«ШАГАА-БИЛЕ» – ХАКАСИЯДА
01.03.2023
Хабарлар
Культура. С.П.Кадышевтiң адынаң чон чайаачызы кiнiнде тува чонның Наа чылы таныхталған
Пу туваларның мӱчелiнде улуғ пайрамнарның пiрсi полча. Хакасияда ӱлӱкӱн «Енисейская Сибирь» тиксi инвестиция проектi хоостыра ирткен. Проект Хызылчар крайының, Хакасияның паза Туваның чуртазын паза экономиказын тилiдер кӧстегнең тоғынча.
Тувадаң килген аалҷыларға паза Хакасияның чуртағҷыларына республика пазының пастағы орынҷызы Татьяна Курбатова чылығ сӧстер читiрген. Ол регион пазының алғыстазын хығыр пирген:
– Аарлығ нанҷылар! Хакас Республиканың чуртағҷылары паза позымның адынаң прайзын чарых Шагаа ӱлӱкӱннең алғыстапчам. Тува Республиканың чонына пик хазых паза амыр чуртас алғапчам. Iскеркi мӱчел хоостыра Наа чыл часхы чағдап килгенiн таныхтапча, андада прай чир ӱстӱ усхунча, нааҷылалча. Че иң аарлығ – тува чонның кибiр-чозахтарын улуғлапчатханы. Iкi харындас чонны хости орныхчатхан чирлер ле нимес, iдӧк ӧбекелер артысхан ис-пайны хайраллирынҷа ӧнетiн политика тоғызы пiрiктiрче. Тува – хайхастығ тархыннығ республика.
Украинаның чирлерiнде, Донецк Чон Республиказында паза Луганск Чон Республиказында ӧнетiн чаа операциязында араласчатхан чааҷыларға ӧткiн хабасчатхан ӱчӱн Хакасия пазының алғыстастығ пiчиинең таныхтатханнар Россия ДОСААФ-ының Хакасиядағы пӧлиинiң кнезi Аяс Сарыглар, «Теремок» олғаннар интернат-туразының педагог-психологы Азияна Оюн, Н.Г.Доможаковтың адынаң библиотека тоғынҷызы Салбак Сунчугашева, Хакасияның Адвокаттар палатазының адвокады Чечена Кончук паза тува чонның Хакасиядағы чир-суғҷылар пiрiгiзiнiң кiзiзi Любовь Ооржак.
Тува правительствозы кнезiнiң орынҷызы Уран-оол Ондар Хакасияда чуртапчатхан чир-суғҷыларын Шагаанаң алғыстаан паза пу ӱлӱкӱннiң кибiрлерiнеңер чоохтаан. Аның таниинаң, Туваны паза Хакасияны пiр тархынның чилегелерi, илбек Ким суғ, чоллар, экономика паза культура палғалыстары, чоннарның ынағ хайызығлары пiрiктiрчелер.
Алғым пайрам республика чуртағҷыларының кӧңнiне кiрген. Залда чон толдыра полған. Тува паза хакас устарның национальнай сувенирлерiнiң ярмарка-кӧзiдии кӱн тооза тоғынған. Iдӧк тува чонның ойыннары, национальнай кип-азаа паза олғаннар хоостарының марығлары иртiрiлген.
Тувадаң саблығ хайҷылар, артисттер, культура тоғынҷылары чайаачы концерт ағылғаннар – «Саяны» тува чонның сарын паза теелбек ансамбльы, «Тыва» фольклор ансамбльы, «Эдегей» теелбек паза кип-азах театры, «Алаш», «Чиргилчин», «Одучу» паза «Кhооmеi Веat» кӧг ӧмелерi. С.П.Кадышевтiң адынаң чон чайаачызы кiнiнiң чайаачылары аалҷыларға iдӧк сiлiг сарыннар паза теелбектер сыйлааннар – Туваның чон артизi Альберт Кувезин, «Час ханат» Россияның чон чайаачызының саблығ ӧмезi, «Айас» Хакасияның чон чайаачызының саблығ ӧмезi.
Ӱлӱкӱн «Симфония Хоомей» иирнең тоозылған. Анда Туваның хайҷылары паза Хакасия филармониязының симфония оркестрi араласханнар.
«Шагаа-биле» пайрамны Хакасияның паза Туваның правительстволары, Хакасияның национальнай паза территориальнай политика министерствозы иртiрерге хабасханнар.
Автор :
Светлана АСТАНАЕВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
