РЕСПУБЛИКА ТИЛІЗІНЕ ХОЗЫМ ИТКЕН ӰЧӰН
08.12.2021
Хабарлар
![РЕСПУБЛИКА ТИЛІЗІНЕ ХОЗЫМ ИТКЕН ӰЧӰН РЕСПУБЛИКА ТИЛІЗІНЕ ХОЗЫМ ИТКЕН ӰЧӰН](/upload/iblock/ad0/ad0ba483b3d2ac7edd848030afef4199.png)
Сыйыхтас. Хакасияның Ӧӧркі Чӧп кнезі Владимир Штыгашев Хазна Думазының депутады полған Надежда Максимоваа «Чахсы киректер ӱчӱн» халых орденін читірген
Хакасияның Москвадағы тӧреміл представительствозында республиканың Ӧӧркі Чӧп кнезі Владимир Штыгашев, аның полысчызы Владимир Тогочаков Россияның VI паза VII хығыртығларының Хазна Думазының Хакас Республикадаң сығара депутады полған Надежда Максимованаң тоғасханнар.
Владимир Штыгашев Москвазар тоғыс сурығларын пӧгер хоостыра чӧрген. Оларның пірсі чапсых сылтағлығ полған - хакас чонның XIV съездінде, хайзы пу чылның апрельінде ирткен, Надежда Максимованы «Чахсы киректер ӱчӱн» орденнең сыйыхтирға чарадығ алылған.
Хакасияның Ӧӧркі Чӧп кнезі Владимир Штыгашев хакас чоны Надежда Максимоваа республика тилізіне хозым иткен ӱчӱн алғызын читірчеткенін таныхтаан. Таныхтирға кирек, Надежда Максимова араласханынаң республикада музей-культура кіні, перинатальный кін, республиканың Г.Я.Ремишевскаяның адынаң имнег туразының корпузы, Катановтағы паза Ис пилтіріндегі школаларның ікінҷі теезі пӱдірілген, ідӧк пасха даа проекттер чуртасха кирілген.
Надежда Сергеевна хакас чонның республикадағы Улуғлар чӧбіне аның істенізіне пӧзік паалағ пирген ӱчӱн алғызын читірген. Аның чооғынаң, пу сыйыхты Владимир Штыгашев читіргені ағаа чапсых полған. Аннаң пасха, ол Хакасия представительствозын піди чылығ удурлаан ӱчӱн алғыстаан. Ідӧк прайзына хазых, чахсы чуртас паза прай киректерде чидіглерге чит турарға алғаан.
- Тӧреміл представительствозы адынаң паза позымның адынаң Надежда Сергеевнаны пу сыйых алғанынаң чылығ алғыстапчам, - теен Хакасияның Москвадағы тӧреміл представительствозының устағҷызы, республика пазының орынҷызы Юлия Исмагилова.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде