ПРАЙ ХАБАЗЫҒЛАР – ПІР ОРЫНДА
02.06.2023
Хабарлар
«Ада чир-суубыс арачылағҷылары» фондтың Хакасиядағы пӧлиин
азарында республика пазы Валентин КОНОВАЛОВ чоох тутча
Полызығ. 31 майда Ағбанда Лениннің орамазындағы 56№ турада «Ада чир-суубыс арачылағҷылары» фондтың региондағы пӧлии азылған. Пайрамнығ мероприятиеде Хакасия пазы Валентин Коновалов араласхан
Ӧнетін чаа операциязы пасталғаннаң сығара прай Хакасия піcтің чааҷыларға паза оларның сӧбірелеріне гуманитарнай полызығ чыып пастаан. Андағ хабазығ пирерінде предприятиелер, учреждениелер, халых пірігістері, хазна органнары паза чуртағҷылар араласханнар. Пу кӧстегҷе республика правительствозының чардыхти мобилизацияа хығыртылғаннарға паза оларның сӧбірелеріне хабазар тоғызы иң алғымнар санында полған. Андағ полызыға 500 миллион азыра салковай позыдылған.
2022 чыл тоозылчатханда ӧнетін чаа операциязында араласчатхан чааҷыларға паза оларның сӧбірелеріне хабазар пӧгіннең алынҷа программа тимнелген. Хакасияның Ӧӧркі Чӧп депутаттары аны тудығ чох алыбысханнар.
Пӱӱл 3 апрельде Россия президенті Владимир Путин «Ада чир-суубыс арачылағҷылары» хазна фондын тӧстирдеңер Указта хол салыбысхан. Аның пӧгіні – ӧнетін чаа операциязында араласхан полған на ветеранға паза анда чуртастарын пир салған чааҷыларның сӧбірелеріне алынҷа социальнай полызығ пирері. Ол полызығ прай пір орында, пір кӧзенек оңдайынаң, МФЦ-дағы чіли пирілерге кирек. Полған на ветеранның паза чааҷының сӧбірезінің кирексіністерінең алынҷа социальнай координатор айғазар. Ветераннарға психологияҷа, имнег киреенҷе, право сурығларынҷа, пічіктер тимнирінҷе паза даа пасха кӧп киректерҷе социальнай полызығ пирілері кӧріл парған.
«Ада чир-суубыс арачылағҷылары» хазна фондының Хакасиядағы пӧлии кӧп хадыллығ тураның пастағы хадылында орныхча. Анда илееде зал пар, компьютерлер турғызылых, хай пірее мебель пар. Андар ам даа кирек оборудование, хоза мебель турғызарға кирек полар. Тоғынҷаң кадрлар тимде, полызығ пирҷең тоғыс тӱзімніг апарыларына ізеніс пар. 1 июньнаң Россияның прай регионнарында мындағ пӧліктер тоғынып пастабысханнар.
«Ада чир-суубыс арачылағҷылары» фондтың республикадағы пӧлии азылғанда, сӧс регионның устағҷызы Валентин Коноваловха пирілген.
– «Ада чир-суубыс арачылағҷылары» хазна фонды Россия президенті Владимир Путиннің Указы хоостыра тӧстелген. Аннаң Анна Цивилева устапча. Фондтың пӧгіні – ӧнетін чаа операциязының араласчыларына паза оларның сӧбірелеріне прай кирек полызығлар пирері. Амды ол ӱлгӱлернің, идінҷектернің, халых пірігістерінің полызығ пирер тоғызын піріктірер. Амға теере ол тоғысты пірге апарар пірігіс чох полған.
Мындағ тоғыс кізілерні патриотизмге ӱгредер, чииттерге кӧзідім полар. Регионның ӱлгӱлері фондха сыбыра кирек полызығ пир турар. Ветераннарнаң хада-пірге полыңар, полызығ пиріңер. Прайзыбыс хада-пірге тудынзабыс, прай ниме киліс турар, – теен Хакасия пазы.
Аның соонда ідӧк чоох тутханнар Россия Матыры Аймир Миягашевтің іҷезі Елена Миягашева, «Ада чир-суубыс арачылағҷылары» хазна фондының региондағы пӧлиинің устағҷызы Оксана Трусова.
Хайди таныхтаан Елена Миягашева, ӧнетін чаа операциязының араласчыларына пу уғаа кирек фонд. Оларға полызығ прай саринаң киректелче. СВО-ның полған на араласчызы, чааҷыларның сӧбірелері мында постарының прай сурығларын пӧгіп ал турар.
Оксана Трусованың чооғынаң, пӧлікте 20 координатор тоғынар, амды андағ тура тӧстелче, хайдар ӧнетін чаа операциязының полған на араласчызы, оларның сӧбірелері айлан турарлар. Хайдағ даа сурығнаң айланзалар, олар прайзы пӧгілер. Кирек законнар чох полза, пӧлік тоғынҷылары андағ закон проекттерін тимнирге кӱстенерлер. Оксана Витальевна тоғыс чахсы апарыларына ізенізін читірген.
Мында таныхтирға кирек, Хакасияның правительствозы офис техниказын аларға, тыхтағ тоғыстарын толдырарға, учреждениенің cоциальнай координаторларын ӱгредерге кирек ахча позытхан. Андағ полызығ мыннаң мындар узарадылар. Социальнай координаторларның чарымы муниципалитеттерде ӧнетін чаа операциязында араласхан ветераннарға паза оларның сӧбірелеріне, СВО-да чуртастарын пир салған чааҷыларның сӧбірелеріне хабазығ аларына полызарлар. Полызығ пирер программаа пӱӱл республика бюджедінде 200 миллион азыра салковай позыдары кӧріл парған.
Сом Дмитрий Сунчугашевти
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
