дее полбинаң ӧрт ікінӌі туразар «алтап» парыбысхан. Сергей андар чӱгӱрген. Тура ізии істінең пиктіг полған. Ол, улуғ нимес тизіксер хол сунып, ізікті азып алған. Узупчатхан ипчіні паза аның ӱс палазын, усхурып, тасхар сығарған. Іди Сергей Тетеревков читі кізіні ӧлімнең ал халған. Хайди ағаа поғдархабас! Махачы тудынған ӱчӱн чиит оол Федерация Чӧбінің медальына турысхан.
Медальларға турысханнарның аразында иң кічіг 9 частығ Данил Черенев полған. Пӱӱл чайғызын Киров городтың пір орамазында теплосетьте саай пол парған. Андағы ізіг суғ чир алтынаң сығып чайыл сыххан. Пу орын хыринда Данил Черенев паза Кира Калинина ойнапчатханнар. Ол туста олғаннарның алтындағы чир тӱс сыххан. Хызыӌах ізіг суғлығ оймахсар тӱс парған... Данил, сах андох оймахсар сегіріп, хызыӌахты холынаң тартып сығарған. Кираны имнег туразынзар апарғаннар. Аның иді ізіг суға 40 процентче кӧй парған. Че аны тузында ізіг суғдаң сығарғаннаңар паза имӌілер пастағы полызығны табырах пиргеннеңер, Кира хазыхтанып алған.
Данил паза пасха даа матыр палалар «За проявленное мужество» медальнаң таныхтатханнар. Олар прайзы хорғыстығ туста, пос хазиинаңар паза чуртазынаңар сағынмин, пасхазына полызыға килгеннер.
- Оолах-хызыҷахтарның тудынызы пасхазына кӧзідім ползын. Олардаңар кӧп чоохтирға паза «Юнармия» чӧрімзер тартарға кирек. Хорғыстығ туста улуғ даа кізі чідірінібісче, че сірер, аарлығ пістің матырларыбыс, постарыңны махачы тудынғазар. Сірерге паза іче-пабаларыңа, ӱгретчілеріңе улуғ алғыс читірчем, - теен Валентина Матвиенко.
Хазнаның аймах регионнарында чуртапчатхан кічіг матырлар амды арғыстарының аразында аарласнаң паза улуғласнаң тузаланчалар. Олар пасхазына кӧзідім ползыннар. Че пу киректі тирең істессе, ноға олар матыр атха турысханнаңар сағынза, паста сала пасха сағыс тӧріпче. Саайға кірген кізілернің кӧбізі, хайзыларын палалар арачылааннар, улуғлар хайығ чох артыс салғаннаңар чобаға кірген. Кӧзідімге, олар чалғызан полбаан ползалар, саайланмасчыхтар, кӧйчеткен турада чалғыс халбасчыхтар. Ідӧк улуғлар ӧрт сығарбас правилоларға тудынминчатханнаңар, ӧрттер кӧп сығысча. Тиктең нимес видеоконференцияда медальға турысхан пір оолахтың іӌезі таныхтаан:
- Мин паламнаң поғдархапчам, че ол пасха кізілер салбыр тудынған ӱчӱн позы даа чобаға кір парарчых. Аннаңар ол мындағ оңдайнаң матыр ползын тіп сағынминчам...
Оксана ИВАНДАЕВА
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
