УЛУҒ ААРЛАС МАТЫРЛАРҒА
![УЛУҒ ААРЛАС МАТЫРЛАРҒА УЛУҒ ААРЛАС МАТЫРЛАРҒА](/upload/iblock/231/2312268c2d705e98dcfd3435d1657f20.jpg)
Хумартхылас. Ирткен субботада Ағбанда тимір чол вокзалы алнындағы ачыхта «Кизек чаалазығларда чуртастарын пир салған Хакасияның оолларына» хумартхы тас хыринда митинг полған
Мероприятие пасталар алнында тимір чол вокзалы алнындағы ачыхта кӧп чон чыылыс парған. Хумартхы тас хыриндағы площадканың ікі саринда сеткалығ стенеде кизек чаалазығларда чуртастарын пир салған чааҷыларның сомнары хызылых полған. Iдӧк анда юнармеецтер паза волонтерлар Украинада иртірілчеткен ӧнетін чаа операциязында чуртастарын пир салған матырларның сомнарын тутханнар. Автоматтығ чааҷылар аарластығ постта турғаннар.
Кизек чаалазығларда чат халған Хакасияның матырларын сағысха киріп, оларға улуғ аарлас читірерге килгеннер республика Правительствозының паза ӧӧркі Чӧбінің устағҷылары, хазна ӱлгӱ органнарының, чииттернің паза ветераннарның халых пірігістерінің кізілері, кизек чаалазығларда араласхан ветераннар, iдӧк чииттер паза чуртастарын пир салған чааҷыларның туған-чағыннары паза нанҷылары.
Хайди мероприятиеде искірiлген, пістің чааҷылар, Афганистанда, Венгрияда, Даманскай олтырыхта, Эфиопияда, Анголада, Мозамбикте, Египетте, Сирияда, Алтынзархы Кавказта, Кубада, Чечняда, Югославияда полған кизек чаалазығларда, амды Украинада неонацизм режимінең тоғыр паза Донбасстың чуртағҷыларын арачылирынҷа иртірілчеткен ӧнетін чаа операциязында аралазып, чуртастарын пир салғаннар.
Iкi оолағас, постамент алнында турып, кизек чаалазығлардағы киректерге чарыдылған патриот кибелістерін хығырған. Россияның паза Хакасияның гимннері толдырылған соонаң митинг азылған. Сӧс Хакасия пазы Валентин Коноваловха пирілген.
– Пӱӱн піс, кизек чаалазығларда чуртастарын пир салған матырларны сағысха киріп, оларға аарлас читірчебіс. Пістің чааҷылар, Чир-суубыстың пос чуртазы, амыры паза сын кирек ӱчӱн чаалазып, чуртастарын пир салғаннар. Матырларны, Ада чир-суубыстың сын патриоттарын ӧскір салған паба-iҷелер алнында пазыбыс тӧбін тӱзірчебic. Олар чааҷы службазын чахсы толдыр салғаннар. Чир-суубысха пирін салып, піске прайзыбысха патриотизм кӧзідімi полып халчалар. Піс оларны хаҷан даа ундутпаспыс, матырларға сабланыс хаҷанға даа! – теен республика устағҷызы.
Мероприятиені иртірчеткен прай кизек чаалазығларда паза ам Украинада иртірілчеткен ӧнетін чаа операциязында чуртастарын пир салған чир-суғҷыларыбыстың ады-солаларын изере адаан. «Олар прайзы чиит полғаннар, чуртирға тың сағынғаннар...» – теен ол. Чааҷылар автоматтардаң киизер, салют идіп, ӱc хати атханнар. Анаң пір минута сым турары чарлалған. Ырҷы Ирина Кулагашева «Россия моя» сарынны толдырған соонаң хумартхы тассар чахайахтар салылған.
Пастап Хакасия Правительствозы паза ӧӧркi Чӧбі адынаң, республика чонының тиксі хумартхызын таныхтап, сабаллығ, узун гирлянданы салғаннар регион пазы Валентин Коновалов паза ӧӧркі Чӧп кнезінің орынҷызы Евгений Молостов. Анаң чахайахтар салғаннар Ағбан городтың пазы Алексей Лёмин, орынҷызы Владимир Крафт, министерство-ведомстволарның, кӱс структураларының, «Боевое братство» халых пірігізінің региондағы пӧлиинің, пасха даа халых пірігістерінің устағҷылары, чааҷылар, чат халған матырларның туған-чағыннары паза нанҷылары. Анда кӧбізі ылғап турған.
Мероприятие тузында чоох алызарға оң полған Вера Александровна Морозованаң. Аның хада хонғаны Пётр Морозов Украинада иртірілчеткен ӧнетін чаа операциязында ӱр ниместе ле чуртазын пир салған. Пётр гвардияның рядовойы полған.
Iдӧк анда чоох алысхабыс Августа Семёновна Сизоненконаң (хыс фамилиязы – Тюкпиекова). Хайди ол искірген, позы Пии аалда чуртапча, тоғынча, чыл сай пеер кил парча. Тӧреен-ӧскен чирі – Пии аймаандағы Хызыл хара суғ аал. Харындазы Сергей Тюкпиеков, школа соонаң пір чыл тоғынып, армияа хабылар алнында прай ахчазын ағаа пир салған. «Армияда мағаа ноо кирек полар ол ахча», – теен. Свердловск облазында срочнай служба иртчеткенде, аны Афганистанзар чаалазарға ысханнар. Анда ол 1982 чылда чуртазын пир салған. Сергей Хызыл Чылтыс орденінең сыйыхтатхан, аны Хызыл хара суғ аалда чыып салғаннар. Ағаа 20 ле час полған.
Николай Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |