«САЯНЫНЫҢ» ПАСТАҒЫ ЧИҢІЗІ
07.12.2022
Хабарлар
![«САЯНЫНЫҢ» ПАСТАҒЫ ЧИҢІЗІ «САЯНЫНЫҢ» ПАСТАҒЫ ЧИҢІЗІ](/upload/iblock/3e4/3e485314d3a5bc1ec640d9fc8e4b4571.jpg)
Меспектіг хоккей. «Саяны» команда пастағы ибдегі ойынны иртірді. Ол «Восток» (Арсеньев) ӧменең тоғасхан
Хакасияда хысхы – меспектіг хоккейнің тузы. Кӧрігҷілер 28 градустығ соохта даа пістің хоккеисттер ӱчӱн «ағырарға» тимделер. Итсе, тоңарға хынығ нимес. «Саяны» команда турнир таблицазында 7 командадаң 6-ҷы орында парчатса, ирік чох ойын кӧрерге килерзің. Спортсменнерге хабас пирерге кирек нооза.
Пӧзік лиганың командалары аразында тиксі Россия марығлары 21 ноябрьда пасталғаннар. Арға-мӧрійнің I чардығы 2023 чылның 24 февральына теере иртер. Амғы сезонда анда 22 хоккей командазы ойнапча. Оларны тӧрт ӧмее чарыбысханнар. Мының алнындағы чіли, «Саяны» тӧртінҷі ӧмеде ойнапча. Хоккеисттерібіс пус чазызында «Енисей-2» (Хызылчар), «Сибсельмаш-2» (Новосибирск), «Байкал-Энергия-2» (Иркутск), «Кузбасс-2» (Кемеров), «СКА-Нефтяник-2» (Хабаровск) паза «Восток» (Арсеньев) командаларнаң тоғазарлар.
Ирткен айда спортсменнерібіс Хызылчарда «Енисей-2» команданаң ойнааннар. Пастағы матч 0:2 саннаң тоозылған, ікінҷізі – 4:7 саннаң. Ачырғастығ. Кізі «Саяны» алнында парчатханына ӱгрен партыр. 5-6 декабрьда хоккеисттер Ағбанда «Востокнаң» хада тоғасханнар. Аалҷылар турнир таблицазында халғанҷы орында полтырлар. Чиңіс прайзына кирек. Ойын хайди парар ни?
«Востоктың» паза «Саянының» аразындағы матч піcтің команданың пастағы ибдегі ойыны полған. Кибір хоостыра аны пайрамни асханнар. Хоккеисттерні паза «ағырчатхан» улусты чайаачызынаң «Диамант» ӧме ӧріндірген. Анда Дмитрий, Марина паза Иван Павленколар сарнапчалар. Олар, «Саяны» командаа чарыдылған сарынны толдырып, чыылған чонның кӧңнін кӧдіргеннер. «Алтыр» мода театрының хыстары командаларның капитаннарын паза чарғыҷыларны айраннаң сыйлааннар. Хакас абахайлары чох республикада пір мероприятие дее иртпинче. Анаң сӧс аарлығ аалҷыларға пирілген. Республика пазының орынҷызы Михаил Побызаков, Хакасия пазы Валентин Коноваловтың адынаң чоох тудып, чиңістер тударға, сіліг ойын кӧзідерге алғаан. Ӧӧркі Чӧп кнезінің орынҷызы, Хакасияның меспектіг хоккей федерациязының президенті Юрий Шпигальских теен:
– Прайзын хоккей пайрамынаң алғыстапчам. Пістің хоккейнің таңдағызына киртінчем. «Саяны» – чемпион!
Пу сӧстерні кӧрігҷілер ізіг айа сабызынаң удурлааннар. Хоккеисттер пастағы минутадаң пуста ӧткін хайын сыхханнар. Кӧрігҷілер сууласчатсалар, хайдар парарзың. «Ыырҷы» пістіңнерге ікі хати голны сала ла сабыспады. Владислав Атапин хаалханы арачылап халған. 12-ҷі минутада «Саяны» сан асты. «Востокка» меспекті Александр Захваткин Михаил Лисюктың полызиинаң гол кире сабысхан. Трибунадағыларға – ӧрініс. Ікінҷі голны 20 минута сағирға киліскен. Пазох Александр Захваткиннең Михаил Лисюк, хада-пірге тудынып, «ағырчатханнарның» кӧңнін кӧдіргеннер. Пӱӱл «Саяны» командазар 8 наа хоккеистті алып алғаннар, оларның санында Михаил Лисюк. Спортсмен Архангельсктең. Ол «Водник-2» ӧме ӱчӱн турысхан, пылтыр «Мурманда» ойнаптыр. Сизінгенде, хоккеист пуста прай кӧңнін салып ойнапча. Михаил «Енисей-2» командаа гол сабызарға маңнанған, амғы матчта позын турыстыра кӧзітті.
Салтарында ойын 3:0 саннаң тоозылған. «Востоктың» хаалхазынзар ӱзінҷі меспекті Вадим Афанасьев кире сабысхан. Минің кӧрізімнең, пу чидігде кӧрігҷілернің хозымы улуғ. Олар хоккеисттерге пір орында турарға пирбееннер. Сан 3:0 пол парғанда даа, «Саяны», алнынзар. Гол кирек» тіп хысхырғаннар. Хоккеисттер пуста, хада-пірге ойнир орнына, алынҷа тудынғаннар. Хаалха хадағҷызын чалғызан артыс салҷаңнар. «Востокты» чиңіп алған соонда «Саяны» турнир таблицазында пизінҷі орында парча. 6 декабрьда ирткен матчтаңар пазағы номерде искірербіс.
Таныхтирға кирек, алында меспектіг хоккейҷе Хакасия командазының ибдегі ойыннары декабрьда иртчеңнер. Пӱӱл календарьзар алызығлар киріл партырлар. Матчтарның илеедезі февральда полар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде