СТУДЕНТТЕРГЕ – ЧАПСЫХ ЛЕКЦИЯ
02.06.2023
Хабарлар
ХТИ-ның студенттері лекция исчеткен туста
Тоғазығ. Сибирьдегі федеральнай университеттің филиалы полчатхан Хакасияның техническай институдының студенттеріне Хакасия пазы Валентин Коновалов лекция хығырған
Лекцияның ӧӧн темазы «Демократия: теория, проблемы и перспективы» адалған. Аны институттың улуғ курстағы студенттері истерге килгеннер. Итсе-де, Валентин Олегович, сірерні пеер кӱснең ыспааннар, неке, тіп хормачыланып сурғанда, хай піреезі хатхыр ла салған. Студенттернің хай піреезі занятиелер соонаң тынанарға иткен полбас па? Че лекция истерге халғанына олар ачырғанмасха кирек полғаннар. Ол лекция даа нимес, азых чоохтазығ полған тиирге чарир.
ХТИ-ның актовай залында одырчатханнарға пірдеезі паалағ турғыспаан полза даа, олар регион устағҷызының сурығларына нандырарға уйатчатханға тӧӧй пілдірткен. Алай саба чоохтаныбызарынаң чочынғаннар ба?
Че нинҷе-де студент хазна тархынын, ӱлгӱ пӱдізін пілчеткенін кӧзіт пирген. Оларға Валентин Олегович ойын пазында «зачет» турғыс пирерге молҷаан.
Соонаң СФУ филиалы полчатхан Хакасияның техническай институдының студенттеріне постарына Хакасия пазына сурығлар пирер оңдай полған. Анда олар ӧткіннерін кӧзіт пиргеннер. Валентин Олегович чииттернің сурығларына cын нандырығлар пирерге кӱстенген паза ол-пу ағырсымнығ сурыға позының сағыс-кӧрізін читірген.
Таныхтирға кирек, Хакасия пазы Валентин Коновалов чииттернең удаа тоғазығлар иртірче. Ӱр ниместе Н.Ф.Катановтың адынаң Хакас хазна университедінің студенттеріне ідӧк регион устағҷызының лекциязын истерге оң полған.
Сом Дина Карамчаковани
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
