Находкадағы театр – Хакас чирiнде
03.11.2022
Хабарлар
![Находкадағы театр – Хакас чирiнде Находкадағы театр – Хакас чирiнде](/upload/iblock/66d/66d7555621fcba7d6f7841aa160cf721.jpg)
Хакасияның культура министерствозында пресс-конференция ирттi. Ол Находка городтағы Г.С.Анисимовтың адынаң кӧклӧ театрының артисттерi «Олғаннарға паза чииттерге улуғ гастрольлар» федеральнай программа хоостыра Хакасиязар килгенiне чарыдылча.
Артисттер пiстiң республиказар ӱс ойын ағылғаннар. Таңда, 4 ноябрьда, 11.00, 13.00, 15.00 частарда М.Ю.Лермонтовтың адынаң Орыс драма театрында Находкадағы аалҷылар Корней Чуковскийнiң произведениезi хоостыра «Муха-Цокотуха» ойынны кӧзiдерлер.
5 ноябрьда 11.00 паза 13.00 частарда С.П.Кадышевтiң адынаң чон чайаачызы кiнiнiң улуғ залында «Русачок» ойын турғызылар. Пу нымахта кӧг кӧп полар. Анда Русачоктаңар чоох парар. Ӧӧн матыр арығҷа пас чӧрiп, кемге хубул парарға сағынча. Ол аба алай тиин, ёж алай тӱлгӱ полыбызарға итче. Че соонаң позыох халарға чарадыбысча.
6 ноябрьда 11.00 паза 13.00 частарда С.П.Кадышевтiң адынаң чон чайаачызы кiнiнiң улуғ залында «Морозко» ойын полар.
Таныхтирға кирек, «Нымах» Хакас кӧклӧ театрының артисттерi 4 – 6 ноябрьда Приморскай крайның Находка городынзар удур ойыннар апарыбысханнар. Пiстiңнер анда «Как Котёнок учился мяукать» (3+), «Узелок со сказками» (3+), «Соседи» (3+) нымахтарны кӧзiдерлер.
– Хакасияда пiстi чылығ удурладылар, мында амыр-иптiг чон чуртапча. Пiске Сойан-Сус ГЭС-ты кӧзiт пирерге молҷааннар, – теен Находкадағы кӧклӧ театрының директоры Наталья Алейникова.
– «Улуғ гастрольлар» федеральнай программа – уғаа тузалығ проект. Аның полызиинаң театрлар удур-тӧдiр ааллас чӧрчелер. Сынында Находка город Хакасиядаң ырах нимес, че ойыннар ағыларға уғаа аарлыға сых парча, аннаңар федеральнай программанаң ӧткiн тузаланарға кирек, – таныхтаан Хакасияның культура министрi Светлана Окольникова.
Автор :
Татьяна Тютюбеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде