СИБИРЬДЕГІ ФАРМАЦЕВТТЕРНІҢ УЛУҒ ЧЫЫЛИИ
24.05.2023
Хабарлар
![СИБИРЬДЕГІ ФАРМАЦЕВТТЕРНІҢ УЛУҒ ЧЫЫЛИИ СИБИРЬДЕГІ ФАРМАЦЕВТТЕРНІҢ УЛУҒ ЧЫЫЛИИ](/upload/iblock/274/27482d162d306e7d46f1b78b6811e397.jpg)
Форум. Ағбанда 17 – 19 майда Сибирьдегі фармацевтика организацияларының «PharmSib – 23» форумы иртірілген
Хакасияда аптека тоғынҷыларының мындағ улуғ чыылии пастағызын на иртірілді. Пу мероприятиенің пастағҷызы полча «Аптечное дело» фармацевтика отрасльы тилізінің ассоциациязы. Аны иртірерге хабасханнар Хакасияның правительствозы паза Ӧӧркі Чӧбі, ідӧк Сибирьдегі имнег хазна университеді (Томск г.).
Форумның темазы – «Тренды рынка и перспективы развития». Анда Сибирьдегі федеральнай округтағы прай регионнарның специалисттері араласханнар, ол санда Хызылчар паза Алтай крайларындағы, Томск, Новосибирск, Кемеров областьтарындағы, Бурятиядағы, Якутиядағы тоғынҷылар. Улуғ чыылығ істенчеткен специалисттерге наа пілістер пирер кӧстегнең иртірілген. Ідӧк – чонға имнер читкіҷе полар ӱчӱн, сидік сурығларны пӧгерінде пірге тудынары.
Чоохтирға кирек, пасха региондағы специалисттер пу форумда онлайн оңдайда араласханнар. Орындағы тоғынҷылар паза пу мероприятиеде ӧнетін аралазарға кил парған аалҷылар Н.Г.Доможаковтың адынаң национальнай библиотекада чыылысханнар. Пастағы кӱнде форум пайрамни азылған соонаң Сибирьдегі «Иң чахсы провизор» паза «Иң чахсы фармацевт» марығ иртірілген. Имҷілер паза фармацевттер, «тегілек столларда» аралазып, импортнай имнерні пістің хазнада сығарылчатхан имнерге алыстырҷаң оңдайларны паза пасха даа сурығларны ӱзӱргеннер. Олох кӱн фармацевтика ниме-нооларын, имнег оборудованиезін сығарчатхан улус кӧзідіг иртірген. Ідӧк мастер-класстарда, квесттерде аралазар оңдай полған.
Ікінҷі кӱнінде форумның пленарнай чардығы полған. Ӱс кӱн аразына пу улуғ мероприятиеде онлайн оңдайда 496 кізі араласхан, очно – 389 араласчы. Онлайн тоғысты трансляция тузында Ыраххы Востоктаң сығара Калининград облазынаң ала кӧріп алтырлар.
19 майда, Россиядағы фармацевт тоғынҷызы кӱнінде, форум араласчылары, C.П.Кадышевтің адынаң чон чайаачызы кінінде тоғазып, тоғысты узаратханнар. Паза ол кӱнде Хакасия правительствозы паза Ӧӧркі Чӧбі кізілерінең тоғасханнар, форумның резолюциязы алылған. Халғанҷызынзар, Фармацевт тоғынҷызы кӱнін пайрамнап, араласчылар кіннің улуғ залынзар чыылысханнар. Фармацевттерні алғыстаан Хакасия пазы Валентин Коновалов. Ол чооғында таныхтаан:
– Ноо даа сидіксіністерні, хада-пірге тудынза, пӧгіп аларға чарир. Пістің хазнадаң тоғыр экономика санкциялары кирілгенде, фармацевт отрасльына уғаа сидік чуххан: имнерні садызарында, логистиканың наа схемаларын тӧстирінде, аналогтарны табарында. Ӧӧн пӧгін турғызылған – импорт ниме-ноо орнына постың производствозын тӧстирге. Пістің фармацевтика хатап тиліп сығар тіп ізеніс пар. Сидіксіністер ам даа кӧп, че специалисттернің, производительлернің, поставщиктернің, учёнайларның, ӱлгӱдегілернің чӧптіг тудынғаны сурығларны пӧкчең оңдайлар табарға полысча.
Cірернің тоғызыңарнаң чонның хазии кӧнізінең сылтағлығ полча, ідӧк пістің паза хазнабыстың таңдағы чуртазы.
Анаң Валентин Коновалов тӱзімніг істенчеткен тоғынҷыларға Аарластығ пічіктер читірген. Андағ cыйыхха тӧрт кізі турысхан. Оларның ікізі «ЛЕК 19» ООО-да істенче – склад фармацевті Елена Иванова паза аптека устағҷызы Ольга Деменкова. Ідӧк республика пазының алғыстас пічиинең пис кізі сыйыхтатхан, олар прайзы пуох ООО-ның істенҷілері полчалар.
Республиканың Ӧӧркі Чӧбінің алғыстас пічиинең ікі кізі таныхтатхан. Сыйыхты оларға Ӧӧркі Чӧп кнезі Владимир Штыгашев читірген. Хайди ол чоохтаан, пӱӱн піске пу отрасльны айландырарға, пик азахха турғызарға кирек. Амды пістің хазнада отрасльға киректелчеткен специалисттерні 74 вузта тимнепчелер.
Алғыстастарны паза сыйыхтарны аннаң даа пасха ведомстволар, халых пірігістері тіспен тоғынчатхан улусха читіргеннер. «Аптечное дело» ассоциация ідӧк илееде кізіні сыйыхтаан. Ассоциацияның кнезі Анастасия Филиппова ікі марығның чиңісчілерін чарлаан. Сибирьде иң чахсы провизорлар Анна Андросова (Хакасиядаң), Анна Носова (Хызылчар крайынаң) паза Евгения Трухина (Томск облазынаң) полыбысханнар. Іди пастағы орынға пір саңай ӱс кізі сығып алған. Че ікінҷі орын пір ле кізее пирілген – Валерия Акованцеваа (Хакасия). Ӱзінҷі орында пазох ӱс кізі адалған, олар прайзы Хакасиядағы тоғынҷылар, оларның санында – Наталья Канзычакова. «Иң чахсы ревизор» марығда чиңісчі – Марина Фомина (Хакасия), ікінҷі орында – Наталья Довлесупова (Томск облазы), ӱзінҷізінде – пістің чир-суғҷыларыбыс Юлия Евдокименко паза Виктория Марушенко.
Ассоциация сыйыхтаан кізілернің санында пӱрӱт оол Баир Цыренов полған. Ол, пу форумға хығыртылғанда, Хакасиязар чиде салған. «Бурят-Фармация» хазна предприятиезінде ӧӧн директор полып тоғынча. Конференцияда «Компоненты надлежащей практики» темаҷа чоох тутхам теен. Имнерні складтардаң имнег учреждениелерінзер хайди читірчеткенін чоохтап, опыдынаң ӱлескен. Ідӧк Моол чиріндегі компанияларнаң импортёр полып тоғыс апарчаттырлар, андар аукцион пастыра садызып алған имнерні читір турчалар. Баир Цыренов фармацевтика отрасльында 2005 чылдаң істенче. Пермьдегі фармацевтика академиязын тоозыбысхан соонда нинҷе-де чыл коммерческай компанияларда тоғынтыр, «Бурят-Фармация» предприятиенең алтынҷы чылы устапча. Хакасияда иртірілчеткен форумны тиксі Россия синіндегі конференцияа санирға чарир тіпче. Аймах-пасха темаларҷа хынығ докладтар полған тіп сағызынаң ӱлескен. Позым кӧп наа ниме піліп алғам, форум кӧңніме кірген, мында алылған опытты регионында чуртасха кирерге чарир теен.
– Пу форум тоғынчатхан специалисттерге кӧстелген. Чуртағҷыларнаң кӧні палғалыс тудып істенчеткеннернің пілізін алғыдарға, преподавательлернің лекцияларын тіріге истіп аларға оңдай тӧстеебіс. Пілістер алғытчатхан ӱгредіг материалларынаң хараа-кӱнӧрте тузаланҷаң оңдай полар ӱчӱн ӧнетін онлайн-трансляция апарылған. Аны тиксі хазнада кӧріп алғаннар. Паза офлайн оңдайнаң даа тузаланғаннар – залда одырып, постары форумда араласханнар. Аптека тоғынҷыларының кӧбізі анда аралазарға сағынған даа полза, че тоғынчатхан сылтаанда кил полбаан.
Че кемге-де пір дее оң полбаан полза, ол форумның архив материалларын (видеоға пазылғанын) форум сайтында кӧріп аларға чарир. Ол архив анда чарым чыл хайраллалар.
Піди форумны онлайн паза офлайн оңдайнаң пірге иртірерге технология саринаң уғаа сидік тоғыс. Аны уғаа улуғ ӧменең апарарға киліскен. Ӱс учреждениені – РТС компания, Искірігліг технологиялар кіні паза Сибирьдегі имнег хазна университеді (Томск город) – пірге тоғындырары иң сидік чардых полған. Лекция залда хығырылчатхан туста спикерлер онлайнҷа чоохха хозыл турчалар. Іди Москвадағы, Cанкт-Петербургтағы кізілер чоох тутханнар, ол туста, тоғыс сайбалбас ӱчӱн, піске уғаа улуғ нандырығ артылған. Тоғызыбысты «5+» баллға паалирҷыхпын, – cағызынаң ӱлескен «Аптечное дело» ассоциацияның кнезі Анастасия Филиппова.
Форумдағыларға законзар кирілчеткен алызығларҷа, наа законнарҷа чарыдығлығ тоғыс апарылған. Вузтардағы профессорлар уғаа чахсы полыс пиргеннер, олар нормативнай практиканы специалисттерге уғаа чахсы чарыда чоохтааннар, теен Анастасия Викторовна. Ыраххы аймахтардағы, ааллардағы фармацевттерге юридическай сурығларны пӧгерге улам на сидік поладыр. Форумда, тізең, оларға лекторларнаң кӧні чоох алызар оңдай полған. Кем-де оларға онлайнҷа чат пастыра сурығ пиріп, пілізін алғытхан. Законнарны полған на кізі пілбинче нооза, форум араласчыларына оларны орта оңарарға полысханнар. «Тегілек столлар» улуғ туза ағылғаннар. Анда ідӧк иң сидік сурығлар аймах-пасха отрасльлардағы кізілернең, ӱлгӱдегілернең, ӱзӱрілгеннер.
– Піс пу форумның социальнай кӧстеглерін кӧзіт пирерге сағыс тутхабыс, аның сылтаанда піске партнёрларыбыс уғаа чахсы полыс пиргеннер. Уғаа чахсы хабасхан пістің правительство, форум иртірҷең орыннар арендаа тикке пирілген. Аныңох кӱзінең трансляция иртірілген. – таныхтаан Анастасия Филиппова.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде