ЧААҶЫ ПОЛАРҒА КӦНІКЧЕЛЕР
24.05.2023
Хабарлар
![ЧААҶЫ ПОЛАРҒА КӦНІКЧЕЛЕР ЧААҶЫ ПОЛАРҒА КӦНІКЧЕЛЕР](/upload/iblock/30c/30cebbe4ed6881535af35e1d02cfd92b.jpg)
«Чиңіc» ойын. Ағбандағы чааҷы гарнизонында тиксі Россияда иртчеткен «Чиңіc» чааҷы спорт ойыннары ирткеннер
Пу чааҷы спорт ойыннары Илбек Чиңіcтің 78 чылына чарыдылғаннар. Мындағ мероприятиелер Россияда 20 азыра чыл иртірілчелер. Олар хаҷан-да совет ӱлгӱзі тузындағы «Зарница» ойынның кибірлерін узаратчалар. Амғы «Чиңіc» чааҷы спорт ойыннары саарбахтарны чир-сууна хынарға, спортнаң айғазарға кӧніктірчелер паза тӧреен чирін арачылирға тимде поларға ӱгретчелер.
Пу марығларға Хакасияның прай чааҷы клубтарының олғаннары чыылысханнар. Прай 14 команда пол парған. Полғаны ла позының чааҷы кип-азаанаң. Оларны кӧрерге дее сіліг.
Олғаннар чааҷы гарнизонындағы улуғ ачыхта тиңни турыбысханнар. Строй алнынҷа хызыл знамя апарчатханнарында, прайзы чіке турған. Анаң Россия паза Хакасия гимннері ойнадылғаннар.
«Чиңіc» чааҷы спорт ойыннары пайрамни азылчатханда, Хакасия пазы Валентин Коновалов олғаннарзар айланған:
– Пӱӱн сірер мындағ ойыннарда аралазып, чааҷы науказын чахсы оңар сығарзар. Мында стройнаң чӧрерге паза чаа тимненізін иртерге ле нимес, че ідӧк Россияның паза Илбек Ада чааның тархынын піліп аларзар. Пӱӱл Илбек Чиңіcтің 78 чылы таныхталған. Ол пістің чонның сабланызын паза матырын таныхтапча. Піс ӧбекелерібіске, махачы чаалазып, айас тигір паза амыр чуртас ӱчӱн алғызыбыс читірчебіс паза оларға поғдархапчабыс. Пістің ӱчӱн чуртастарын пир салған матырларның аттары сағызыбыста хаҷанға даа халар.
Сағам пістің чааҷылар Украинада амғы нацисттердең паза бандеровецтердең тоғыр ідӧк матыр чааласчалар. Пӱкӱлее Кидеркі Европа піcтең тоғыр чаа апарча. Чир-суубысты арачылиры – ол полған на кізінің аарластығ кирее. Андағ чахығ артыс салғаннар пістің ӧбекелерібіс.
Пӱӱл мында республикадағы иң чахсы командалар чыылыс парғаннар. Чиңіc тутхан команда тиксі Россия марығларында аралазар.
Анаң «Барс» чааҷы спорт клубының олғаннары, чааҷыларның чохыр комбинизоннарын кизіп, сын чааҷылар чіли пычахнаң паза автоматтарнаң микелер толдырғаннар.
Соонаң прай отрядтар трибуна алнынҷа пайрамнығ маршха тимненібіскеннер. Иң алнында Ағбан пилтірі аймаанаң килген хызыҷахтарның барабанщиктер ӧмезі сіліг пар сыххан. Хызыл кофталығ паза ах юбкалығ хызыҷахтар иңнілеріне ілдірген барабаннарны пір тиңе саап сыхханнарында, андағы кізілернің азахтары постары ла маршировать поларға тимде полғаннар.
Соонда пасха отрядтар табаннарынаң асфальтты пір тиңе тошладып ала парғаннар.
Анаң олғаннар Илбек Ада чаада чат халған чааҷыларның хумартхы тазы хыринзар тіріг чахайахтар салғаннар.
Ол кӱнде олғаннар автоматты, сайап, чыыбызарынҷа, «полоса препятствий» иртерінҷе паза тирде чичең атарынҷа марығласханнар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде