ПОС КИРЕЕН 14 ЧАСТЫҒДОХ ТӦСТИРГЕ ЧАРИР
12.04.2023
Хабарлар
![ПОС КИРЕЕН 14 ЧАСТЫҒДОХ ТӦСТИРГЕ ЧАРИР ПОС КИРЕЕН 14 ЧАСТЫҒДОХ ТӦСТИРГЕ ЧАРИР](/upload/iblock/b27/b277af26e2be515098b15df33bd6dcbc.jpg)
Форум. Хакасияның чиит идінҷектері Ағбан городта коммунальнай хоных паза сервис техникумында чыылыстылар
Тиксі республикадаң пос киреенең айғазарға сағынчатхан чииттер, ӧӧнінде школаларның паза техникумнарның ӱгренҷілері, пастағызын на мындағ форумға чыылысханнар. Аны иртіргеннер Хакасияның ӱгредіг паза наука министерствозы, «МЦСИП» чыынды паза «Минің пос киреем» кін. Форумның программазы ікі чардыхха чарылған. Ӧӧн чыылығда пос киреенің чахсы сариларынаңар, тузазынаңар паза хазна хабазиинаңар чоох апарылған. Ӱзӱрігде араласханнар Хакасия пазының орынҷызы Михаил Побызаков, Хакасияның тиліс чыындызының пастығы Денис Пауль паза «РМ Рейл Абаканвагонмаш» АО-ның тилісче директоры Александр Ерохин.
Анаң форум араласчылары ӱс ӱзӱріг ачығынҷа тарасханнар. Полғанында ла оларны пу киректе маңнаныстығ идінҷектер сағааннар, ол санда чииттер, кемге 35 час толғалах. Іди «Чонны азырир индустрия» ӱзӱріг ачығында «ma.lе» еvеnt-саfе ээзі Олеся Пархоменко чоох тутхан, «Асхынах хадыллығ тура пӱдірии паза чурт-коммунальнай хоных» ӱзӱріг ачығында – «Ағбандағы пӱдіріг холдинг» ООО-ның ӧӧн устағҷызы Виктор Хрычев паза коммерческай директоры Константин Сунчугашев, «Креативнай индустриялар» ӱзӱріг ачығында – Хакасияның культура министерствозының чӧпчізі Ольга Воропаева.
Форумның ікінҷі чардығында Пос киреене хабазығ кінінің устағҷызы Екатерина Эклер, Хакасияның экономика тилізі министерствозының ӧӧн советнигі Ольга Швинд паза Хакасияның кічіг кредит компаниязының – республика чыындызының устағҷызы Марина Сорокина идінҷектерге читірілчеткен хазна хабазиинаңар, кічіг кредиттердеңер паза пос киреен кӧдірҷең оңдайлардаңар чоохтааннар.
Пос киреен хайди пастаанынаңар ӱлескеннер идінҷек, «Сцена» саарбахтарға проекттің паза чон алнында чоох тутчаң школаның тӧстегҷізі, курстар авторы Татьяна Волошанина, идінҷек, спорт узы, таға сығарынҷа Россияның ікі хати чемпионы, Нымырттығ поселоктағы «Мраморка» экстрим-парктың устағҷызы Александр Жигалов, идінҷек, Хыдаттаң ниме-нооны садызарынҷа паза маркетплейстерде тоғысха ӱгредерінҷе эксперт Дарья Ишанкулиева, теер сумкаларының паза чазанҷаң нимелернің Dеsign Kеss пос адының тӧстегҷізі, посха тоғыс таапчатхан Ксения Власова паза «Резолют» реклама агентствозының ээлерінің пірcі, копирайтер, SMM эксперті, посха тоғыс таапчатхан Елена Саннэ.
Форумға ӱгренҷілерінең хада килген республиканың хоза ӱгредіг кінінің (РЦДО) ӱгретчізі Татьяна Яковлева. Ол 14 – 17 частығ олғаннарға Чиит идінҷектер клубын тӧстеен. Ол РЦДО-да ӱзінҷі чылы апарылча. Клубтың араласчылары – Ағбан городтың 1 № школазының 8-ҷі класс ӱгренҷізі Максим Азраков паза Н.Ф.Катановтың адынаң Хакас национальнай гимназия-интернаттың 9-ҷы класстың ӱгренҷізі Назар Аев. Оолахтар пос киреенең палғалыстығ пілістерні хынып алчалар паза чуртастарын пос киреенең палғалыстырарға пӧгінчелер. Чиит идінҷектер клубы паза Чиит идінҷектер форумы анзына чахсы чӧлег полча.
Чоохтирға кирек, амғы чииттерге алғым оңдайлар пирілче, ол санда 500 миллион салковайға теере грант. Андағ хабазығ, пос киреен тӧстеп, аны тилідерге сағынчатхан 14 – 25 частығ чииттерге пирілче. Хазна хабазиин айландырарға киректелбинче.
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде