САБЛЫҒ АТТАР – ИҢ ТУРЫСТЫРА ІСТЕНҶІЛЕРГЕ
31.03.2023
Хабарлар
![САБЛЫҒ АТТАР – ИҢ ТУРЫСТЫРА ІСТЕНҶІЛЕРГЕ САБЛЫҒ АТТАР – ИҢ ТУРЫСТЫРА ІСТЕНҶІЛЕРГЕ](/upload/iblock/912/912acf25387198bb1f6f0884bfbae1d5.jpg)
Сыйыхтас. Хакасия правительствозында Россия президенті Владимир Путиннің чахиинаң хазна сыйиина турысхан істенҷілерні чеестеділер
Кӧрік айының 29-ҷы кӱнінде республика правительствозының чыылығлар залында кӧп кізі чыылбаан. Хазна сыйыхтарын читірерінҷе пайрамнығ чыылығ Хакасия пазы Валентин Коноваловтың устаанынаң ирткен. Анда ідӧк аның пастағы орынҷызы, аппарат устағҷызы Татьяна Курбатова араласхан. Хазна сыйиина турысхан читі кізі Валентин Коноваловтың холынаң Россия Федерациязының аарластығ аттарын паза сыйыхтарын аларын сағааннар. Че пастап Россияның паза Хакасияның гимннеріне чеес пирілген, олар ойнадылчатхан туста залдағы прай чон турған.
– Сірер, кӱннің тіспен тоғынып, профессия істенізінең Чир-суубыстың кӱзін хосчазар. Тоғыстағы чидіглерің, чахсы сариларың паза чуртас опыдыңар турыстыра паалалғанына прай чӱреемнең ӧрінчем. Республика сірернең поғдархапча, – теен республика пазы.
«Россияның саблығ шахтёры» аарластығ атха турысханнар «ГорТехМаш» ООО-ның водительі Владимир Мезеровский паза «Разрез Майрыхский» хара тас компаниязының устағҷы орынҷызы Евгений Метелев. Оларға сыйыхтар хара тас промышленнозындағы чидіглері паза ӱр чыл тіспен істенчеткеннері ӱчӱн читірілген.
«Абакан Эир» ООО-ның тоғынҷылары транспорт киреенде тӱзімніг тоғыстары ӱчӱн ідӧк аарластығ аттарға турысханнар: вертолеттар эскадрильяларының командирі Валерий Вернер – «Россияның саблығ пилоды» аарластығ атха, ӧӧн штурман Александр Морозов – «Россияның саблығ штурманы» аарластығ атха, ӧӧн устағҷы орынҷызы Владимир Расков – «Россия транспортының саблығ тоғынҷызы» аарластығ атха. Таныхтирға кирек, пу иреннер аразында Владимир Расковтың кӧкcін аймах сыйыхтар чазапчатханы харахха тасталған.
Ағбан город пазы Алексей Лёмин чонға кирек мероприятиелерні тимнирінде паза иртірерінде ӧткін араласчатхан ӱчӱн Россия президентінің алғыстазына турысхан.
Сыйыхха турысханнар аразында чалғыс ипчі Нелля Троценко полған. Республиканың онкология диспансерінің ӧӧн имҷізінің орынҷызы «Россияның хазых хайраллирының саблығ тоғынҷызы» аарластығ ат алған. Нелля Николаевна республиканың имнег киреенде 1989 чылдаң сығара істен парир. 30 чыл азыра істеніс чолына ол тоғыс орнын нинҷе-де ле хати алыстырған. Интернатураны республиканың имнег туразында ирткен соонаң Хубачардағы аймахтың имнег туразында 2012 чылға теере істенген: лор имҷідең ӧӧн имҷее теере ӧс парған. 2004 – 2012 чылларда Хубачардағы имнег туразынаң устаан, ол туста ол республикадағы аймахтарның имнег туралары аразында иң артых учреждение полған. 2018 чылда республиканың онкология диспансерінзер килер алнында писче чыл Хакасияның хазых хайраллаҷаң министерствозында істенген, ӱсче чыл реабилитация кінiнің ӧӧн имҷізі полған. 2010 чылда Нелля Николаевна Хакасияның саблығ имҷізі атха турысхан.
– Пу сыйых – минің тиксі істеніс чолымны паалааны, уғаа пӧзік сыйых, олох туста ол нандырығлығ поларға кӧстепче, амды, Хакасияның чонына туза полып, уламох кӱстеніп тоғынарға кирек. Мин республикабысха тың хынчам. Сағынчам, пістің правительствоны паза кӧстегліг министерствоны тоғызымны піди пӧзік паалаан ӱчӱн алғыстирға, – таныхтаан Нелля Николаевна.
Чоохтирға кирек, имҷі тоғызын ідӧк аның хызы таллап алған. Пӱӱнгі кӱнде ол И.М.Сеченовтың адынаң Пастағы Москвадағы хазна имнег университедінде тӧртінҷі курста ӱгренче. Ол, іҷезі чіли, пір дее ікінҷілес чох имҷее ӱгренерге чаратхан.
Кибірли сыйыхха турысханнар Хакасия пазы Валентин Коноваловнаң хада пірге сомға суурынғаннар. Сизінгенде, пу кибір сабланча. Аның сылтаанда республика правительствозының ӱзінҷі хадылынзар парчатхан пасхысты чыылған улус пілчеттір. «Мына ол саблығ пасхыс!» – тіпчеткеннер правительство аалҷылары.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде