ЫНАРХАС ЧИҢІС ТУТТЫ
24.11.2021
Хабарлар
Спорт. Хакасияның паза Якутияның командалары аразында олаңай кӱресче тоғазығ ирткен
Пу кӱннерде Ағбандағы 24 № школаның кӱрес залында 11 - 14 частығ спортсменнернің аразында улуғ нимес марығ ирткен. Аның пастағҷызы - тренер Ефим Бургундосов. Мероприятие Хакас Республиканың 30 чылына чарыдылған.
Якутияның командазын тренерлер Пётр Черкашиннең Владимир Савинов ағылғаннар. Марығ пасталар алнында оларнаң хысхаҷахти чоохтазып алғам. Пётр Петрович Черкашин Якутск городтаң, ол В.П.Керемясовтың адынаң олаңай кӱресче олған спорт школазында істенче. Тренер тоғызына 20 артиинаң чыл пир салтыр. Ӱгренҷілерінең 6 кізі Россияның спорт узы нормативін толдырыбысхан. Амғы туста Пётр Черкашиннің устаанынаң 46 пала олаңай кӱрестің чазыттарын асча.
Аалҷының чооғынаң, Саха (Якутияда) олаңай кӱрес ӧӧн спорт кӧрімнері санына кірче. Аннаң илееде кізі айғасчаттыр. Якут чонынаң ікі олимп чемпионы сыххан. Саблығ кӱресчі Роман Дмитриев, 48 кг кӧдірімде харбазып, 1972 чылда Мюнхенде алтын медаль холға кирген, 1976 чылда Монреальда - кӱмӱс медаль. Ікінҷі олимп чемпионы - Павел Пинигин. Ол 68 кг кӧдірімде харбастыр. Ідӧк чон поғдархазы Александр Иванов полча. Спортсмен - Олимп ойыннарының кӱмӱс призеры. Павел Пинигиннең Александр Иванов медальларны 1976 чылда Монреальда утып алғаннар. Амғы спортсменнердең Айаал Лазаревті таныхтирға кирек. Ол, Киргизия ӱчӱн турызып, 2016 паза 2021 чылларда Олимп ойыннарында араластыр.
Ікінҷі тренер Владимир Савинов Оймякон аймахтағы Томтор аалдаң. Тилекейде Оймякон аймах кізі тӧреміл чуртапчатхан иң соох чирге саналча. Хысхызын анда 60 градус соох поладыр. Томтор аал Якутсктаң пір муң километр оортах орныхча. Владимир Николаевич орындағы спорт школазында істенче. Олңай кӱресче секцияа 26 пала чӧрчеттір. Ӱгренҷілерінең ӱс кізі Россияның спорт узы полча. Хайди тренер таныхтаан, республикада национальнай спорт кӧрімнерін улуғ хайығда тутчалар. Аннаңар спорт школазында ідӧк масрестлингче (ағас тартары) паза алтынзархы чоннарның кӧп оңдайлығ спорт кӧрімінҷе секциялар пар. Ағас тартарынаң прайзы даа таныс полар. Кӧп оңдайлығ спорт кӧрімінзер сырғайға урух тастиры, санах азыра атығары, тайахтығ чӱгӱрері, ікі азахнаң пір саңай атығары паза палтыны ырахха тастиры кірчеттір. Ол палты оңдайынаң бумерангка тӧӧй, тиріг 150 метр ырахха учухча.
Сидіксіністердеңер чоохтаза, халғанҷы чылларда аалда чуртағҷылар саны хызырыл партыр. Амғы туста Томторда 1100 кізі чуртапча, школада 120 ӱгренҷі. Владимир Савинов оолағастарнаң на хада тоғынча, аннаңар палаларны секцияа чыып аларға оой нимес тіпче. Марығларға чӧрерге ахча чидіспинче. Кічіг спортсменнер чорыхтарға паба-іҷелерінің ахчазына чӧрчелер. Якуттар Хакасиязар Россияның саблығ пилоды Пётр Аткниннің хумартхызына чарыдылған региондағы турнирге килтірлер. Ол тынағ кӱннерінде Ағбан пилтірі аалда ирткен.
Хакасия паза Якутия командалар аразындағы марығзар айланза, анда 14 кізі кӱзін сынаан. Полған на ӧмедең 7 кӱресчі сыххан. Спортсменнер, часха кічіг дее ползалар, матап сіренгеннер. 41 кг кӧдірімде ле хабыс табырах ирт парыбысхан. Владик Михайлов пістің оолахты ойнаан на чіли силібіскен. Василий Винокуровнаң Баел Талипов 51 кг кӧдірімде тоғасханнар. Баел матап удурласхан даа полза, якут кӱресчее 4:16 саннаң утыр салған. Хакасия командазына Владимир Боргояковнаң Намзарай Куулар чиңіс ағылғаннар, пасхазына оң полбаан. Тоғазығ 2:5 саннаң тоозылған. Якут спортсменнерін махтирға кирек. Ырахтын киліп, пасха регионда постарын турыстыра кӧзітчелер. Пістіңнерге, тізең, стенелер дее полыс полбааннар. Итсе-де, прайзы ынархас чиңіс тутты тіп чарас салған.
Сизінгенде, кічіг спортсменнер кӧйтіктен полбинчалар. Олар прай кӧңнілерін салып харбасчалар. Полғаны ла «ыырҷызын» учаландырыбызарға кӱстенген. Марығ чарым час парған. Ол тоозылғанда, араласчыларға улуғ нимес сыйыхтар читірілген. Сыйыхтарнаң идінҷек Максим Аткнин хабас пиртір.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде