ЧИР ПАЗА ИС-ПАЙ ТУЗАЛАНЫЗЫ ПАРЫС АҒЫЛЧА
25.01.2023
Хабарлар
Чыл салтарлары. Хакасия пазы Валентин Коновалов республиканың ис-пай паза чир хайызығлары министерствозының 2022 чылның тоғыс салтарларынаң танысты
Кӱрген айының 23-ҷі кӱнінде Хакасияның ис-пай паза чир хайызығлары министерствозының тоғыс салтарларынаңар искірген министр Евгений Тарасов. Аның таниинаң, ирткен чылда хазна паза муниципалитет ис-пайынаң тузаланғаны паза садылғаны сылтаанда республиканың консолидированнай бюджедіне 1 миллиард 817 миллион салковай парыс кірген. 2018 чылдаң пасти парыстар 72 %-ке ӧс парғаннар, иң пастағызын, анзы ис-пай тузаланызы чахсыланғанынаң паза арендаа наа чӧптезіглер иділгенінең палғалыстығ.
Налог тӧлеглерінең парысты ӧскірер пӧгіннең министерство Росреестрде таныхталбаан тибіреділбинчеткен ис-пайның санға алылғанынҷа тоғыс апарған. 2019 чылдаң пасти чыл сай санға алылған ис-пай саны хозылча. Ол туста тибіреділбинчеткен 248046 ис-пайдаңар искіріг чох полған полза, ол санда чир участоктарынаңар, пӱӱнгі кӱнде андағ ис-пай саны 81 муң азыра санға алай 335-ке хызырылған. Аның сылтаанда муниципалитеттер бюджеттерінзер кірчеткен налогтар сині пілдірте ӧс парған.
Тузаланылбинчатхан аал хонии чирлерін айланысха кирерінҷе тоғыс узарадылча. 2020 чылдаң пасти муниципальнай пӱдіcтер ол тоғыстарны толдырарға республика бюджедінең субсидиялар алчалар. Салтарында, 564 участок тӧстелген, оларның тиксі чирі 33,2 муң гектар. Пу тоғыс аал хонии тилізіне, орындағы бюджеттерзер налог парыстары ӧзеріне, ӧрттердең хорғыс чох поларына кӧні теелче.
Министерство республика ис-пайынаң тузаланарын, чардыхти кӧріп, чахсыландырча. 2018 чылнаң тиңнестірзе, аннаң тузаланғанынаң парыстар ікі дее хати ӧс пардылар тиирге чарир. Пу салтар ис-пайны тузаланысха кирерін чахсыландырғанынаң паза аренда чӧптезіглерін нааҷылаанынаң палғалыстығ. Хай пірее ведомстволарны аренда паазы сала ниик алай республика ээ полчатхан тураларзар кӧзіргеннеңер, тӧрт чыл аразына 155 миллион салковай бюджет ахчазы ӱзӱрлелген.
Хакасия пазы республиканың ис-пай паза чир хайызығлары министерствозының паза аның устаандағы учреждениелернің тоғыс ӧмелерін алғыстаан паза пу чылға кӧстеглерні таныхтаан. Регион устағҷызы республика ээ полчатхан ис-пайнаң тузаланысты чахсыландырарын узарадарға киректеен. Ол аймах синдегі бюджеттернің парыстарында кӧрінче. Валентин Коноваловтың таниинаң, аның ӱчӱн муниципалитеттернең хада-пірге ӧткін тоғынарға, оларны пос чирлерін паза тибіреділбинчеткен ис-пайын айланысха кирерге кӧстирге киректелче.
Автор :
Ирина БОРИСОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде