ЧАХСЫ ӰГРЕНЧЕЛЕР, СПОРТНАҢ АЙҒАСЧАЛАР
25.01.2023
Хабарлар
![ЧАХСЫ ӰГРЕНЧЕЛЕР, СПОРТНАҢ АЙҒАСЧАЛАР ЧАХСЫ ӰГРЕНЧЕЛЕР, СПОРТНАҢ АЙҒАСЧАЛАР](/upload/iblock/d9a/d9a29325a2ae9bebccf1bf2a129442c6.jpg)
Хакас хазна университедінің студенттері, спортсменнер
Данил ЧЕПСАРАКОВ паза Сергей ЧЕБОДАЕВ
Пӱӱн – Россия студенттерінің кӱнi. Чыл сай 25 январьда хазнада Студенттер кӱнi таныхталча. Аны iдӧк Татьянаның кӱнi тiп адапчалар
СТУДЕНТТЕР КӰНIНЕ УДУР ХГУ-ның ИНСТИТУТ-КОЛЛЕДЖТЕРI АРАЗЫНДА КВЕСТТЕР, ЧИРЛИДИНГЧЕ ПАЗА СОМНАРҶА МАРЫҒЛАР ИРТКЕННЕР. ТАРХЫН ПАЗА ПРАВО ИНСТИТУДЫНЫҢ ЧИИТ ООЛ-ХЫСТАРЫ, ТIЗЕҢ, МВД-ның «СТУДЕНТТЕР ДЕСАНТЫ» ЧӦРІМІНЕ ХОЗЫЛҒАННАР. ПӰӰН, ТIЗЕҢ, СТУДЕНТТЕР КӰНIНДЕ, УНИВЕРСИТЕТТIҢ АКТОВАЙ ЗАЛЫНДА ХАКАСИЯНЫҢ КУЛЬТУРА, ӰГРЕДIГ ПАЗА СПОРТ МИНИСТЕРСТВОЛАРЫ ПӦЗIК ЧИДIГЛЕРГЕ ЧИТКЕН ПАЗА ЧАХСЫ ӰГРЕНЧЕТКЕН СТУДЕНТТЕРГЕ АЛҒЫСТАС ПIЧIКТЕРIН ЧИТIРЕРЛЕР. ТИКСI 30 АЗЫРА СТУДЕНТКЕ.
Оларның аразында ХГУ-ның филология паза искусство, естественнай наукалар паза математика институттарының студенттерi Данил Чепсараковнаң Сергей Чебодаев.Чииттерге Хакасияның физическай культура паза спорт министерствозының алғыстас пiчiктерi читірілер.
Данил Чепсараков Пии аймаандағы Чоғархы Киндiрлiг аалдаң. ХГУ-ның филология паза искусство институдында пастағы курста ӱгренче. Аның алнында чиит оол Ағбандағы олимп резервi училищезiн тоосхан. Ол физическай культура паза спорт кӧстегҷе ӱгренген. Училищезер кiрер алнында, тiзең, армияда служба ирткен.
Пу кӱннерде аның пастағы сессиязы иртче. Зачеттар ирт парғаннар, нинҷе-де ле экзамен тудыбызарға халған. Сыныхтағларны студент «4» паалағларға тут парир.
Данил кикбоксингнең айғасча. ЦСК клубының спортсменi полча. Тренировкалары Ағбандағы 12 № школада иртче. Ӱр ниместе Россия кубогында аралазып, аннаң iкiнҷi орын ағылған. Аның алнында, тiзең, Кемеров облазында чоннар аразындағы марығда кӱзiн сынаан. Iдӧк iкiнҷi орында полыбысхан.
Хакас хазна университедiнiң естественнай наукалар паза математика институдының студентi Сергей Чебодаев Абаза городтаң. Ол 3-ҷi курста ӱгренче. Чиит оол школа тузынаңох спортнаң айғазып пастаан. Студент полыбысханда, хол-азахнаң тудызар спорт кӧрiмiн таллаан. Ӱр ниместе спорт узына кандидат полыбысхан. Февральда хол-азахнаң тудызарынҷа Россия чемпионады иртерге кирек. Анда Сергей спорт узы полыбызарға пӧгiн тутча. Ол Ағбандағы хол-азахнаң тудызарынҷа школаның спортсменi полча.
Институт соонаң чиит оол Абазазар айланар. Ол ХГУ-зар кӧстеглiг оңдайҷа кiрген, аннаңар, диплом алза, тӧреен школазынзар тоғынарға айланар. Анда аны сахтапчалар.
Сергей Чебодаев iдӧк фортепианонаң паза гитаранаң чахсы ойнапча. Кӧг тирiглерiнең аны улуғ харындастары паза тайылары ойнирға ӱгрет салғаннар, iдӧк интернет пастыра пiлiс алған. Пос туста студент книгалар кӧп хығырча. Аның ӧӧн пӧгiнi – университеттi хызыл дипломнаң тоозары! Cағынған сағызы тол парарына iзенiс пар. Амға теере прай экзаменнернi «5» паалағларға тутча.
– Студент тузы – иң чахсы тус тiп санапчам. Ӱс чыл аразына мин чиис пызырарға, кип-азах чуурға, чуртапчатхан орынны арығлирға ӱгренiп алғам (хатхырча. – Авт.). Наа общежитиеде чуртапчам. Комнатада ӱс оол. Секцияда iкi комната. Пiстiң позыбыстың кухнябыс, кип-азах чуғҷаң паза чайынҷаң пӧліктер пар. Стипендия чахсы тӧлепчелер. Социальнай стипендиядаң пасха, чахсы ӱгренчеткен, спортнаң айғасчатхан ӱчӱн пӧзiк cтипендия алчам. 20 муң салковайға чағын сых парча, – чоохтапча Сергей Чебодаев.
Пу ӱгредiг чылында Хакасиядағы ӧӧн вузта 9 муң азыра студент ӱгренче. 29 чыл аразына, тiзең, анда 55 муң азыра оол-хыс специальность алған. Амды олар хазна регионнарының, ол санда пістің республиканың аймах сфераларында iстенчелер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде