Виктор Яковлевич Бутанаев ах чарыхтаң парыбысты
05.06.2023
Хабарлар
Чуртастаң парыбысты хакас чонының паза хобыйлар сӧӧгінің саблығ оолғы, улуғ ученай
Виктор Яковлевич Бутанаев
Ағаа 78 час полған. Ол хакас чонның науказына, культуразына улуғ хозым ит салған. Хакас фамилияларын, род-сӧӧктер хайдаң сыхханын чуртас тооза істескен. Чиит туста нымахтар, кип-чоохтар чыып, хакас аалларынҷа кӧп чӧр салған. Хакастарның чіт парған ӱлӱкӱннерін айландырған. Пістің чирібiстің тархынынаңар, археологиязынаңар, этнографиядаңар илееде книгалар сығар салған, наука тоғыстарын пас салған. Тӱрк хазналарының ученайлары аны чахсы таныҷаңнар паза пӧзік паалаҷаңнар.
Тархын наукаларының докторы, Хакас республиканың наукаҷа саблығ тоғынҷызы, профессор Виктор Яковлевич Бутанаевті паза аның наука тоғыстары пістің паза соондағы тӧлнің сағызында хаҷанға даа халар.
Хакас республиканың Улуғлар Чӧбінің президиумы
4 июньда 78 частығда ах чарыхтаң парыбысхан саблығ ученай, этнограф, тархын наукаларының докторы, профессор
Виктор Яковлевич Бутанаев
В.Я.Бутанаев Хакас республиканың саблығ оолларының пірсі. Наукада пӧзiк чидiглері ӱчӱн ағаа ТЮРКСОЙ-даң чоннар аразындағы сыйиин иң пурун пиргеннер. Ол Россияның социальнай наукалар академиязының академигі, тюркологтарның чоннар аразындағы пірігіс президиумының араласчызы, Хакас республика науказының саблығ деятельі полған.
Виктор Яковлевич Ӱстӱнзархы Сибирьнің тархынын, пурунғы культуразын тирең істес турған. Ол, аймах-пасха материалларны чыып, анаң пӱкӱле книгада сығарҷаң. Чиит туста «Конец императора тайги» кинода суурынған. Аның кӱстенгенінең Тун пайрам ӱлӱкӱнін таныхтап сыхханнар. Ол чон кибірлерін чахсы пілҷең, тайығлар иртірерге полысчаң. Позының наука тоғыстарын толдырып, кӧп кізілернең тоғасчаң, аймах архивтерде тоғынҷаң.
Виктор Яковлевич Сойан тӱрктарының культуразын, кибірлерін, чоннарның имнег киреен, шаманизмні, хакас родтарын істезіп, книгалар пас салған. Аның соонда кӧп книгалар, учебниктер, сӧстіктер, хакас мӱчелі, кип-чоохтар халғаннар. Хакасияның гербiн тӧстирінде араласхан.
Виктор Яковлевич Бутанаевтің чарых омазы пістің чӱреебісте хаҷанға даа халар.
Ағбан городтың устағ пастаа,
Ағбан городтың депутаттар Чӧбі,
Ағбан городтың ветераннар Чӧбі
Автор :
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде