САРАТОВТАҢ СЫЙЫХТАР АҒЫЛҒАННАР
26.05.2023
Хабарлар
![САРАТОВТАҢ СЫЙЫХТАР АҒЫЛҒАННАР САРАТОВТАҢ СЫЙЫХТАР АҒЫЛҒАННАР](/upload/iblock/e42/e4223404c59d166d4e46642af39754b8.jpg)
Тоғазығ. Хакасия правительствозының туразында республика пазы Валентин Коновалов Дельфийскай ойыннардаң сыйыхтығ айланған чииттернең тоғасхан
Дельфийскай ойыннар Пурунғы Грецияда тӧстелгеннер, олар Дельфа городта иртірілҷеңнер. Оларда чайаачылар устарынаң сынасчалар, аймах фестивальларда, кӧзідіглерде араласчалар. Россияда пу марығлар чибіргіҷе чыл иртіріл парирлар. Пӱӱл чииттернің ХХІІ Дельфийскай ойыннарының араласчыларын Саратов городта чығаннар. Анда тиксі Россиядаң 2,5 муң азыра кізі 36 номинацияда араласхан. Оларны частары хоостыра чарғаннар: 10 – 13, 14 – 17, 18 – 25 частығлар.
Хакасиядаң ойыннарда читі олған паза чиит кізі араласхан. Оларның санында – чон кӧг тиріглерінең ойнапчатханнар, хоосчаа ӱгренчеткеннер. Араласчылар Ағбандағы А.А.Кенельнің адынаң 1 № олған музыка школазында, музыка колледжінде, Харатастағы хоос школада ӱгренчелер.
– Сірер нандырығлығ тоғыс толдырғазар – республикабысты федеральнай синде турыстығ кӧзіткезер. Пілчем, аның алнында республика синінде ирткен таллағны чахсы салтарлығ иртібіскезер. Аның ӱчӱн сірерге алғызым читірерге сағынчам, прайзы айдассар. Ідӧк ӱгретчілеріңе улуғ алғызым читірчем. Олғаннарның пӧзік кӧзідіглері – сірернің тоғызыңарның салтары. Марығда аралазып, кӧрді поларзар, кӱстеніп тоғынчатсаң, итчеткен кирееңе прай чӱрееңнең хайчатсаң, хайдағ даа сидіксіністер тобырылча. Мыннаң мындар сірерге оң ползын, сағынған сағыстар толзын, – айланған олғаннарзар Валентин Олегович.
Чииттерні ідӧк Хакасияның культура министрі Светлана Окольникова, орынҷызы Лариса Киштеева алғыстааннар. Светлана Анатольевнаның чооғынаң, Хакасия 1990 чыллардаң сығара пу ойыннарда чахсы салтарлар тӧреміл кӧзітче. Араласчылар алтын, кӱмӱс, хола медальлар илееде ағылғаннар.
– Дельфийскай ойыннарда аралазарынаң палғалыстығ пір ле сидіксініс пар, – теен Светлана Окольникова. – Чылдаң чылға анда республикадаң читі-сигісче ле олған араласча. Пасха регионнардаң илігер-алтонар чиит кізі кил парадыр. Пістің чайаачы, таланттығ олған ідӧк кӧп, че прайзының на іҷе-пабазы палазын марыға ыс полбинча. Прай ниме ӱчӱн олар тӧлепчелер нооза. Сағынчам, араласчылар санын ӧскірібіскен ползабыс, ойыннардаң ағылған сыйыхтар саны ідӧк хозыл парарҷых.
Анзына Валентин Олегович килчеткен чылға араласчылар санын ікі хати ӧскірер оңдай табарға кирек тіп нандырған. Ол тоғазығ протоколына пу сурығны кирерге чахаан, соонаң, бюджет тимнелчетсе, пу кӧстеге позыдылар ахчаны кӧр саларға молҷаан. Ідӧк устағҷылар чылдаң чылға араласчылар санын хозып одырарға чӧптес салғаннар.
Пӱӱл Россия синіндегі марығларда А.А.Кенельнің адынаң музыка школазының баяннаң ойнапчатхан оолахтар Владислав Игнатьев паза Егор Хома, музыка колледжінің студенті Алина Мазай, ыыхнаң ойнап, жюридегілерні чапсытханнар, аның ӱчӱн ӧнетін дипломнаң таныхтатханнар. Харатастағы хоос школаның ӱгренҷізі Екатерина Скудневскаяны хазна синінде иртер ремеслолар фестивальында аралазарға хығырғаннар. Чолға паза анда чуртирына хорадығларны фестиваль тӧстегҷілері посха алчалар.
Музыка колледжінің ӱгретчізі Вячеслав Албычаковтың чооғынаң, ӱгренҷізі Алина Мазайға ойыннарның чон кӧг тиріглері чардығында 18 – 25 частығ уғаа кӱстіг араласчыларнаң марығлазарға киліскен. Оларның аразында Алтынзархы Кавказтаң, Москвадаң, Башкириядаң чииттер полғаннар. Че андағ даа полза, Алина позының узын чахсы кӧзіт пирген. Вячеслав Вадимович килчеткен чылда пазох пу ойыннарда аралазарға пӧгінчебіс теен. «Хайдағ алҷаастар тӱзедерін, нимее хайығ саларын пілчебіс. Аннаңар марығларға уламох кӱстеніп тимненербіс», – ӱлескен сағыстарынаң ӱгретчі.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде