ПУСТА – КІЧІГ ХОККЕИСТТЕР
13.01.2023
Хабарлар
![ПУСТА – КІЧІГ ХОККЕИСТТЕР ПУСТА – КІЧІГ ХОККЕИСТТЕР](/upload/iblock/b57/b57f89efa347964d441db0fc9b7004e4.jpg)
Спорт. Ағбанда «Ӱрілген меспек» клубтың тиксі Россия марииның таллағ чардығы ирткен. Анда 2010 чылда тӧреен олғаннар устарын кӧзіткеннер
КИБІРЛІГ МАРЫҒ
СССР-да олған спортын улуғ хайығда тутчаңнар. Палаларны хазых чуртасха тартар пӧгіннең 1960 чылларда «Тууп меспек», «Алтын шайба» паза «Ӱрілген меспек» клубтарның марығлары иртіріл сыххан. Пастағызы кічіг футболисттерге кӧрілген, ікінҷізі – шайбалығ хоккей ойнапчатхан олғаннарға. «Ӱрілген меспек», тізең, меспектіг хоккейге хынчатханнарны піріктірген. Турнирлер амға теере иртірілчелер. Анда 11-12 частығ, 13 частығ паза 14 частығ спортсменнер кӱстерін сынапчалар. Пӱӱл Хакасия «Ӱрілген меспек» клубтың марығларына ікі команда сығарған. Кічіглер аразында республика ӱчӱн «Саяны-Подсинее» ӧме турысча. Ол Алтай аймаандағы Кӧк хайа аалдаң. 13 частығларның аразында – Хакасияның піріктірілген командазы.
Кибір хоостыра арға-мӧрійлернің таллағ чардыхтары январьның пастағы кӱннерінде ирткен. Прай командаларны ікі ӧмее чарыбысханнар: «Іскеркі» паза «Кидеркі». Пістің хоккеисттер пастағы ӧмеде ойнааннар. Че «Саяны-Подсинее» команда пусха Хызылчарда сыххан полза, 2010 чылда тӧреен палалар 5 – 11 январьда Ағбанда тоғасханнар. Спортсменнерібіс пус чазызында «Енисей» (Хызылчар), «Сибсельмаш» (Новосибирск), «Кузбасс» (Кемеров), «СКА-Нефтяник» (Хабаровск), «Байкал-Энергия-ЦРС» (Иркутск), «Сибскана» (Иркутск) командаларнаң ойнааннар.
ОЙЫННАР
Марығ оңдайларынҷа полған на командазар 20 кізі кірче. Матч 50 минута парчаттыр. Кӱнде ӱс ойын иртче. Хакасияның піріктірілген командазының ӧзені – «Штурм» ӧменің хоккеисттері (Ағбан). Таллағ пылтыр декабрьда ирттір. Марығ тузында «Штурм» команда прайзын чиңіп алған. Ідӧк піріктірілген командада Ағбан пилтірі поселоктың 5 чуртағҷызы ойнапча, пірер кізі Харатастаң паза Кӧк хайа аалдаң. Оларны марыға тренерлер Игорь Лопухиннең Александр Хрисосненко тимнепчелер.
Пастағы туста кічіг хоккеисттерібіс чидіглерінең ӧріндіргеннер. 5 январьда олар «Сибскана» ӧмені 8:0 саннаң утып алғаннар. Пір кӱнінде «Кузбасснаң» тоғазығ ирткен. Матч 2:2 саннаң тоозылтыр. 7 январьда наа чидіг, Хакасияның саарбахтары «СКА-Нефтяник» ӧмені 2:0 саннаң утханнар. «Байкал-Энергия-ЦРС» команданаң ойын 9 январьда ирттір. Сан – 7:3, чиңіс пазох пісти. Пылтыр пу турнирде республика ӱчӱн «Юность» команда турысхан. Ағбандағы ӧме таллағ чардығында 7 команда аразында халғанҷы орында полған. «Ағырчатхан» улустың мындағ салтарларға чӱрегі ӧлген тиирге чарир. Хоккеисттерібіс турыстыра ойнапчатханы чиңіске ізеніс пирген.
10 январьда Хакасияның ӧмезі хызылчардағыларнаң тоғасхан. Соох таа полғанда, чон хомай нимес чыылған. Сизінгенде, кӧбізі кічіг спортсменнернің паба-іҷелері. Матч 15.00 часта пасталған, кізілер, ойынны кӧріп аларға пӧгініп, тоғыстаң ӧнетін сурынғаннар, неке. Ойын хайди иртер ни? Турнир таблицазында «Енисей» пастағы орында парча, Хакасия – ікінҷі орында. Ікінҷілес чоғыл: кӧрігҷілерні хазыр харбазығ сағыпча. Че, хайди чонда тидірлер, улуғ чоохтанарға чарабас. Пизінҷі минутадох пістіңнернің хаалхазынзар меспек учух килген, тӱрчедең сан 0:2 пол парған. Утырчабыс. Анзы даа ӧӧні нимес. Таң, хызылчардағыларның узы хай-хай пӧзік, таң, орындағы саарбахтар ойнап полбинчалар. Олар пуста, хада-пірге ойнир орнына, ал-алынҷа тудынғаннар. Меспекті удур-тӧдір читір полбин даа порастанчатханнар. Ойын 1:7 саннаң тоозылған, Хакасияның піріктірілген командазы «ыырҷызына» унада саптырыбысхан. «Енисей» команданың хаалхазынзар чалғыс голны Виктор Совков сабыстыр.
11 январьда cпортсменнерібіс «Сибсельмашнаң» хада ойнааннар. Новосибирсктегілерге Хакасияның хоккеисттері 0:6 саннаң утыр салғаннар.
Республиканың піріктірілген командазында пір ле хакас пала ойнаан. Аның ады-солазы – Родион Боргояков. Ол Ағбаннаң, Хакас гимназияда 6-ҷы класста ӱгренче. Пабазы Валерий Боргояковтың таниинаң, Родион меспектіг хоккей секциязынзар 5 частығдаң чӧр парир. Ол «Штурм» команданың хоккеизі. Олғаннар тренер Игорь Лопухиннің холында устарын таптапчалар. Пабазы оолғының прай ойыннарын кӧріп аларға кӱстенче.
Хакасияның піріктірілген командазы халғанҷы тоғазығларда уйан ойнабысханда, аны сыйыхтығ орынға сых полбас тіп сағынғаннар. Тиктең ӱрӱктiрбіс. Олғаннарның хола медальлар. Пастағы орында – «Енисей» ӧме, ікінҷі орында – «Сибсельмаш». Амды олар азах меетте аралазарлар. 11 январьда кічіг хоккеисттерге кубоктарны паза медальларны Хакасияның спорт министрінің орынҷызы Елена Краснова, республиканың меспектіг хоккей федерациязының президенті Юрий Шпигальских паза «Саяны» спорт школазының сыныхтағда тутчаң чӧбiнің кнезі Сергей Ромашов читіргеннер. Финаллардаңар хоза искірерлер. Анда кибір хоостыра 8 ӧме ойнапча.
«Саяны-Подсинее» командаа Хызылчарда оң полбиндыр. Кӧк хайадағылар тӧртінҷі орынға сыхханнар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде