ИҢ ПӦЗІК СЫЙЫХ – «САЯНОМОЛОКО» ООО-ни
28.12.2022
Хабарлар
![ИҢ ПӦЗІК СЫЙЫХ – «САЯНОМОЛОКО» ООО-ни ИҢ ПӦЗІК СЫЙЫХ – «САЯНОМОЛОКО» ООО-ни](/upload/iblock/f14/f14d88a214d3a1be7304ce510f205099.jpg)
Сыйыхтас. Пу кӱннерде Л.Р.Кызласовтың адынаң Хакас национальнай чир-суғ ӱгренҷең музейде «Россияның иң артых 100 ниме-ноозы» марығның чиңісчілеріне сыйыхтар читірілген
Тиксі Россия марииның хазна паза регион синіндегі чиңіcчілеріне сыйыхтарны Хакасия пазының пастағы орынҷызы Татьяна Курбатова паза республиканың экономика тилізі министрі Виктор Богушевич читіргеннер. Прай 48 араласчы сыйыхха турысхан: аарластығ танығларға, дипломнарға, киречілег пічіктеріне. Иң пӧзік сыйыхха – «Качество лидері» атха – «Саяномолоко» ООО турысхан, аның устағҷызы Данил Левицкий полча. 2022 чылда марығның «Ас-тамах» номинациязында пу тиксі хазнада читірілген чалғыс сыйых полча.
– Арғыстар, иң пастағызын мин сірерге тіспен паза тӱзімніг істенчеткеннерің паза пик сындырлығ полчатханнарың ӱчӱн алғыс читірерге сағынчам. Халғанҷы туста сірерге сидік оңдайларда тоғынарға киліскен: CОVID-19, Россиядаң тоғыр хатығластар, ниме-нооны читірчеткеннер чох халғаны, ниме-ноо сығарарынҷа сидіксіністер паза илееде пасха сурығ, че сірер кӧңніңер тӱзірбеезер, оңдайларға килістіре тоғынып, чахсы ниме-ноо сығарчазар паза полызығларны пӧзік синде читірчезер. Сірер сынында 24 час паза неделяда 7 кӱн тоғынчазар, тоғыс орыннарын тӧстепчезер, таныхтирға сағынчам, пӱӱнгі кӱнде республикада кічіг паза ортын пос киреенде 70 муң чуртағҷы істенче. Олох туста сірер наа чидіглерге чидерге кӱстенчезер. Наа чидіглер, часка паза мыннаң мындар тиліс! – таныхтаан Виктор Богушевич.
Сыйыхха турысханнар санында идінҷектер Татьяна Пудова (аймах чон кип-азаан тікче, ол санда хакас чонның), Павел Боргояков (талған тимнепче), Ефросинья Сагалакова (турист полызығлары), фермер Эдуард Ухварин («Алтын подкова» комплекс ээзі) паза пасхазы полғаннар.
Павел Боргояков пу марығда ікінҷізін араласты. Алындағы чылда паза пӱӱл федеральнай синдегі дипломнарға турысхан. Аның кӧрізінең, марығ ас-тамахтың тимнелген синін киречілепче, сыйых алғаны аның чахсы сығарылчатханын кӧзітче. Пӱӱнгі кӱнде Павел Геннадьевич тимнеен талған республиканың садығ тураларында ла садылбинча, ідӧк аны Оzоn садығ платформазында таап аларға чарир.
Ефросинья Сагалакова пӱӱл ідӧк марығда аралазарға чаратхан. Ковид тараан туста туристтер саны хызырылған сылтаанда ус ипчі пос киреен чабысхан. Амды ол посха тоғыс таапчатхан чіли санға тур салған. Идінҷек полчатханда, «Россияның иң чахсы 100 ниме-ноозы» марығда тӧреміл аралас турҷаң. Іди 2016-2017 чылларда Ефросинья Ефимовна «Качество отличнигі» аарластығ таныға турысхан, лауреат пол турған. Пӱӱл марығда, наа аттығ аралазып, киис ниме-ноо сығарған. Регион дипломына турысхан.
– Алында Аршаннардағы культура туразында «Алтынай» ипчілер лигазы пастыра олғаннарға кииснең узанарынҷа кружоктар иртірген ползам, амды ӱгредіг министерствозы хоза ӱгредіге частар пирген. Аршаннардағы олғаннардаң пасха ідӧк сартыхтағыларнаң айғасчам. Ӧнетін ӱгредіг программазын тимнеем паза аны арачылаам. Піс олғаннарнаң хада киистең кӧклӧлер, поғоҷахтар, ойнаҷахтар паза пасха ниме-ноо тимнепчебіс. Кӧзідіглерде аралазып, тоғыстарны садыға сығар турчабыс. Неделяда пір кӱн олғаннар кииснең пос алынҷа айғасчалар. Палалар, ол санда оолахтар даа, кружокка хынып чӧрчелер, – чоохтапча Ефросинья Ефимовна. – Ӱлгӱ органнары кружокка ниме-нооны аларға полысчалар. Пӱӱл ол пӧгінге 23 муң салковай позыдылған. Ол Наа чылға удур кирек ниме-нооны аларға чахсы хабазығ полған.
Аршаннар аалдағы олғаннар кииснең узанарға пастағы ла чыл ӱгренминчетселер, Сартыхтағы пасталығ школа ӱгренҷілері пӱӱл ле пу кружокка чӧр сыхханнар. Ӱгретчі кізі оларның пастағы хаалағларына чӧпсінче паза килчеткен чылда холлары сала чітіг поларына ізенче.
Улуғлар даа аразында кииснең узанары сабланча. Пӱӱл ус холлығ ипчіні Сафьяннар аалынзар кинектерге ӱгредіг тоғазығларын иртірерге хығырғаннар. Ефросинья Сагалакова оларнаң хада ӱс кӱн тоғынған. Чоохтирға кирек, пу аалдағы ТОС гранттарға аймах сағыстар чуртасха кирче паза аннаң-мыннаң чонны чыып аларға кӱстенче.Таштыптағылар, индіркі тӧӧдегілер ідӧк ӱгредіг тоғазығларын иртірерге сурынчалар. Ефросинья Ефимовнаа тус ла чоохтап пирзе, позы, кирек нимелерні алып, килерге тимде. Киисті ол Ағбан пилтірінде садызып алчаттыр, ӧңнігні – ӧнетін садығ туразында.
Ефросинья Ефимовнаның таниинаң, «Россияның иң чахсы 100 ниме-ноозы» марығда араласханы ол чайаан ниме-нооның садиин чахсыландырча. Кізілер марығ сыйыхтарын хайди даа санға алчалар.
«Россияның иң чахсы 100 ниме-ноозы» марығ 25 чыл иртіріл парир. Пу тус аразына регион синінде пістің республикада ниме-ноо сығарчатхан паза полызығ читірчеткен 800 азыра идінҷек паза предприятие араласхан. Федеральнай чардыхта 1000 азыра ниме-ноо лауреат паза дипломат пӧзік аттарға турысхан.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде