НАА ИСТІГ ЭЛЕКТРОПОЕЗД КӦЗIДІГЕ СЫҒАРЫЛҒАН
18.01.2023
Хабарлар
![НАА ИСТІГ ЭЛЕКТРОПОЕЗД КӦЗIДІГЕ СЫҒАРЫЛҒАН НАА ИСТІГ ЭЛЕКТРОПОЕЗД КӦЗIДІГЕ СЫҒАРЫЛҒАН](/upload/iblock/cf7/cf78de2d555c1040186f62c09f57a9f9.jpg)
Транспорт. Ағбандағы тимір чол вокзалында Россияда сығарылчатхан наа истіг электропоезд кӧзіділген. Ол Хакасияны паза Кемеров облазын палғалыстырчатхан маршруттарҷа чӧрер
ПУ НАА ЛА СЫҒАРЫЛЧАТХАН ПАСТАҒЫ ЭЛЕКТРОПОЕЗД ПІСТІҢ РЕГИОНЗАР КИЛДІ. ОЛ ЧОННЫ ХАКАСИЯДА АҒБАННАҢ ПИСХАМҶАА ТЕЕРЕ ПАЗА ПИСХАМҶЫДАҢ
МЕЖДУРЕЧЕНСККЕ ТЕЕРЕ (КЕМЕРОВ ОБЛАЗЫ) ТАРТАР. ТУРИЗМНІ ТИЛІДЕРГЕ ХАБАСЧАТХАН ПУ УҒАА КИРЕК ЧОЛ.
– Ағбан – Писхамҷы маршрутча чӧрчеткен электричканаң кӱннің сай Хакасияның 250-ҷе чуртағҷызы тузаланча, олар тоғысха, имнег учреждениелерінзер парчалар. Писхамҷыдаң Междуреченск саринзар Кузнецк Ала тағларының заповедниктіг орыннары пасталчалар. Чир-чайаанда тынанарға сағынчатхан кізілер пу маршрутха уғаа хынчалар, чайғыда анда пассажирлер чӧрізі тӧрт хати ӧс парыбысча. Iзенчем, кізілер наа электричканаң хынып тузаланарлар, – таныхтаан КрасЖД пастығының Ағбан регионынҷа орынҷызы Александр Кожанов.
Россияда сығарылчатхан ЭПзД серияның электропоезді кӧӧлҷе тибірепче паза тохтапча, парчатса, вагоннар тохлапчатханы тың истілбинче. Пассажирлернің чӧрізін истіг идер пӧгіннең электричкада нымзах одырчыхтар турғызылған, вагоннарда киині арығлаҷаң инновация системазы тоғынча. Анда велосипедтерні паза спорт тиріглерін апарҷаң орыннар пар. Электропоездте кинектерге киректелчеткен прай оңдайлар пирілче, iдӧк видео системазы тоғынча.
Наа машиналығ чӧрерге КрасЖД-ның локомотив бригадалары ӧнетін ӱгредіг ирткеннер.
– Электропоездтiг чӧрері – Хакасияның чуртағҷыларына иң ниик паалығ транспорт кӧрімі. Ағаа хоза, ам электропоездтiг чӧрерге истіг полар. Аннаңар піс «РЖД» ОАО-ның паркты нааҷылир пастаана хабасхабыс паза пу кӧcтегҷе хада-пірге тоғызыбысты узарадарға план тутчабыс. Хакасия – туризмні тилідер пӧгін тутчатхан кӱстiг регион, піске мындағ наа электричкалар кирек, ол санда істіндегі туризмні тилідерге, – теен Хакасияның транспорт министрінің пастағы орынҷызы Олег Емелин.
Хоза чоохтирға чарир, наа электропоезд – Хакасияда пассажирлерні кӱннің сай тартчатхан тӧрт электричканың пірсі. Алынҷа кӱннерде олар тӧрт маршрутча алты – сигіс рейс толдырчалар: Ағбан – Писхамҷы, Писхамҷы – Междуреченск, Ағбан – Кошурников, Лужба – Междуреченск (Асхыс – Абаза участокча поездті тепловоз тарт чӧрче).
Пылтыр Хызылчар тимір чолының электропоездтерінең Хакасияда 260 муңҷа пассажир тузаланған (2021 чылдағызынаң ӧзіс 5% тиңнелген).
Автор :
Ольга ГАЦКО
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде