«Ӧлімі чох полк» пасха оңдайнаң иртер
27.04.2023
Хабарлар
![«Ӧлімі чох полк» пасха оңдайнаң иртер «Ӧлімі чох полк» пасха оңдайнаң иртер](/upload/iblock/cb3/cb34d52ae5e56ad508ea9c1d2a8b29a2.jpg)
Халых чӧрімі. «Ӧлімі чох полк» тиксі Россияның халых-патриот чӧрімінің Ӧӧн штабы чарадиинаң, пӱӱл пу акцияны иртірер оңдай алыс парған
Тиксі Россиядағы халых чӧрімінің Хакасиядағы пӧлии «Ӧлімі чох полк» патриот акциязы пасха оңдайларнаң иртірер чӧптер пирген.
Матырларны сағысха кирерге чарир Россияның «Ӧлімі чох полк» онлайн-акцияа хозылып. 9 майда httрs://www.роlkrf.ru/ сайтта мының алнындағы чылларда ызылған ветераннар портреттерінің кӧзідии иртірілер. Олардаң видеооткрыткалар тӧстирлер. Искіріглер базазынзар 30 апрельге теере постарының Матырының портредін хозып аларға чарир. Ызарға кирек ветеранның портредін, аның адын, чуртас чылларын паза чаадағы чолын.
Матырдаңар пасха даа оңдайнаң чоохтап пирерге чарир – Хакасиядағы «Ӧлімі чох полк» онлайн-акцияда. Ветераннарның портреттерін РТС телеканал кӧзідер. Хынған на кізі позының туған матырын республиканың «Ӧлімі чох полкына» кир полар. Украинада чуртастарын пир салған СВО араласчылары ідӧк «Ӧлімі чох полктың» матырларына саналчалар. Портретті тӧстеп аларға чарир httрs: //www.роlkrf.ru/ сайтта. Тимнелген портреттерні 30 апрельге теере ызыбызыңар электроннай почтазар: bрr19@роlkrf.ru алай рro100stg@mail.ru.
Матырларны «Ӧлімі чох автополк» акция хоостыра сағысха кирерге чарир. Матырның портредін автомобиль істінде соондағы алай хыриндағы сӱлейкелерде чапсыр саларға кирек.
Республиканың РТС телеканалы, Илбек Ада чаадағы Чиңіcтің 78-ҷі чылына чарыдып, «Прайзы фронтсар парыбысхан» чӧрім иртірер. Анда аралазарға итсе, туғаннаңар чоохтап, хысхаҷах видео суурып аларға кирек. Аның ады-солазын, тӧреен-ӱреен кӱннерін, чааҷы званиезін адап саларға киректелер. Кадрда сірер Матырның сомын алай транспарантын тудыңар. Ідӧк Чиңіcке чарыдылған кибелістер алылча. Видеоны РТС-тың редакциязынзар tv-rts@mail.ru электроннай почтазар ызыңар. Ідӧк 8-993-033-27-32 телефонҷа сығдырадыңар. Акцияда СВО-да чуртастарын пир салған чааҷыларның туғаннары даа аралас поларлар.
Хоза пасха даа ондайлар пар: социальнай сетьтердегі аватарны 9 майда прай кӱнге алыстыр салыңар. Андағ оңдайнаң сірер «Минің матырым сыбыра миннең хада» акцияның араласчызы полып аларзар.
«Чиңіcчілернің кӧргенектері» чӧрімде ветеранның cомын кӧргенектің чааҷы кип-азаан кискен сомынаң піріктіріп аларға кирек. Сомны почтазар bрr19@роlkrf.ru алай рrо100stg@mail.ru 1 майға теере ызыбызыңар.
«Матырлар піснең хада» акцияда аралазарға итсе, Матырның портредін паза адын А4 форматта футболкада печатьха сығарып аларға чӧп пирілче. Значоктар даа чахып аларға чарир. Аны прай 9 майда кизіп аларға, анаң сомға суурынып, социальнай сетьтерде позының страницазында #героиснами#нашБессмертныйполк хэштегтіг сығар саларға кирек.
«Ӧлім чох полк акция: матырның сомы чӱректе» чӧрім араласчызы полып, Чиңіc кӱнінде тоғынчатхан кізее, чааҷы кип-азаан кизіп, ветераннаңар искірігліг бейдж идіп алып, аны кӱн тооза кис чӧрерге чарир.
Автор :
Николай Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде