АЙМАХ САРЫХТАРҶА ТОҒЫНЧАТХАН КӦГҶІ
02.06.2023
Хабарлар
![АЙМАХ САРЫХТАРҶА ТОҒЫНЧАТХАН КӦГҶІ АЙМАХ САРЫХТАРҶА ТОҒЫНЧАТХАН КӦГҶІ](/upload/iblock/400/400cc8eb4f316c3f8c3ce8ea9d8a026e.jpg)
Композитор Олег ТОКОЯКОВХА сыйыхтар читірчелер
Чайаачы ус. Пу наада Таштып аймаандағы ӧӧн библиотекада Олег Токояковнаң тоғазығ ирткен. Ол саблығ композиторның 65 чазына чарыдылған
Олег Токояков Таштып аймаандағы Харағай аалда тӧреен, ӧскен. Алтынҷы классха іҷезі Таштыптағы пансионзар пирібіскен. Аймах кінінде ӱгредіге хоза музыканаң паза спортнаң айғазар оңдайлар пар полған.
Олег Афанасьевич кӧп чыл Таштыптағы музыка школазында істенче, ідӧк Пыдырахтағы школада музыка уроктарын апарча. Кӧгҷі аймах сарыхтарҷа тоғынча, 50 азыра чайаачы тоғыс пас салған. Композитор хакас поэттернің кибелістеріне кӧп сарыннар чайап салған: «Кӱмӱс тӱстер», «Чалғыс харағай», «Чалахай хараа» паза аннаң даа пасхазы. Аның аймах кӧг тиріглеріне пазылған пьесаларны кӧрігҷілер хынып исчелер. 1996 чылда композитор «Чон узы» ат алған, 2015 чылда ол «Хысхылых» сыйыхха турысхан.
Библиотеканың тоғынҷызы Юлия Кидиекова тоғазығны интервью чіли апарған. Ол Олег Афанасьевичтің кічіг тузынаңар, студент чылларынаңар, чайаачы чолынаңар, сӧбірезінеңер сурығлар пирген. Тіріг чоохтазығда ӱгренҷілерге, улуғларға композиторның чуртазынаңар чарыда піліп аларға хынығ полған, постарының сурығларын пиргеннерӧк. Мындох Олег Токояковтың ӱгренҷілері, чатханнығ, хомыстығ одырып, композиторның хай пірее сарыннарын ойнап пирчеткеннер. Ырларын ідӧк «Кӱн Ари» ӧме кӧрігҷілер алнында толдырған – Елена Карамашева, Анастасия Карамашева, Татьяна Шулбаева, Елена Шулбаева, Наталья Пахтаева. Тоғазыға килген аалҷылар, Олег Афанасьевичті пайрамнығ чазынаң алғыстап, сыйыхтар читіргеннер.
«Халғанҷы туста сарыннар тың на паспинчам, – таныхтаан Олег Токояков, – че Украинада чат халған Аймир Миягашевтің чылына кӧг пас саларға сурынғаннарында, пазыбысхам. Пу чағында толдырарбыс».
Сом авторни
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде