ӰРЕГЕ КІРГЕН ИДӀНҶЕКТЕРГЕ - АХЧАЛЫҒ ХАБАЗЫҒ
19.11.2021
Хабарлар
Штаб чыылии. Хакасия правительствозы чонны азырирынаң айғасчатхан идінҷектерге ахчалығ хабазығ пиріп полызар. Че регионның хабазии коронавирус тымозы тузында кирілген хатығластар сылтаанда ӱреге кірген идінҷектерҷе ле пирілер тіп искірілген оперштабтың чыылиинда
Хакасия правительствозындағы коронавирустаң тоғыр кӱрезерінӌе оперштабтың 17 ноябрьға пирілген танығларынаң, республикада сутка аразына наа чуғынӌахнаң 197 кізі ағырыбысхан, имнег тураларынзар, тізең, 149 кізі чатырылған. Хазыхтанып алғаннарның саны халғанӌы суткада - 667 кізі. Че, наа чуғынӌахнаң ағырып, 11 кізі ах чарыхтаң парыбысхан. Ибде имненчеткеннернің саны - 5810 кізі (алындағы кӱннең 239 кізее асхынах). Ағырыбысхан кізілернең пір чирде полған 4169 кізі имӌілер хайиинда тудылча. Пӱӱл республикада 61193 чуртағӌы коронавирустаң хазыхтанып алған.
Коронавируснаң ағырчатханнарны имниріне пу кӱнде тиксі 1889 орған кӧріл парған, оларның 348-зі (18 %) пос турча. Кислородтығ орғаннар саны - 877, сағам 115 андағ орған (13 %) пос.
Республикада пу чуғынӌахтаң тоғыр вакцинацияда аралазып, халғанӌы суткада наа вакцинаның I дозазын 1997 кізі турғыстырған (амды андағларның тиксі саны - 220 839 кізі), II дозазын - 783 кізі (тиксі саны - 164 830). Хакасияның хазых хайраллаӌаң министерствозының танығларынаң, наа чуғынӌахтаң тоғыр вакцинация планы 62,2 %-ке толдырылған. Чонның иммунитеді тыып парар ӱчӱн, регионда чуртағӌыларның 80 %-іне наа прививка турғызыл парарға кирек. 60 час ас парғаннарның 64,5 %-іне турғызылған, Россия синінде пу чахсы кӧзідіг тіп чоохталған. Амды пу прививка ідӧк тойлығ ипчілерге турғызылча, сағам оларның 52-зі андағ вакцинацияда араласхан. Наа вакцина республикада читкіӌе. Ідӧк кислород чидісче, аны халғанӌы кӱннерде регионда 0,5 тоннаа ас-хынах тузалан сыхтылар, суткада - 11,5 тонна.
Тымо-тусхахтаң тоғыр вакцинация план хоостыра 44 %-ке толдырылған. Прививка палаларның 68,2 %-іне турғызыл парған, улуғларның аразында - 44,3 %-іне, тойлығ ипчілернің аразында - 94 %-іне. Халғанӌы туста республикада ОРВИ ағырығларынаң кискектебіскеннернің саны кинетін ӧс сыхтыр - 59 %-ке.
Хакасия пазы Валентин Коноваловтың чахиинаң, министерство вакцинация пункттарын, имнег тураларынаң пасха, ідӧк хоза Ағбанда килкім садығ кіннерінде, чырғалларда азарынӌа тоғысты узаратча.
Пу наада «Алпи», «Калина» паза пасха даа садығ кіннерінде, наа кинотеатрда пол килтірлер, че олар санитарнай нормаларға киліспинчеттірлер. Андағ хоза вакцинация пункты Ағбандағы ӧӧн рынокта тоғынып пастады.
Пӧзік тимненіс тузындағы сыныхтағларны аннаң андар узарадарға кирек тіп искірілген штаб чыылиинда. Хакасияның транспорт паза чол хонии министерствозы танығларынаң, пассажирлерні тарт чӧрчеткен транспортта маска киспин чӧрчеткен кізілер ам даа кӧп тоғасча. Кӧзідімге, 8 ноябрьда иртірілген сыныхтағ тузында 400 азыра транспорт сыныхталғанда, анда административнай сайбағдаңар 12 протокол пазылтыр. Ол пічіктер чарғызар ызылтыр. Андағ сыныхтағны апарчатхан мобильнай ӧмелер санын хозарға кирек тіп чӧп пирілген. Ағбан, Харатас паза Саяногорск городтарның устағ-пастаа чонны тарт чӧрчеткен транспортта сыныхтағ хайди иртчеткеннеңер сан пиріс иткеннер.
Чыылығда хай пірее муниципальнай пӱдістер кискектең тоғыр вакцинация хайди апарылчатханнаңар сан пиріс идіп чоох тутханнар. Ідӧк хайығ айландырылған ас-тамах тимнирінең паза чонны азырирынаң айғасчатхан идінӌектерге республика бюджедінең субсидия пиреріне. Ахчалығ хабазығ коронавирус тымозы тузында кирілген хатығластар сылтаанда ӱреге кірген идінӌектерге кӧрілче. Хакасия пазы Валентин Коновалов пу сурығны пӧгерге чахығ пирген республиканың экономика тилізі министерствозына. Пу ведомствоның искіриинең, субсидия сині региондағы иң асхынах чал ахчазы синінің чарымызына тиңнелер. Тоғысха пічік хоостыра алылған полған на тоғынӌы ӱчӱн субсидия пирілер тіп кӧрілче. Штаттағы тоғынӌыларның пӱӱл 1 ноябрьға тимнелген списогы санға алылар. Тоғынӌылар чох пос киреенең айғасчатхан идінӌектер андағох ахчалығ полызығны ал поларлар. Субсидиялар тӧлиріне ахча регион бюджедінең позыдылча тіп искірген республика пазы.
Идінӌектердең пічіктер пӱӱл 13 - 27 декабрьда алылар. Тӧлеглер оларға ідӧк декабрь тоозылғанӌа тӧлел парар тіп таныхтааннар. Идінӌектернің айланыс пічіктерін алып, оларнаң чӧптезіглер идерінең ала тоғыснаң айғазар Хакасияның тиліс чыындызы. Валентин Коновалов экономика тилізі министрі Виктор Богушевичке чахығ пирген:
- Пу неделяда прай нормавтивнай пічіктерні тимге сығар саларға. Декабрьда тӧлеглерні пиріп пастирға кирек.
Хайди таныхталған чыылығда, коронавирустаң тоғыр прививка турғыстырған кізілерге наа норма кӧрілген, хайзы кӱзіне пу неделядаң кірче. Наа чуғынӌахтаң тоғыр прививка турғыстырған чуртағӌыларға коронавируснаң ағырыбысхан кізілернең пір чирде полған соонаң карантинде одырбасха чарадылча. Андағ карантинде 14 кӱн одырарға киректелче. Ідӧк изоляцияда полбасха чарадылча коронавируснаң ағырған кізілерге, наа чуғынӌахнаң ағырған соонаң 6 ай ирткелек полза. Хакасияның ӧӧн санитарнай имӌізі Татьяна Романованың чооғынаң, наа нормалар хоостыра ам пасха хан чирінең айланған кізілерге, хайзылары наа чуғынӌахтаң тоғыр прививка турғыстырғаннар, пастағы ӱс кӱн аразына хазиин хайди даа сыныхтанарға кирек чоғыл.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде