«ХЫСХЫ САҢНАРЫНЫҢ» СЫҢЫРААНЫ
08.12.2021
Хабарлар
![«ХЫСХЫ САҢНАРЫНЫҢ» СЫҢЫРААНЫ «ХЫСХЫ САҢНАРЫНЫҢ» СЫҢЫРААНЫ](/upload/iblock/ad5/ad571669b42d7cc65538209387dc6f56.png)
Ырҷылар марии. Ағбанда С.П.Кадышевтің адынаң культура паза чон чайаачызы кінінің кічіг залында хакас сарыннарын пасчатхан паза толдырчатхан авторларның марии ирткен
Пӱӱл пу марығ республика синінде 19-ӌы хати иртірілген. Аның ӧӧн пӧгіні - хакас тілінең сарыннар паза кӧглер пасчатхан авторларның наа чайаачы тоғыстарынаң танызары. «Хысхы саңнары» марығны 1993 чылда Россия культуразының саблығ тоғынҷызы Игорь Боргояков тӧстеен. Ол марығ хоостыра пістің чирде наа сарыннар паза наа ырҷылар чыл сай хозылча.
Пандемия тузы даа полза, марыға Таштып, Алтай, Пии паза Шира аймахтарынаң араласчылар килгеннер, ідӧк Ағбан паза Сорығ городтардаң полғаннар. Оларның кӧбізі алында ыр паза тахпах марығларында араласчаң. Аннаңар сценада туртухпин тудынғаннар. Пастап чыылған чонны сарыннарынаң паза теелбектерінең «Кӱн чахайағы» ӧменің араласчылары (устағҷы Анна Бурнакова) ӱтерткеннер.
Марығ пасталар алнында чарғыҷыларнаң таныстырғаннар. Чарғыҷылар ӧмезіне кіргеннер Россияның паза Хакасияның саблығ артизі Евгений Улугбашев (кнес полған), Россия культуразының саблығ тоғынҷызы Игорь Боргояков паза Хакас Республиканың саблығ артизі Инна Майнагашева.
Марығ оңдайлары хоостыра ырҷылар 14 частаң кічіг полбасха киректер. Олар постарының алай хакас композиторларның ікілер сарын толдырчалар, ідӧк хакас чон сарынын сарнапчалар. Марығ чарғыҷылары ырҷыларның наа сарынны хайди толдырчатханына, хайдағ кӧг тириинең ойнапчатханына паза хайдағ хакас кип-азаан кис салғанына хайығ айландырғаннар. Итсе-де, «Амғы тус» номинацияда фонограмманаң даа тузаланарға чарир полған.
Ырҷылар мариин «Кибір» номинацияда Таштып аймааңдағы Пыдырах аалның чуртағҷызы Нина Торокова пастаан. Ол, хомыснаң ойнап, «Син хараада килбеезің» паза «Хомызым» сарыннарын толдырған. Чоохтирға кирек, Нина Кононовна мындағ марығларда удаа аралазадыр. Аның кӱстіг ӱні кӧрігҷілернің хайиин тартхан полар. Аннаңар пу номинацияда ол пастағы орын алған.
Сорығ городтаң килген Александр Санзараев ікінҷі орын алған. Ол ідӧк марығларда удаа араласча. Хакас тілін паза чатханнаң ойнирға позы кӱстеніп ӱгреніп алған. Пӱӱл ол оолғын паза хызыҷаан хада ағылтыр. Палалары ідӧк хакас тілінең сарнааннар паза чатханнаң ойнааннар. Хайди махтабас андағ пабаны!
Позы ӱгреніп алған паза палаларын ӱгретче. Іди пістің кибірлерібіс хайраллалча нимес пе?
Ӱзінҷі орында пол парған чиит хыс Ольга Мистрикова (Ағбан). Аның ӧтіг, нымзах ӱнін иссең, ол мыннаң мындар ӧзеріне ізенчезің.
«Амғы тус» номинацияда он кізі араласхан. Анда улуғ частығлар паза наа ла сценаа сыхчатхан чииттер полғаннар. Іди Шира аймаанаң килген Татьяна Конгарова позынаң хада «Таныҷах» ӧмені ағылтыр. Олар прайзы улуғ частығ ууҷалар. Олар ноға-да Евдокия Тыгдымаеваның «Чиит ӧӧремнеңер» сарынын паза хызылларның удаа сарналчатхан тахпаан толдырғаннар. Минің сағызымнаң, олар, пастағы номинацияда аралазып, постарының тахпахтарын сарнап пирген ползалар, килістіре поларҷых.
Пии аймаанаң килген Наталья Чичинина, іҷезі Полина Артонованың «Чилліг наңмыр» паза «Сіліг той» кибелістеріне кӧг пазып, кӧгліг ырлап пирген. Пу сарыннар чыылған чонның даа кӧңніне кірген осхас, оларны ізіг айа сабызынаң удурлааннар. Іди Наталья Чичинина пу номинацияда ӱзінҷі орын алған. Раиса Сербигешева ікінҷі орында пол парған. Ол, позы сарыннар пазып, мындағ марығларда ідӧк удаа араласча. Чиит хызыҷах Алиса Томочакова Раиса Сербигешеваның сарыннарын толдырған. Олар ікӧлең Асхыс аалдаңнар.
Чарғыҷылар пастағы орынны Саяна Собуроваа (Ағбан) орта пиргеннер тіп сағынчам. Чиит хыс эстрада сарыннарының марығларында тӧреміл араласча. Ырларны паза кӧглерні позы пасча паза толдырча. Чоохтирға кирек, хомай нимес сарнапча.
Чиңіс тутханнарға дипломнар паза ахчалығ сыйыхтар читірілген. Амды ізенербіс, килер чылда наа сарыннарның чайаачылары кӧп арах полар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде