ЧИБІРГІ ЧЫЛ ТЫХТАЛБААН БАССЕЙНГЕ НАА ТЫНЫС ПИРІЛДІ
24.05.2023
Хабарлар
![ЧИБІРГІ ЧЫЛ ТЫХТАЛБААН БАССЕЙНГЕ НАА ТЫНЫС ПИРІЛДІ ЧИБІРГІ ЧЫЛ ТЫХТАЛБААН БАССЕЙНГЕ НАА ТЫНЫС ПИРІЛДІ](/upload/iblock/b45/b4536acfa665a1ccc18eeb3ad8e025a1.jpg)
Наа бассейнде кинектерге суға кірҷең оңдай пар
Спорт. 19 майда Абазадағы спорт школазында улуғ ӱлӱкӱн ирт парды, анда бассейн азылған
Илееде чыл бассейнде тыхтағ тоғыстары апарылбаан, аннаңар 2021 чылда, Хакасия пазы Валентин Коновалов Абазада полғанда, чуртағҷылар бассейнні нааҷылирға тіп ахча пирерге сурынғаннар.
2022 чылда тыхтағ тоғыстары пасталыбысханнар. Ниме иділген? Чарытхы, суғ паза чылығ пирҷең системалар тиксі нааҷылалғаннар. Ӧӧн тоғыстар бассейннің ідізінең палғалыстығ. Иргі плитканы хыйа алыбызып, нааны чапсырғаннар. Ідӧк наа кӧзенектер, ізіктер турғызылғаннар, чылығ пол тӧзелген, наа чарытхы тартылған, стенелер дее нааҷылалғаннар. Прай тыхтағ тоғыстарына республика бюджедінең 20 млн азыра салковай парыбыстыр, Абаза бюджедінең, тізең, 600 муң салковай.
Бассейн азыларына Валентин Коновалов, физическай культура паза спорт министрі Сергей Кочан, Абаза пазы Валентина Филимонова, республиканың пӱдіріг ӧмезінің кізілері Сергей Почилов паза Тимофей Сунсин араласханнар. Республика пазы чооғында таныхтаан: «Кізі паза аның тилізі ол пістің пис стратегия кӧстеенің пірсі полча. Хакасияның правительствозы прай ниме итче, республикада спорт инфраструктуразын тилідер ӱчӱн».
Хызыл лентаны хыплабысханда, абазадағылар ӱлгӱ алнында суғда хайди чахсы тудынчатханын кӧзіт пиргеннер. Пастап олғаннар бассейнде устарынаң махтанғаннар, анаң улуғлар суға кірібіскеннер. Паза, таныхтирға кирек, Абазадағы бассейнде кинектерге сомҷаң оңдай пар. Пір пулуңда суға тӱзірҷең одырчых ілінче, пас полбинчатхан кізіні, андар одыртып, кирек синге тӱзірерге чарир.
Пис часха читкелек палаҷахтарға бассейнзер ахча тӧлебин чӧрерге чарир (пілдістіг, улуғларнаң хада). Кірері 110 – 150 салковай турчаттыр.
Олох спорт школазында Валентин Коновалов Абазадағы кічіг хоккеисттернең тоғасхан. «Металлург» клуб пӱӱл 1 июньда ӱс чылын таныхтир, анда палалар паза улуғлар хоккей ойнапчалар. Хысхаҷах тусха «Металлург» олғаннар командазы пӧзік чидіглерге сығып алған, пӱӱл часхызын ол регион синіндегі марығда пастағы орын утып алған (2012-2013 чылларда тӧрееннернің аразында). Тоғазығда Хакасия пазы, олғаннарнаң, оларның іҷе-пабаларынаң, тренернең, Сергей Кочаннаң чей ізіп, кирексіністерін піліп алған. 2020 чылда республика бюджедінең хоккей коробказына 1 млн салковай пирілтір, че анда хысхызын на ойнирға чарир. Пасха туста футбол ойнаҷаң ачыхта тренировкалар иртчелер, амды, тізең палаларны неделяда пір хати Ағбанзар ЦСКА-ның пузынзар ал чӧрчелер. Аннаңар чабых пус площадказын пӱдірерге улуғ кирексініс сығыс килче, пус чыл ибіре кирек. Валентин Коновалов спорт министерствозына чабых айғының проект-смета пічіктерін тимнебізерге чахығ пирген. Ол тимде полза, ахчаны хайдаң алары кӧрінер.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде