ПУ ЧЫЛДАҢ ПАЛАЛАРҒА ПIРГЕ ПОСОБИЕ ТӦЛЕЛЧЕ
11.01.2023
Хабарлар
![ПУ ЧЫЛДАҢ ПАЛАЛАРҒА ПIРГЕ ПОСОБИЕ ТӦЛЕЛЧЕ ПУ ЧЫЛДАҢ ПАЛАЛАРҒА ПIРГЕ ПОСОБИЕ ТӦЛЕЛЧЕ](/upload/iblock/c84/c8432bfbe1d6ef5152f58a2416360ae2.jpg)
Россияның Социальнай фондының
Хакасияҷа пӧлии устағҷызы Людмила Иванова
Пресс-конференция. 2023 чылның январьынаң палаларға паза тойлығ ипчiлерге пiрге пособие тӧлелче. Амды наа тӧлегнең айғасча Россияның Cоциальнай фонды, ол алында Пенсия фонды (ПФР) адалған
Наа тӧлегдеңер, пресс-конференция иртiрiп, чарыда чоохтаан Россияның Cоциальнай фондының Хакасияҷа пӧлии устағҷызы Людмила Иванова. Ол пу фондтың устағҷызына 2023 чылның 1 январьынаң турғызылған. Алында Людмила Васильевна ПФР-ның Хакасияҷа пӧлиинең устаан. Амды пу хазна органы Cоциальнай страхование фондынаң (ФCC) пiрiктiрiлген сылтаанда Cоциальнай фонд адалча.
Чоохтирға кирек, наа структура полыбысханда, анда пу чылдаң 600 кiзi iстенче. Наа чылда оларның санына ФCC-та iстенген 120 кiзi хозылған. Cоциальнай страхование фондының Хакасияҷа пӧлии туразы наа структураның iкiнҷi офизiне саналча. Че клиенттернең тоғынчатхан служба наа фондтың ӧӧн офизiнде орныхча. Амды наа тӧстелген фонд iдӧк iстенiс паза социальнай арачыланыс министерствозы толдырған хайзы-да тоғыстарнаң айғасча. Кӧзiдiмге, пала пособиелерiн тӧлирiнең.
Cоциальнай фонд 2023 чылның январьынаң 0 – 16 частығ палаларға паза тойлығ ипчiлерге пiрге пособие тӧлеп сығар. Пiрге пособие, тiзең, пис социальнай тӧлегнi пiрiктiрче: ӱс часха читкелек пастағы паза ӱзiнҷi пала ӱчӱн ай сай пирiлчеткен iкi тӧлег, 3 – 8 частығ паза 8 – 16 частығ олғаннарға ай сай тӧлелчеткен iкi пособие, iдӧк тойлығ ипчiлерге кӧрiлген тӧлег. Наа тӧлег чуға чуртапчатхан сӧбiрелерге пирiлер. Ол пiстiң хазнаның гражданнары полчатхан паза Россияда сыбыра чуртапчатхан паба-iҷелерге паза палаларға тӧлелче. Тойлығ ипчiлерге 12 неделяа читкенҷе имҷiлерде санға тур саларға кирек.
Пiрге пособие синi сӧбiренiң парызынаң палғалыстығ полча. Регионда пiр кiзее айда чуртап парыбызарға киректелчеткен иң тӧбiн синнең асхынах парыстығларға тӧлелер. Сӧбiре, полған на кiзiнiң парызының ортымах синi мындағ синнең тӧбiн полза, хазна полызиин ал полар. Пособие синi чуртап парыбысчаң синнiң 50 %, 75 % алай 100 % тиңнелер. Хакасияда 2023 чылда 1 январьдаң чуртап парыбысчаң ортымах син – 14663 салковай. Палаа 50 %-тiг пособие синi кӧрiл парза, ағаа ай сай 7391 салковай тӧлелер, 75 %-ке тиңнелзе – 11086,50 салковай, 100 % тиңнелзе – 14782 салковай. Тойлығ ипчiнiң пособие синi – 7991,50 салковай, 11987,25 салковай алай 15983 салковай. Алында аар идектiг ипчiлерге чуртап парыбысчаң иң асхынах синнiң 50 % ле тиңнелчеткен пособие тӧлелҷең.
Сӧбiренiң парызы паалалчатса, санға iдӧк хайди даа алылча тибiредiлбинчеткен ис-пайы, автотранспорты (iкi машинадаң кӧп полбасха кирек). Ӧнетiн транспорт пар полза, ол iдӧк хайди даа санға алылча. Сӧбiре 17 часха читкелек нинҷе-де палалығ полза, ахча полған на пала ӱчӱн пирiлче. Ай сай тӧлелчеткен пiрге пособие пiр чылға кӧрiлче. Анаң пу тӧлег, сурыныс пiчии хатап пазылза, узарадылча. Паба-iҷе пала тӧреен соонаң чарым чыл пазынаң на айланза, пособие пала пу ах чарыхха килген кӱннең сығара тӧлелер. Че 2023 чылның 1 январьынаң на сығара.
Хайди таныхтаан Людмила Иванова, пӱӱн пiстiң республикада пiрге социальнай пособиенi алардаңар 3 муң азыра пiчiк алылған. Кӧбiзi хазна полызығлары портал пастыра пу фондсар пирiлтiр. Хайзы-да кiзiлер пу учреждениезер постары кил парғаннар. Фондтың региондағы пӧлиинiң клиент службазы пу чыл 4 январьда тоғынарға пастаптыр. Сағам наа пособие 170 кiзее чарадыл партыр.
– Пособие алар ӱчӱн, кiзiлерге ниме идерге киректелче? Иң не пурун cурыныс пiчиин пир саларға кирек. Аннаң пасха танығларны пiс ведомстволар аразында хада-пiрге тоғынҷаң система пастыра пiлiп алчабыс.
Кӧзiдiмге, налог службазынаң, Росреестрдең, транспортты санға турғысчатхан органнардаң. Пiрге пособие электроннай оңдайнаң санал парар, кiзее фондсар посха айланарға кирек чоғыл, – тiпче Людмила Васильевна.
Че пiрееде хай пiрее алынҷа ла киректе специалисттер ара кiрicчелер, сананыстарны постары иртiрчелер. Пiрге пособие тӧлирдеңер сурығ тоғынҷаң 10 кӱн аразына чарадыл парча, анаң ахча 5 кӱн аразына тӧлелче.
Наа тӧлег чуртасха кирiлчеткен туста сӧбiрелер, хайзыларының палалары 2022 чылның 31 декабрьына теере тӧрееннер, оларға пала ахчазын сағам иргi оңдайнаң ал турарға чарадылча. Иргi тӧлеглернi оларға палаа 3 час толғанҷа аларға чарир. Че хынза, олар наа оңдайнаң пӱӱнӧк тузалан поларлар, пiрге пособие аларға сағынчатсалар. Че 2023 чылда тӧреен палаларға пособие наа оңдайнаң на тӧлелер.
Хайди искiрген устағҷы, мындағ хазна полызии iстенчеткен не кiзiлерге, сӧбiрелерге кӧрiлче. Ол-пу сылтағнаң сағам тоғын полбинчатханнар iдӧк пiрге пособиенi ал поларлар. Кӧзiдiмге, улуғларның пiрсi улуғ сӧбiреде палалар соонҷа кӧрчетсе. Кiчiг палалығ ибде одырчатса. Очнай оңдайнаң ӱгренчетсе алай сӧбiре пазы срочнай служба иртчетсе. Кинек кiзi соонҷа кӧрчетсе алай ӱс ай паза аннаң даа кӧп тус ағырып, имненчетсе.
Пiрге пособиенi киректепчеткен сӧбiренiң пазы мобилизацияа хабылған полза, андағ кiзiнiң парызы санға алылбинча тiп чоохталған.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде