СПОРТСМЕННЕРГЕ МАРЫҒ ИРТІРГЕННЕР
26.05.2023
Хабарлар
![СПОРТСМЕННЕРГЕ МАРЫҒ ИРТІРГЕННЕР СПОРТСМЕННЕРГЕ МАРЫҒ ИРТІРГЕННЕР](/upload/iblock/708/708abd5f92eefcbb2e85be5581c86ada.jpg)
«Благодарение» фондтың устағҷызы
Тарика ТОРОКОВА марығның призерларынаң хада
Кӱрес. Полтах аалда Истегі школаны тоосханнарның сыйыхтарына грек-рим кӱрезінҷе Асхыс аймааның азых турнирі ирткен
Ис чирінең илееде саблығ кізі сыххан. Оларның санында хоосчы Алексей Ултургашевті, имҷі Зинаида Нагрузованы, хайҷылар Евгений Улугбашевті, Вячеслав Кученовты паза пасхазын адирға кирек. Ідӧк истегілернің спортта хозымы улуғ. 25 кізі CCCР-ның паза Россияның спорт узы аарластығ атха турысхан. Олардаң 17 спортсмен грек-рим кӱрезінде чидіглерге читкен. Ис чирінің ӧӧн поғдархазы чоннар аразындағы класстығ спорт узы Иван Голощапов полча.
Прай даа кӱресчілер тренер Александр Кильчичаковтың холында устарын таптааннар. Чиит ӱгретчі Истегі ортымах школазар 1973 чылда кӱскӱзін тоғысха кірген. Олох чылда грек-рим кӱрезінҷе секцияны асхан. Секцияда чон ӱзілбеҷең. Тренернің устаанынаң школа ӱгренҷілері пастағыох чылда область синінде иртчеткен марығларда чиңістер тут сыхханнар. Голощаповтаң пасха, спортсменнердең Пётр паза Альберт Топоевтерні таныхтирға чарир. Альберт Николаевич 1981 чылда РСФСР чииттерінің ойыннарында кӱмӱс призер полыбысхан. Пётр Михайлович, тізең, 1986 чылда РСФСР чоннарының Спартакиадазында ікінҷі орынға сыххан.
Секцияа чӧрген ооллар постарын аймах сфераларда таап алғаннар. Кӧзідімге, Анатолий Кызласов Пии аалда стоматолог полып істенче, Юлий Топоевнең Георгий Челтыгмашев Боград аймаанда мал имҷілері полчалар. Валерий Шаталин тимір чолда маңнаныстығ тоғынча. Александр Канзычаков – Росреестрнің Хакасияҷа управлениезінің хазна инспекторы. Владимир Сунчугашев аал хониина кӧп чыл пир салған.
Пӱӱл Полтах аалда грек-рим кӱрезі апарылып пастааннаң 50 чыл толар. Пу пайрамға удур секция араласчылары Асхыс аймааның азых турнирін иртірерге чаратханнар. 16 часха читкелек саарбахтар марыға Ис чирінзер 20 майда чыылысханнар. Арға-мӧрійде 100 артиинаң кізі кӱзін сынаан. Араласчыларның кӧбізі Асхыс аймаанаң полған, ідӧк кибіске Ағбан городтың, Алтай, Таштып, Шира аймахтарының спортсменнері сыхханнар. Турнирні пайрамни азарында Асхыс аймаа пазының пастағы орынҷызы Евгений Костяков, Хакасияның спорт кӱрезінҷе федерациязының президенті Геннадий Канзычаков араласханнар. Аарлығ аалҷылар сіліг кӱресті кӧзідерге, чиңіc тударға алғааннар.
Марығ пастағы минутадаң хазыр парған. Саарбахтардаң узынаң Аймир Карамчаков (57 кг) ӧріндірді. Чиит кӱресчі Асхыс поселоктаң, ол тренер Виталий Яковлевич Челтыгмашевтің устаанынаң харбасча. Пӱӱл мартта Аймир Новосибирск облазында ирткен Сибирь первенствозында хола медаль утхан. Полтах аалда ирткен турнирде Аймир пірдеезіне маң пирбеен. 62 кг кӧдірімде Вадим Чебодаев позын турыстыра кӧзіткен. Вадим – Полтах аалның чуртағҷызы, ол тренер Степан Самуилович Мамышевтің холында узын таптапча.
Тикcі алза, марығ пӧзік синде ирткен. Турнир тӧстегҷілері, идінҷектернең чоох алызып, чахсы сыйыхтар ит пирерге кӱстенгеннер. Сыйыхтығ орыннарға сыхханнарға ахча, футболкалар сыйлалған. Хакасияның физическай культураҷа паза спортча саблығ тоғынҷызы Александр Кильчичаков чиңісчілерге паза призерларға кинделерін читірген.
Марығның пастағҷылары Валерий Шаталиннең Марина Топоева полчалар. Валерий Викторович, сағыстарынаң ӱлезіп, теен:
– Турнирні иртірерге сағыс пылтыр тӧреен. Секцияа кізі кӧп чӧрҷең. Хомзынысха, арғыстарыбыстың піреезі сын чирзер парыбысхан. Пу марығ пастыра піс тренер Александр Гордеевичке алғызыбыс читірчебіс, нанҷыларыбысты сағысха кирчебіс, ӧсчеткен тӧлге чол асчабыс. Сизінгенде, грек-рим кӱрезінде чиит тренерлер саны хозыл партыр. Анзы ӧріндірче. Піс секцияа хынып чӧрҷеңміс, пу спорт кӧрімінің таңдағызы поларға кирек.
Мероприятиені иртірерге хабасхан ӱчӱн, «Благодарение» фондтың устағҷызы Тарика Александровна Тороковаа, Ӧӧркі Чӧп депутады Евгений Павлович Челтыгмашевке, Хакасияның спорт кӱрезінҷе федерациязының президенті Геннадий Степанович Канзычаковха, идінҷектер Александр Ильич Топоевке паза Алёна Вадимовна Бурнаковаа, имҷі Ергаш Егорович Топоевке алғызым читірчем. Секцияа чӧргеннер ідӧк ахча хосханнар. Культура туразының тоғынҷылары матап хайындылар. Турнир чахсы ирткенінде оларның хозымы парох. Ізенчебіc, Истегі школаны тоосханнарның сыйыхтарына марығ кибірге кір парар. Тренерлернең чоохтасханда, олар пазағы чылда Полтахсар марыға килерге тимделер.
Автор :
Айара ЧЕБОДАЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде