КӰН, ЧИЛ, СПОРТ ПАЙРАМЫ
02.06.2023
Хабарлар
![КӰН, ЧИЛ, СПОРТ ПАЙРАМЫ КӰН, ЧИЛ, СПОРТ ПАЙРАМЫ](/upload/iblock/9f6/9f698dd04d7ebffe4a70df1f3715cb02.jpg)
Денис ЧЕРТЫКОВНАҢ Артём ПОПОВ (№ 1900) алнында чӱгӱрчелер
Фестиваль. Пӱӱл «Чилдең табырах» фестиваль ӱзінҷі хати иртірілген. Анда 2016 кізі араласты
Чӱгӱріc фестивальы Хакасияның ӧӧн спорт таниина айлан парир. Аны кізілер сағыпчалар, ӧнетін тимненчелер, прай сӧбіренең алай тоғыс ӧмезінең аралазарға кӱстенчелер. Анда кічіглернің дее, улуғларның даа кӱс cынир оңдай пар. Пос оңдайлығ спортсменнерге пис дистанция кӧріл парған. Иркеҷектерге 500 метр тобырарға киректелче, улуғ арах палалар 1 километр чӱгӱрчелер. 3 километр – фестиваль араласчыларының иң хынчатхан дистанциязы. 2023 чылда анда 694 кізі араласты. Посха киртінчеткен улус 10 километр дистанция таллапча, пик хуйахтығлар чарым марафон – 21,1 километр – чӱгӱрчелер. Пылтырғызынаң тиңнестірзе, араласчылар саны пілдірте ӧс партыр. 2022 чылда фестивальда 1360 спортсмен узын сынаан полза, пӱӱл 2016 кізі полды.
Амғы спорт пайрамы чонның аймағынаң хайхатхан. Фестивальда кемні ле кӧрерге киліспеен. Владимир паза Екатерина Тодозаковтар – ӱс паланың паба-іҷезі. Сӧбіре пазы пӱдірігҷі полтыр. Екатерина Николаевна Ағбандағы «Тигір хуры» олған садында воспитатель полып істенче. Ынағ ирепчі марығда араласпаан, че прай палаларын чӱгӱріске сығарыбысхан. Иң пурун дистанцияа 3 частығ Демьян сыхтыр. Оолағас 500 метрні тобырған. Сева 2-ҷі класс тоос салды. Ол 1 километрде кӱзін сынаан. Василисаны фестивальның ветеранына санирға чарир. 5-ҷі класстың ӱгренҷізі спорт пайрамында ікінҷі хати араласча. 2021 чылда ол 1 километр чӱгӱрген полза, амды 3 километр тобырған. Хызыҷах майых партыр. Василисанаң Сева хакас тілінең чахсы чоохтанчалар. Харындас-пиҷе, Хакасия ӱлгӱлері иртірчеткен тіл мариинда аралазып, ахчалығ сертификаттар утханнар. Тодозаковтар, палалары тӧреен тілні чахсы пілзіннер тіп, кӧп кӱс cалчалар. Амды ирепчі очы оолғы Демьянны хакас тіліне ӱгредерге итчелер.
Фестивальда тӧреміл араласчатханнарның санында Александр Карачаковты адирға кирек. Чир-суғҷыбыс Таштыптаң, ол «Тӧӧ» спорт школазында саналығ чӱгӱрерінҷе тренер полча. Тыс пілбес кізі аймах марығларда кӱс сынирға хынадыр. Пу наада спортсменнер «Kuntag Ultra Trail» арға-мӧрійге чыылысханнар. Пик хуйахтығлар Салбых кӱргеннең Ағбан пилтірі поселокка теере чӱгӱргеннер. Дистанцияның тиксі узуны – 57 километр, аның чардығы Кӱнніг тағның тигейлерінҷе ирттір. Карачаков азах меетке ӱзінҷізін читкен. «Чилдең табырах» спорт пайрамынаңар чоохтаза, чир-суғҷыбыс ікінҷі чыл изере чарым марафон чӱгӱрче. Пӱӱл Александр фестивальға Савелий оолғын хада алып алған. Кічіг спортсмен алында ниик атлетика мариинда араласпиндыр. 8 частығ Савелий теен:
– Позымны чахсы чӱгӱрібіскем тіп санапчам. Араласчыларның чарымы минің cоомда халған.
Фестивальда пастағызын на Любовь Укачикова чӱгӱрген. Хакас абахай 10 километр дистанцияны таллап алған. Марыға тимненіп, Любовь Петровна неделяда ікі хати тренировкалар иртірҷең. Анзы асхынах полтыр. Ипчі чӱгӱрерге сидіксінген. Чир-cуғҷыбыс – МЧС-та сағыбаан саайлар кӧрҷең инженер. Пос туста ол ӧткін тынаға хынчатханнарны Ырғах-Тарғах тайғазынзар, Шерегешсер, Позарымзар паза пасха даа чирлерзер ал чӧрче.
9-ҷы класстың ӱгренҷізі Ангелина Тюкпиекова опыттығ спортсмен полча. Саарбах илееде тус ниик атлетика секциязынзар чӧртір. Че хазна сыныхтағларына тимненіп, тӧрт ай спортнаң айғаспиндыр. Ангелинаның чооғынаң, ол тренер Ольга Михайловна Гусеваның холында узын таптапча. Позын аймах дистанцияларда сынаптыр. Тренировкаларға чӧрбинчеткенде, чӱгӱрерге сидік арах полған.
«Чилдең табырах» фестивальда Хакасияның спорт министрі Сергей Кочан, Ағбанның пазы Алексей Лёмин, Ӧӧркі Чӧп депутады Олег Иванов паза даа пасхазы араласхан. Че ӧӧн «чылтысха» ниик атлетикаҷа Россияның cпорт узы Денис Чертыков саналған. Пӱӱл аның ӱчӱн хада хонғаны Зинаида паза хызыҷаа Даяна «ағырғаннар». Сынны чоохтаза, пістің оол чиңіс тударына пірдеезі ікінҷілебеен. Ағаа хоза спортсмен фестивальның рекордын турғызыбыстыр. Чарым марафонны ол 1 час 5 минутаа чӱгӱрібіскен. Кізілер Денис Чертыковтың чидиине прай чӱреенең ӧрінгеннер. Сағыстарынаң ӱлезіп, чир-суғҷыбыс чоохтаан:
– Пылтырғызынаң тиңнестірзе, чӱгӱрерге хай-хай оой полған. 2022 чылда 21,1 километрні піс 30 градус ізігде тобырғабыс. Кӧрігҷілер дее майых парғаннар, спортсменнердеңер чоох чоғыл. Пӱӱл чӱгӱріске уғаа чахсы кӱн тур пирді. Минің кӧрізімнең, «Чилдең табырах» – спорт пайрамы. Ол чонны піріктірче. Спортнаң айғасчатханнарның саны хозылзын. Фестивальның оргкомитедінің тоғызын пӧзік паалирҷыхпын. Чылығ кӱннер турыбысханда, прайзын чӱгӱрерге хығырчам.
Чарым марафонда ікінҷі орынға Артём Попов сыххан. Спортсмен – Чертыковтың арғызы. Пӱӱл апрельде Артём Попов, кросс чӱгӱріп, Россия первенствозында чиңіс тутхан. Чиит кізі Пии аймаанаң. Пылтыр чӱгӱріc фестивальында 10 километр тобырған, 2023 чылда чарым марафонда кӱзін сынады. Спорт «чылтыстарынаң» Тимофей Дадыко сала ла халған. Аның хола медаль. Ипчілердең Наталья Руденко чиңіс тутхан, Алина Черных азах меетке ікінҷізі читкен, ӱзінҷі орында – Елена Гетт. 10 километрде чир-суғҷыларыбыстаң Ирина Ульчугашеванаң Елена Тохтобина постарын турыстыра кӧзіткеннер. Пастағы спортсмен тӧртінҷі орынға сыххан, Тохтобина пизінҷізі полыбысхан.
Сом Сергей Неделинни
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде